រាជធានីភ្នំពេញ ៖ សំណង់ផ្ទះជួលធ្វើពីឈើប្រក់ស័ង្កសី ស្ថិតនៅជាប់ៗគ្នាក្នុងតំបន់សំណង់មិនរៀបរយ នៅតាមបណ្តោយផ្លូវរថភ្លើង ត្រូវបានអគ្គិភ័យឆាបឆេះយ៉ាងសន្ធៅសន្ធៅអស់រយៈពេលប្រមាណជាង២ម៉ោង បណ្តាលឱ្យផ្ទះចំនួន១៥ល្វែង ស្មើ១៦០បន្ទប់រងការខូចខាតទាំងស្រុង ។ ទោះបីជាយ៉ាងណា…
រាជធានីភ្នំពេញ ៖ សំណង់ផ្ទះជួលធ្វើពីឈើប្រក់ស័ង្កសី ស្ថិតនៅជាប់ៗគ្នាក្នុងតំបន់សំណង់មិនរៀបរយ នៅតាមបណ្តោយផ្លូវរថភ្លើង ត្រូវបានអគ្គិភ័យឆាបឆេះយ៉ាងសន្ធៅសន្ធៅអស់រយៈពេលប្រមាណជាង២ម៉ោង បណ្តាលឱ្យផ្ទះចំនួន១៥ល្វែង ស្មើ១៦០បន្ទប់រងការខូចខាតទាំងស្រុង ។ ទោះបីជាយ៉ាងណា ពុំបណ្តាលឱ្យមនុស្សរងរបួសឬគ្រោះថ្នាក់ដល់អាយុជីវីតឡើយ ។
ហេតុការណ៍នេះបង្កឲ្យមានការភ្ញាក់ផ្អើលកាលពីម៉ោង១និង៣០នាទីរំលងអធ្រាត្រឈានចូលថ្ងៃទី៦ ខែមករា ឆ្នាំ២០២០ នៅចំណុចសំណង់ពោពេញដោយស្ថានភាពស្មុគស្មាញ ស្ថិតនៅតាមបណ្តោយផ្លូវរថភ្លើង និងមាត់ប្រឡាយបាក់ទូក ក្នុងក្រុមទី១ ភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ ។
ទាក់ទិនការកើតមានអគ្គិភ័យនេះគេពុំដឹងថា បណ្តាលមកពីមូលហេតុអ្វីឡើយ ។ តាមនគរបាលមូលដ្ឋានបានឱ្យដឹងថា អគ្គិភ័យនេះបានឆាបឆេះចេញពីបន្ទប់ជួលធ្វើអំពីឈើប្រក់ស័ង្កសី ស្ថិតនៅជាន់ទី១ផ្នែកខាងក្រោយផ្ទះថ្មលេខ០៣៧I ដែលមានម្ចាស់ឈ្មោះ ហេង ស្រូយ ភេទប្រុស អាយុប្រមាណ៦០ឆ្នាំ ជាមន្ត្រីនគរបាលចូលនិវត្តន៍ ។ តាមព័ត៌មានឱ្យដឹងថា នៅមុនពេលកើតហេតុខណៈពេល ដែលគ្រប់គ្នាកំពុងតែដេកលង់លក់ ស្រាប់តែភ្លើងបានឆាបឆេះ ចេញពីផ្ទះរបស់មន្ត្រីនគរបាល ដែលបានធ្វើជាបន្ទប់ជួលឱ្យក្រុមយុវជនស្ទាវស្នាក់នៅ ។
ដោយសារតែតំបន់នោះផ្ទះធ្វើពីឈើប្រក់ស័ង្កសី និងខ្លះទៀតបានសង់ជាប់នឹងមាត់ប្រឡាយ ភ្លើងបានឆាបឆេះយ៉ាងសន្ធោសន្ធៅរាលដាលយ៉ាងឆាប់រហ័ស ។ ខណៈនោះគេបានឮស្នូរតែសម្រែកស្រែកប្រកូកប្រកាស់ ហៅបងប្អូនកូនចៅឱ្យក្រោក និងនាំគ្នារត់ខ្លះជញ្ជូនអីវ៉ាន់ចេញ តែដោយសារតែតំបន់នោះ មានផ្លូវតូចចង្អៀតម្នាក់ៗមិនអាចយករបស់របរចេញបានស្រួលឡើយ ។ ហើយខ្លះទៀតបានយកចេញមកក្រៅ ត្រូវបានជនឱកាសនិយមលួចយកបន្តទៀតក៏អស់ច្រើនដែរ ។
