ខេត្តបាត់ដំបង៖ នៅពេលដែលកម្លាំងសមត្ថកិច្ចនៅតែមិនទាន់មានតម្រុយ ឬបង្ក្រាបបាននូវមុខសញ្ញាក្រុមចោរ«ប្លន់ឬគាស់ទម្លុះទម្លាយលំនៅឋាន» ដែលបានកើតឡើងជាបន្តបន្ទាប់ កាលពីពេលថ្មីៗកន្លងទៅនេះ នៅក្នុងស្រុកសង្កែ គឺអាចចាត់ទុកជា«ឱកាស»ដល់ពួកក្រុមសង្គមងងិតបង្កើនសកម្មភាពបទល្មើសដដែលៗយ៉ាងគគ្លើនរបស់ពួកគេ ដោយគ្មានញញើតច្បាប់ ឬក្រែងរអែងចិត្តសមត្ថកិច្ចឡើយ ហើយអ្នកដែលប្រឈមនឹងបញ្ហាអសន្តិសុខនេះ គឺ«ប្រជាពលរដ្ឋស្ទើរគ្រប់ទីកន្លែង»។
ជាក់ស្ដែង ករណីគាស់ទម្លុះទម្លាយដ៏ធំដុំនៅក្នុងហាងលក់ទូរស័ព្ទមួយកន្លែង ដែលគេសន្និដ្ឋានអាចកើតឡើង នៅចន្លោះពីម៉ោង១ទៅម៉ោង២និង៣០នាទីរំលងអធ្រាត្រឈានចូលថ្ងៃទី០៦ មករា ស្ថិតនៅក្នុងភូមិអន្លង់វិល ឃុំអន្លង់វិល ស្រុកសង្កែ ដែលម្ចាស់ហាងអះអាងថា «ចោរបានចូលលួចយកទូរស័ព្ទដៃ ចម្រុះគ្រប់ម៉ាកអស់ជិត៨០គ្រឿង»។ មន្ត្រីអធិការស្រុកសង្កែ បានឲ្យដឹងតាមរយៈរបាយការណ៍បឋមថា ម្ចាស់ហាងលក់ទូរស័ព្ទនោះ ឈ្មោះ ភួយ លាងអេង រស់នៅចំណុចកើតហេតុខាងលើ។
របាយការណ៍ដដែលបានឲ្យដឹងទៀតថា គេមិនបានដឹងពីចំនួននៃជនសង្ស័យនោះ ហើយក៏មិនស្គាល់អត្តសញ្ញាណដែរ។ គេគ្រាន់តែដឹងថា ជននោះបានប្រើប្រាស់កន្ត្រៃកាត់ស័ង្កសី ទ្វារខាងមុខមួយប្រឡោះ រួចលូនចូលទៅក្នុងផ្ទះ ប្រមូលយកទូរស័ព្ទពីក្នុងទូរកញ្ចក់អស់គ្មានសល់ រួចលូចចេញក្រៅវិញគេចខ្លួនបាត់ដោយសុវត្ថិភាព ខណៈម្ចាស់ផ្ទះដេកលក់នៅខាងក្នុង។ បើតាមម្ចាស់ផ្ទះបានប្រាប់សមត្ថកិច្ចថា ទូរស័ព្ទដែលចោរលួចយកទៅនោះ មានគ្រប់ម៉ាកអស់សរុបជិត៨០គ្រឿង។
ម្ចាស់ហាងលក់ទូរស័ព្ទ ឈ្មោះភួយ លាងអេង បានរៀបរាប់ប្រាប់សមត្ថកិច្ចថា គាត់មិនបានដឹងថា ចោរមានបក្សពួកប៉ុន្មាននាក់ទេ ព្រោះពេលដែលចោរចូលលួចនោះ គាត់ដេកលក់នៅបន្ទប់ខាងក្រោយ។ គាត់និយាយថា គាត់សង្ស័យហេតុការណ៍នេះ បានកើតឡើងនៅចន្លោះពីម៉ោង១ ទៅម៉ោងជាង២រំលងអធ្រាត្រឈានចូលថ្ងៃទី០៦ មករា តែគាត់បានដឹងនៅវេលាម៉ោង៤ទៀបភ្លឺ ពេលគាត់ភ្ញាក់ពីដំណេក មករៀបចំកន្លែងលក់ដូរដូចធម្មតា ទើបមានការភ្ញាក់ផ្អើលតែម្ដង។ បើតាមការប៉ាន់ប្រមាណ ទូរស័ព្ទដែលបាត់បង់សរុបប្រហែលជិត៨០គ្រឿង ដែលមានម៉ាកចម្រុះ និងមានចាស់ មានថ្មី។
ដោយឡែក នៅឯកន្លែងកើតហេតុវិញ បើតាមម្ចាស់ផ្ទះ ក៏ដូចសមត្ថកិច្ច ដែលបានចុះពិនិត្យផ្ទាល់បាននិយាយថា គេឃើញនៅក្បែរទ្វារផ្ទះ (ជិតកន្លែងកាត់ទ្វារ) មានស្លាកស្នាម ដែលគេអាចសន្និដ្ឋានថា ជនសង្ស័យបានពូនសម្ងំនៅទីនោះ មុនពេលធ្វើសកម្មភាព ហើយជនសង្ស័យទំនងមិនមានគ្នាច្រើនទេ ។ ម្ចាស់ផ្ទះ និងមន្ត្រីជំនាញ បានសន្និដ្ឋានបែបនេះ ពីព្រោះពេលចូលដល់ក្នុងផ្ទះ ជនរសង្ស័យបានរកឃើញសោរទ្វារផ្ទះសម្រាប់ចាក់សោរបើកទ្វារទៀតផង រីឯម៉ូតូក៏នៅក្នុងផ្ទះដែរ។ ដូច្នេះ បើជនដៃដល់មានបក្សពួក ប្រហែលមិនមែនយកតែទូរស័ព្ទប៉ុណ្ណោះទេ គឺអាចយកទាំងម៉ូតូឬសម្ភារៈមានតំលៃដទៃទៀតអស់គ្មានសល់ជាមិនខាន។
