អាមេរិក គឺជាមហាអំណាចសេដ្ឋកិច្ច និងយោធានៅក្នុងពិភពលោកនេះ ។ អ៊ីរ៉ងគំរាមវាយប្រហារអាមេរិក ប៉ុន្តែវានឹងជាជម្រើសដ៏គ្រោះថ្នាក់សម្រាប់ប្រទេសមួយនេះ បើសិនជាសងសឹកអាមេរិកដោយសារតែវាអាចនឹងធ្វើអោយក្លាយជាហេតុផលថ្មីសម្រាប់អាមេរិកវាយប្រហារមកលើអ៊ីរ៉ង់កាន់តែធ្ងន់ ។ យោងតាមឯកសារបរទេសមួយដែលកោះសន្តិភាពទទួលបាននោះបង្ហាញថា អាមេរិកមានកម្លាំងយោធាខ្លាំងជាងអ៊ីរ៉ង់ដល់ទៅជាង១១៣ដង បើគិតតាមថវិកាសម្រាប់វិស័យការពារជាតិ ។
អាមេរិកមានលុយសម្រាប់ផ្នែកការពារជាតិចំនួនរហូតដល់ ៧១៦ ០០០ លានដុល្លារ ខណៈដែលអ៊ីរ៉ង់មានថវិកាការពារជាតិត្រឹម៦៣០០ លានដុល្លារ ។ អាមេរិកមានយន្តហោះរហូតដល់១៣៣៩៨គ្រឿងដោយក្នុងនោះមានយន្តហោះចម្បាំង២៣៦២គ្រឿង ឧទ្ធម្ភាគចក្រចំនួន៥៧៦០គ្រឿង ដោយក្នុងនោះមានឧទ្ធម្ភាគចក្រប្រភេទវាយប្រហារចំនួន៩៧១គ្រឿង រថក្រោះធនប្រយុទ្ធចំនួន ៦២៨៧ គ្រឿង រថពាសដែក ៣៩២២៣ គ្រឿង កាំភ្លើងធំចំនួន ៨៦៤ គ្រឿង កាំភ្លើងបាញ់គ្រាប់រ៉ុក្កត ១០៥៦ គ្រឿង នាវាចម្បាំងចំនួន៤១៥គ្រឿង ដោយក្នុងនោះមាននាវាដឹកយន្តហោះចំនួន២៤គ្រឿង ។
ប្រទេសអាមេរិកក៏មានមានយោធាចំនួន ២១៤១ ៩០០ នាក់ផងដែរ ចំណែកអ៊ីរ៉ង់មានយោធាចំនួន ៨៧៣ ០០០នាក់ ។ ចាំមើលតទៀតថា តើជម្លោះរវាងអាមេរិក និងអ៊ីរ៉ងនឹងឆាបឆេះខ្លាំងដល់កម្រិតណា ។ បើសិនជាអ៊ីរ៉ង់ហ៊ានវាយប្រហារអាមេរិកមែននោះ អាមេរិកក៏បានព្រមានវិញថា នឹងវាយប្រហារអ៊ីរ៉ង់កាន់តែធ្ងន់ជាងមុន ។ ដូច្នេះការសងសឹកណាមួយដោយអ៊ីរ៉ង់ និងអាចធ្វើអោយអាមេរិកបើកការវាយប្រហារប្រឆាំងអ៊ីរ៉ង់កាន់តែខ្លាំង និងគ្រោះថ្នាក់ ៕
ចែករំលែកព័តមាននេះ