តាមព័ត៌មានអោយដឹងទៀតថា ភ្លាមៗ នគរបាលនិងអាជ្ញាធរ ក៏បានចុះទៅដល់កន្លែងកើតហេតុ ទាក់ទងហៅរថយន្តពន្លត់អគ្គិភ័យជាច្រើនគ្រឿងទៅអន្តរាគមន៍ ។ នៅក្នុងហេតុការណ៍នេះដែរគេឃើញវត្តមានលោក ជា ពិសី អភិបាលខណ្ឌឫស្សីកែវ ក៏បានចាត់ចែងក្នុងការជួយអន្តរាគមន៍បាញ់ពន្លត់ផងដែរ ។
នគរបាលការិយាល័យបង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញបានឱ្យដឹងថា នៅក្នុងហេតុការណ៍រថយន្តពន្លត់អគ្គិភ័យរបស់ស្នងការដ្ឋានរាជធានីភ្នំពេញ កងរាជអាវុធហត្ថរាជធានី ទីក្រុងកោះពេជ្រ ក្រុមហ៊ុនOCIC ទីក្រុងជ្រោយចង្វា ក្រុមហ៊ុនស្រាបៀរកម្ពុជា ក្រសួងមហាផ្ទៃ និងរថយន្តរបស់សាលាខណ្ឌឫស្សីកែវ សរុបទាំងអស់ចំនួន៤១គ្រឿង បានទៅអន្តរាគមន៍បាញ់ពន្លត់រហូតដល់ម៉ោងប្រមាណ៣ទៀបភ្លឺ ភ្លើង បានរលត់ជាស្ថាពរ ។ មន្ត្រីនគរបាលបានឱ្យដឹងទៀតថា លំនៅឋានដែលជាផ្ទះជួលចំនួន១៥ល្វែង ស្មើនឹងចំនួន១៦០បន្ទប់ត្រូវភ្លើងឆេះទាំងស្រុងហើយប្រជាពលរដ្ឋចំនួន ១៦០គ្រួរសារគ្មានទីជម្រក អ្នកខ្លះនៅសល់តែមួយចង្កេះ ។
ការកើតមានអគ្គិភ័យនេះនគរបាលពុំបានឱ្យដឹងពីមូលហេតុអ្វីច្បាស់ទេ រង់ចាំការស្រាវជ្រាវសិន ។ ទាក់ទិនមូលហេតុ គេមានការសង្ស័យ ថា បណ្តាលមកពីក្រុមយុវជនប្រើប្រាស់គ្រឿងញៀនព្រោះបន្ទប់ដើមភ្លើងកន្លងមក នៅពេលយប់គេពុំដែលឃើញដេកពួននោះទេ ។ ទោះបីជាយ៉ាងណា នគរបាលកំពុងតែស្រាវ ជ្រាវ ។ បន្ទាប់ពីកើតមានអគ្គិភ័យ នៅព្រឹកថ្ងៃទី៦ មករា នគរបាលក៏បានចុះទៅស្រាវជ្រាវរកពីមូលហេតុហើយ នគរបាលនិងអាជ្ញាធរមូលដ្ឋានក៏បានចុះទៅស្រង់ស្ថិតិប្រជាពលរដ្ឋរងគ្រោះដើម្បីនាំអំណោយកាកបាទក្រហមកម្ពុជា យកទៅចែកជួនដើម្បីជួយសម្រួលដល់ការលំបាករបស់បងប្អូនដែលកំពុងតែរងគ្រោះ ៕
ចែករំលែកព័តមាននេះ