គួរកត់សម្គាល់ផងដែរថា អំពើចោរកម្មដែលប្រព្រឹត្តដោយជនមិនស្គាល់មុខ ក្នុងបទល្មើសស្រដៀងគ្នាដដែលៗ នៅក្នុងស្រុកសង្កែនេះ ហាក់បានកើតឡើងជាញឹកញាប់បំផុត ខណៈសមត្ថកិច្ចស្រុកនេះ ហាក់នៅទ្រឹង មិនទាន់អាចបំបែកសំណុំរឿងដដែលៗនេះបាន សូម្បីតែតម្រុយនៃមុខសញ្ញាជនសង្ស័យ ក៏ទំនងជាគ្មានដែរ ។ ជាក់ស្ដែង កាលពីព្រឹកថ្ងៃទី២៦ ធ្នូ ២០១៩ កន្លងទៅថ្មីៗនេះ មានជនមិនស្គាល់មុខ២នាក់ បានជិះម៉ូតូទៅគប់«គ្រាប់បែកផាវ» ទាំងព្រលឹមអុរចំនួន២គ្រាប់ចូលទៅក្នុងហាងលក់ទូរស័ព្ទដៃ ដែលទើបបើកលក់ថ្មីថ្មោងមួយកន្លែង នៅចំណុចភូមិជំនីក ឃុំអន្លង់វិល ស្រុកសង្កែ រួចជនម្នាក់ស្ទុះទៅវាយបំបែកកញ្ចក់ទូរ«ប្លន់»យកទូរស័ព្ទស៊េរីអន់ៗបានចំនួន០៥គ្រឿង រួចជិះម៉ូតូគេចខ្លួនដោយសុវងត្ថិភាព មិនរំខានដល់សមត្ថកិច្ចមូលដ្ឋានឡើយ។
នេះមិនទាន់រំលឹកដល់ករណីគាស់ទំលុះទំលាយលំនៅឋានប្រជាពលរដ្ឋ នៅតាមមូលដ្ឋាន ក្នុងស្រុកសង្កែ នេះ ទាំងយប់ទាំងថ្ងៃនាពេលកន្លងមក លួចយកទ្រព្យសម្បត្តិ លុយកាក់ និង គ្រឿងអល័ង្កាអស់រាប់ម៉ឺនដុល្លារនៅឡើយទេ។ ពាក់ព័ន្ធនឹងបទល្មើសដែលបានកើតឡើង ជាបន្តបន្ទាប់នៅក្នុងស្រុកសង្កែ នាពេលកន្លងមក.. គិតត្រឹមថ្ងៃកើតហេតុជាថ្មីនាពេលនេះ បើតាមមន្ត្រីការិយាល័យជំនាញ នៃស្នងការខេត្ត បានបង្ហើបឲ្យដឹងថា «ការស៊ើបអង្កេតរបស់មន្ត្រីជំនាញ នៃអធិការនគរបាលស្រុកសង្កែ ហាក់គ្មានតម្រុយអំពីមុខសញ្ញាជនសង្ស័យណាម្នាក់ ដែលពាក់ព័ន្ធនឹងអំពើចោរកម្មដែលបានកើតឡើងនាពេលកន្លងមកនៅឡើយទេ ខណៈបទល្មើសដដែលៗនេះ បាននិងកំពុងកើតឡើងដ៏គួរឲ្យព្រួយបារម្ភ»។
យ៉ាងណាក៏ដោយ ជុំវិញករណីទាំងនេះ លោកឧត្តមសេនីយ៍ត្រី ជេត វណ្ណនី ស្នងការរងខេត្ត ដែលបានចុះអន្តរាគមន៍ដល់កន្លែងកើតហេតុ បានមានប្រសាសន៍ថា « ពេលនេះ ទាំងកម្លាំងអធិការស្រុក ទាំងកម្លាំងការិយាល័យជំនាញនៃស្នងការខេត្ត កំពុងចុះពិនិត្យលើទីតាំងកើតហេតុ ហើយនឹងកំពុងសួរនាំម្ចាស់ផ្ទះរងគ្រោះ»។ ប៉ុន្តែលោកស្នងការរងបានបញ្ជាក់ថា យើងមិនទាន់ហ៊ានធ្វើការសន្និដ្ឋានបែបណានៅឡើយទេ ចំពោះមុខសញ្ញាជនប្រព្រឹត្ត ព្រោះពេលនេះកម្លាំងជំនាញ កំពុងតែមមាញឹកយ៉ាងខ្លាំង ក្នុងការស៊ើប
អង្កេត ៕
ចែករំលែកព័តមាននេះ