ខេត្តឧត្តរមានជ័យ ៖ ដីដុះរលុះធំ ជាតំបន់ទេសចរណ៍ធម្មជាតិដែលស្ថិតនៅជើងភ្នំដងរ៉ែកជាប់ព្រំដែនកម្ពុជា-ថៃ កំពុងតែមានចំណាប់អារម្មណ៍ពីភ្ញៀវជាតិ និងភ្ញៀវអន្តរជាតិ ហើយក្រុមអាជ្ញាធរ និងមន្ទីរទេសចរណ៍ខេត្ត មានគំរោងធ្វើការអភិវឌ្ឍន៍ឆាប់ៗផងដែរ។
តំបន់ទេសចរណ៍ធម្មជាតិដីដុះរលុះធំនេះ ស្ថិតនៅក្នុងភូមិខ្នាចឬស្សី សង្កាត់បន្សាយរាក់ ក្រុងសំរោង ខេត្តឧត្តរមានជ័យ បើយើងធ្វើដំណើពីទីក្រុងភ្នំពេញ តាមដងផ្លូវជាតិលេខ៦ឆ្ពោះមកទីប្រជុំជនស្រុកអន្លង់វែង តាមដងផ្លូវជាតិលេខ៦៧B មានចំងាយ៤២២គីឡូម៉ែត្រ និងបន្តទៅកម្សាន្តតំបន់ទេសចរណ៍ធម្មជាតិដីដុះរលុះធំ ដែលមានចំងាយ៨៥គីឡូម៉ែត្រជាប្រភេទផ្លូវក្រាលកៅស៊ូ ដោយមិនលំបាកក្នុងការធ្វើដំណើរនោះទេ។
ទាក់ទិនទៅនឹងតំបន់ទេសចរណ៍ដីដុះរលុះធំនេះ ក៏មានរឿងអាស្រូវមួយចំនួនផងដែរ បើយោងតាមការឱ្យដឹងពីឈ្មោះ ឌី សារិទ្ធ អនុប្រធានប្រជាការពារភូមិដែលប្រចាំការការពារនៅក្នុងតំបន់នោះបានអះអាងថា រូបគាត់មិនសប្បាយចិត្តក្នុងការលក់ដូរបាយម្ហូបអាហារសម្រាប់ភ្ញៀវជាតិ និងភ្ញៀវអន្តរជាតិក្នុងតម្លៃខ្ពស់ ដូចជា ម្អូបសត្វព្រៃមួយចាន១៥ដុល្លារ ស្មើលុយខ្មែរ៦ម៉ឺនរៀល ចំណែកភេសជ្ជៈគ្រឿងកំប៉ុងមានតម្លៃជាធម្មតា។ បុរសរូបនេះបានបញ្ជាក់ថា កាលពីឆ្នាំ២០១៩ សម្បូភ្ញៀវជាតិ និងភ្ញៀវអន្តរជាតិមកលេងកម្សាន្តមិនក្រោម៣០០ទៅ២០០នាក់ក្នុងមួយថ្ងៃ តែដើមឆ្នាំ២០២០ មានភ្ញៀវជាតិតែបន្តិចបន្តួចប៉ុណ្ណោះ។
បើតាមលោកស្រី ធិននី មុនីរស្មី ប្រធានមន្ទីរទេសចរណ៍ខេត្តឧត្តរមានជ័យ នៅរៀលថ្ងៃទី៥ខែមករានេះបានឱ្យដឹងថា តំបន់ទេសចរណ៍ធម្មជាតិដីដុះរលុះធំ ក្រុមអាជ្ញាធរក្រុងសំរោងរួមនឹងមន្ទីរទេសចរណ៍ខេត្ត នឹងមានគំរោងរៀបចំធ្វើការអភិវឌ្ឍន៍ឆាប់ៗដ៏ខ្លីខាងមុននេះផងដែរ ។ ដោយឡែកមានការពាក់ព័ន្ធទៅនឹងក្រុមអាជីវករលក់ដូរនៅទីនោះ សម្រាប់ទទួលភ្ញៀវដែលតម្លៃមិនអាចទទួលយកបាននោះ លោកស្រីនឹងចុះទៅធ្វើការអប់រុំបន្តទៀត៕ (កែសម្រួលដោយ ៖ បុប្ផា)
ចែករំលែកព័តមាននេះ