ខេត្តបន្ទាយមានជ័យ ៖ ខេត្តបន្ទាយមានជ័យមានជនរងគ្រោះចំនួន៧នាក់ដែលរងគ្រោះដោយឧប្បត្តិហេតុរលំបាក់អគារសង្កត់ បណ្តាលឱ្យបាត់បង់ជីវិតចំនួន៤នាក់ និងរងរបួសធ្ងន់ចំនួន៣នាក់ ហើយត្រូវបានសាខាកាកបាទក្រហមកម្ពុជាខេត្តនាំយកអំណោយចែកជូនគ្រួសារជនរងគ្រោះកាលពីថ្ងៃទី៦ ខែមករា ឆ្នាំ២០២០ ស្ថិតក្នុងភូមិដងត្រាង ឃុំសឿ…
ខេត្តបន្ទាយមានជ័យ ៖ ខេត្តបន្ទាយមានជ័យមានជនរងគ្រោះចំនួន៧នាក់ដែលរងគ្រោះដោយឧប្បត្តិហេតុរលំបាក់អគារសង្កត់ បណ្តាលឱ្យបាត់បង់ជីវិតចំនួន៤នាក់ និងរងរបួសធ្ងន់ចំនួន៣នាក់ ហើយត្រូវបានសាខាកាកបាទក្រហមកម្ពុជាខេត្តនាំយកអំណោយចែកជូនគ្រួសារជនរងគ្រោះកាលពីថ្ងៃទី៦ ខែមករា ឆ្នាំ២០២០ ស្ថិតក្នុងភូមិដងត្រាង ឃុំសឿ ស្រុកមង្គលបូរី។
លោក អ៊ុំ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបានសម្តែងការសោស្តាយ និងចូលរួមរំលែកទុក្ខដល់គ្រួសារជនរងគ្រោះដោយអគារកម្ពស់៧ជាន់រលំបាក់សង្កត់ បណ្តាលឱ្យរងគ្រោះចំនួន៧នាក់ ក្នុងនោះមានជនរងគ្រោះចំនួន៤នាក់ត្រូវបានបាត់បង់ជីវិតក្រោមអគារ និងជនរងគ្រោះចំនួន៣នាក់ទៀត ត្រូវបានរងរបួសធ្ងន់ កំពុងសំរាកព្យាបាលនៅមន្ទីរពេទ្យ ដែលឧប្បត្តិហេតុនេះបានកើតឡើងកាលពីថ្ងៃទី៣ ខែមករា ឆ្នាំ២០២០ នៅខេត្តកែប។
លោកអ៊ុំ រាត្រី បានបញ្ជាក់ថា ជនរងគ្រោះដែលបាត់បង់ជីវិតទាំង៤នាក់នោះគឺជាបងប្អូនបង្កើតនឹងគ្នា រួមមាន ១-ឈ្មោះ ឆន ផ្លយ ភេទប្រុស អាយុ២៤ឆ្នាំ ២-ឈ្មោះ ឆន ចាន់ណា ភេទស្រី អាយុ២៦ឆ្នាំ ៣-ឈ្មោះ ពេញ សុផល ភេទប្រុស អាយុ១៥ឆ្នាំ ៤-ឈ្មោះ ពេញ សាវី ភេទប្រុស អាយុ៣០ឆ្នាំ ។ ជនរងគ្រោះទាំង៤នាក់រស់នៅភូមិដងត្រាង ឃុំសឿ ស្រុកមង្គលបូរី។
លោក អ៊ុំ រាត្រី បានបញ្ជាក់ថា ដើម្បីជាការចូលរួមរំលែកទុក្ខ ក៏ដូចជាការសួរសុខទុក្ខដល់ក្រុមគ្រួសារជនរងគ្រោះ ដោយអគាររលំសង្កត់នៅខេត្តកែប គឺសាខាកាកបាទក្រហមកម្ពុជាខេត្តបន្ទាយមានជ័យ ក៏បាននាំយកអំណោយផ្តល់ជូនរួមមានអង្ករចំនួន២០០គីឡូក្រាម ត្រីខ៨០កំប៉ុង មី៨កេស ទឹកស៊ីអ៊ីវនិងទឹកត្រីចំនួន២៤ដប ទឹកក្រូចចំនួន១៥កេស ទឹកបរិសុទ្ធចំនួន១៥កេស ថវិកាចំនួន២លានរៀល និងថវិកាចំនួន៥លានរៀលចូលរួមពីសមាជិកព្រឹទ្ធសភា និងរដ្ឋសភា រដ្ឋបាលសាលាខេត្ត និងស្រុក-ឃុំបានចូលរួម។
ក្នុងនាមក្រុមគ្រួសារជនរងគ្រោះសូមថ្លែងអំណរគុណចំពោះសម្តេចតេជោ ហ៊ុន សែន នាយករដ្ឋមន្ត្រី និង
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងលោកឧកញ៉ា ហ៊ុន តូ ក្មួយសម្តេចតេជោ ដែលបានឧបត្ថម្ភថវិកា ទីណាមានទុក្ខលំបាកគឺមានសម្តេចទាំងពីរ ជាក់ស្តែងក្រោយគ្រោះថ្នាក់រលំបាក់អគារមានវត្តមានសម្តេចតេជោ ហ៊ុន សែន ចុះជួយអន្តរាគមន៍ដល់អ្នករងគ្រោះផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