ប្រទេសកូរ៉េទាំង២ ៖ ប្រធានាធិបតីកូរ៉េខាងត្បូងលោក MOON JAE IN កាលពីថ្ងៃទី៧មករាសម្ដែងពីបំណងរបស់លោក ចង់ឲ្យកូរ៉េទាំង២ធ្វើការខិតខំប្រឹងប្រែងរួម ដើម្បីបង្កើតបណ្ដាលក្ខខណ្ឌអនុគ្រោះ សម្រាប់ទស្សនកិច្ចមួយរបស់មេដឹកនាំកូរ៉េខាងជើង លោកគីមជុងអ៊ុននៅកូរ៉េខាងត្បូង ដូចការព្រមព្រៀងគ្នា។
ក្នុងសុន្ទរកថាសម្រាប់ឆ្នាំថ្មីលោកMOONអះអាងជាថ្មី ពីការសន្យារបស់រដ្ឋាភិបាលលោកធ្វើការខិតខំប្រឹងប្រែង សម្រាប់ស្ដារឡើងវិញបណ្ដាគម្រោងអន្តរកូរ៉េសំខាន់ៗ ដូចជាគម្រោងប៊ុកឧស្សាហកម្មកាអឺសុងនិងគម្រោងទេសចរណ៍នៅភ្នំKUMGANG ព្រមទាំងគម្រោងសម្រាប់ភ្ជាប់ផ្លួវថ្នល់និងផ្លូវដែកកាត់ព្រំដែនជាដើម។ កិច្ចខិតខំប្រឹងប្រែងទាំងនេះរហូតមកទល់បច្ចុប្បន្ន សម្រេចបានការរីកចម្រើនតិចតួច ដោយសារកូរ៉េខាងត្បូងត្រូវគោរពបណ្ដាទណ្ឌកម្មរបស់ក្រុមប្រឹក្សាសន្តិសុខអ.ស.ប ប្រឆាំងក្រុងព្យុងយ៉ាង។
ក្នុងសុន្ទរកថាឯវិមានប្រធានាធិបតី ហើយផ្សាយតាមទូរទស្សន៍ លោកMOONគូសបញ្ជាក់ថា ខ្ញុំចង់ឲ្យកូរ៉េខាងត្បូងនិងកូរ៉េខាងជើង ធ្វើការរួមគ្នាបង្កើតបណ្ដាលក្ខខណ្ឌសម្រាប់ទស្សនកិច្ចមួយរបស់លោកគីមជុងអ៊ុន ឲ្យបានឆាប់តាមដែលអាចធ្វើទៅបាន។ លោកក៏ស្នើផងដែរឲ្យមានការពិភាក្សាគ្នាដើម្បីបង្កើតក្រុមរួមតែមួយ សម្រាប់ចូលរួមក្នុងការប្រកួតកីឡាអូឡាំពិកនៅក្រុងតូក្យូ ដែលនឹងប្រព្រឹត្តទៅនារដូវក្ដៅខាងមុខ ហើយហែក្បួនរួមគ្នាក្នុងពិធីបើកការប្រកួតកីឡានោះ។ លោកក៏ស្នើចាប់ផ្ដើមពិភាក្សាគ្នា ស្ដីពីកិច្ចសហប្រតិបត្តិការអន្តរកូរ៉េ ដោយលោកលើកឡើងថា ខ្ញុំយល់ថាលោកគីមជុងអ៊ុនក៏មានឆន្ទៈដូចគ្នានេះដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