ខេត្តបាត់ដំបង ៖ ជនមិនស្គាល់មុខបានបន្លំចូលទៅកាច់សោរ.កលួចយកម៉ូតូសិស្សសាលា១គ្រឿង រួចជិះគេចខ្លួនដោយសុវត្ថិភាព ដែលគេប៉ាន់ស្មានអាចកើតឡើងនៅចន្លោះម៉ោង៦ទៅម៉ោង៧យប់ថ្ងៃទី០៦ មករា នៅក្នុងវិទ្យាល័យសម្ដេចឪ ស្ថិតក្នុងសង្កាត់ស្វាយប៉ោ ក្រុងបាត់ដំបង។ នេះបើយោងតាមព័ត៌មានដែលផ្ដល់ដោយសមត្ថកិច្ច។
ប្រភពព័ត៌មានបានឱ្យដឹងថា ម៉ូតូដែលត្រូវចោរចូលលួចនោះ ម៉ាកហុងដាឌ្រីមពណ៌ខ្មៅ ស៊េរីឆ្នាំ២០១៨ ពាក់ស្លាកលេខបាត់ដំបង 1AD-7575 របស់យុវសិស្សឈ្មោះលន គឹមឡេង ភេទស្រី អាយុប្រហែល១៧ឆ្នាំ ជាសិស្សវិទ្យាល័យសម្ដេចឪ ។ ប្រភពដដែលបានបញ្ជាក់ថា ជនសង្ស័យបានបន្លំចូលលួចយកម៉ូតូនោះដល់ក្នុងវិទ្យាល័យ ខណ:ដែលនាងកំពុងរៀនគួរនៅក្នុងថ្នាក់ លុះចប់ម៉ោងរៀនដើរចេញមកមិនឃើញម៉ូតូក៏មានការភ្ញាក់ផ្អើលតែម្ដង។
បើតាមសាច់ញាតិជនរងគ្រោះបាននិយាយថា ដំបូងនាងគឹមឡេង បានយកម៉ូតូទៅផ្ញើនៅកន្លែងទទូលផ្ញើម៉ូតូនៅក្នុងវិទ្យាល័យ ដែលកន្លែងផ្ញើនោះបិទត្រិមម៉ោង៦ល្ងាច។ ប្រភពនេះបានបន្តថា ដោយសារកន្លែងផ្ញើុម៉ូតូដល់ម៉ោងបិទ ហើយនាងត្រូវរៀនគួរបន្ត១ម៉ោងទៀត ទើបនាងអូសម៉ូតូពីកន្លែងផ្ញើមកទុកនៅខាងមុខថ្នាក់រៀនតបស់នាង ។ ប៉ុន្តែរហូតដល់ម៉ោង៧យប់ពេលនាងចេញពីបន្ទប់រៀន ក៏ស្រាប់តែបាត់ម៉ូតូពីមុខថ្នាក់ ហើយក៏មានការភ្ញាក់ផ្អើលតែម្ដង។
សាច់ញាតិជនរងគ្រោះ បានបញ្ជាក់ថា បន្ទាប់ពីបាត់ម៉ូតូភ្លាម គាត់បានទៅកាន់អធិការក្រុងបាត់ដំបង ទាំងយប់ដើម្បីប្ដឹងសមត្ថកិច្ចឱ្យជួយអន្តរាគមន៍ តែត្រូវខកបំណងដោយសារមន្ត្រីនៅទីនោះ មិនទទូលបណ្ដឹង ហើយប្រាប់គាត់ឱ្យរង់ចាំប្ដឹងនៅព្រឹកថ្ងៃទី០៧ មករា វិញ ហើយគាត់ក៏ត្រឡប់ទៅផ្ទះទាំងអស់សង្ឃឹម។
ស្របពេលដែលអំពើចោរកម្ម បាននិងកំពុងកើតឡើងផ្ទូនៗជាច្រើនករណីនៅក្នុងស្រុកសង្កែ និងនៅក្នុងក្រុងបាត់ដំបង ដែលធ្វើឱ្យសមត្ថកិច្ចកំពុងវិលក្បុង មិនទាន់មានតម្រុយពីមុខសញ្ញាណាមួយផង នៅព្រឹកថ្ងៃទី០៧ មករា ស្រាប់តែសមត្ថកិច្ចស្រុកបាណន់ បានរាយការណ៍ថា គេបានប្រទះឃើញស្លាកលេខម៉ូតូចំនួន០២ និងកូនសោជាច្រើនប្រភេទច្រកក្នុងថង់ប្លាស្ទិក ត្រូវគេយកទៅប្លុងចោលក្បែរផ្លូវមួយកន្លែង។ ស្លាកលេខម៉ូតូទាំង០២ ដែលគេប្រទះឃើញនោះ មានលេខ «បាត់ដំបង 1AC-2358 និងព្រៃវែង 1Q-3212» ដែលច្រកក្នុងថង់ប្លាស្ទិកជាមួយកូនសោដង្កាប់ និងទួលណឺវីសជាច្រើនទៀត ដែលគេសង្ស័យអាចជារបស់ពួកចោរយកទៅប្លុងចោល ក្រោយធ្វើសកម្មភាព។
លោកជេត វណ្ណនី ស្នងការរងខេត្តបានមានប្រសាសន៍ថា ក្រោយពីហេតុការណ៍ខាងលើ បានកើតឡើង យើងបានចាត់ឱ្យកម្លាំងជំនាញចុះធ្វើការងារនេះយ៉ាងដុតដៃដុតជើងបំផុត។ ចំពោះស្លាកលេខម៉ូតូចំនួន២ ដែលគេប្រទះឃើញប្លុងចោលនៅស្រុកបាណន់នោះ គឺមិនមែនស្លាកលេខម៉ូតូដែលបាត់នៅវិទ្យាល័យសម្ដេចឪទេ ។ ប៉ុន្តែយ៉ាងណា កម្លាំងជំនាញកំពុងធ្វើការស្រាវជ្រាវលើករណីទាំងនេះហើយ។
ចែករំលែកព័តមាននេះ