ប្រទេសអូស្ត្រាលី ៖ ពពកផ្សែងដ៏ធំមហិមានៃភ្លើងឆេះព្រៃ ដែលរាតត្បាតអូស្ត្រាលីដ៏ធ្ងន់ធ្ងរបំផុត បានហុយរហូតដល់ប្រទេសស៊ីលី និងអាហ្សង់ទីន ក្រោយពីវារសាត់ក្នុងចម្ងាយផ្លូវជាង១២.០០០គីឡូម៉ែត្រពីលើមហាសមុទ្រប៉ាស៊ីហ្វិកមក។ នេះជាការប្រកាសកាលពីថ្ងៃទី៦មករា របស់ផ្នែកឧតុនិយមនៃប្រទេសទាំង២នៅអាមេរិកខាងត្បូងនោះ។
អ្នកទទួលខុសត្រូវម្នាក់របស់ផ្នែកឧតុនិយមស៊ីលី លោកប៉ាទ្រីស្យូអ៊ួរ៉ាគូសបញ្ជាក់ប្រាប់AFPថា នាព្រឹកព្រលឹមព្រះអាទិត្យមានពណ៌ក្រហម មកពីពពកផ្សែងដែលហុយចេញពីបណ្ដាតំបន់ភ្លើងឆេះព្រៃអូស្ត្រាលី។ ពពកផ្សែងស្ថិតក្នុងកម្ពស់ដល់៦០០០ម៉ែត្រ ហើយគ្មានបាតុភូតណាមួយ ដែលអាចធ្វើឲ្យផ្សែងទាំងនេះធ្លាក់មកកាន់ផែនដីវិញឡើយ។
ទន្ទឹមនឹងនេះ ផ្នែកឧតុនិយមអាហ្សង់ទីន បានផ្សាយបណ្ដារួបភាពផ្កាយរណបដែលបង្ហាញពពកផ្សែងរសាត់ពីទិសខាងលិចទៅខាងកើត។ គេអះអាងថា ពពកផ្សែងភ្លើងឆេះព្រៃនោះ អាចហុយដល់រដ្ឋRIO GRANDE DO SULជារដ្ឋនៅចុងខាងត្បូងបំផុតរបស់ប្រេស៊ីលផង៕ (កែសម្រួលដោយ ៖ បុប្ផា)
ចែករំលែកព័តមាននេះ