ទារកភ្លោះ3និងទារិកាភ្លោះ3 ទទួលអំណោយឧបត្ថម្ភពីសម្តេចទាំង2
រាជធានីភ្នំពេញ ៖ លោក សេង ទៀង ជំនួយការផ្ទាល់សម្ដេចតេជោនាយករដ្ឋមន្ត្រី ហុ៊ន សែន និងសម្ដេចកិត្តិព្រឹទ្ធបណ្ឌិត ប៊ុន…
រាជធានីភ្នំពេញ ៖ លោក សេង ទៀង ជំនួយការផ្ទាល់សម្ដេចតេជោនាយករដ្ឋមន្ត្រី ហុ៊ន សែន និងសម្ដេចកិត្តិព្រឹទ្ធបណ្ឌិត ប៊ុន…
រាជធានីភ្នំពេញ ៖ លោក សេង ទៀង ជំនួយការផ្ទាល់សម្ដេចតេជោនាយករដ្ឋមន្ត្រី ហុ៊ន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន កាលពីព្រឹកថ្ងៃទី៣ ខែមករា ឆ្នាំ២០២០ បាននាំយកអំណោយសប្បុរសធម៌របស់សម្ដេចតេជោនាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិតទៅផ្ដល់ជូនដល់ក្រុមគ្រួសារកូនភ្លោះ៣ចំនួន២គ្រួសារដែលសម្តេចចាត់ទុកថាជាចៅៗរបស់សម្តេច ។
អំណោយដែលនាំយកទៅផ្តល់ជូននោះ ក្នុងមួយគ្រួសារៗទទួលបានប្រាក់៥លានរៀល អង្ករ២០០គីឡូក្រាម ទឹកដោះគោម្សៅឌុយម៉ិច២៤ កំប៉ុងធំ ស្ករស៥គីឡូក្រាម សារុង២ និងក្រមា២ ។ គ្រួសារទី១ មានទីលំនៅក្នុងភូមិព្រែហូរ សង្កាត់ព្រែកហូរ ខេត្តកណ្តាល ហើយទារកភ្លោះ៣ ដែលទទួលបានអំណោយឧបត្ថម្ភពីសម្តេចទាំង២នៅពេលនេះ ជាកូនលើកទី៣ ដែលឪពុកឈ្មោះ គួយ សូដា អាយុ៣១ឆ្នាំ ជាកសិករ ម្តាយឈ្មោះ ឡូត ស្រីមិញអាយុ២៩ឆ្នាំ ជាកម្មការិនីរោងចក្រ ។ ទារកភ្លោះទាំង៣នាក់នេះ កើត
កាលពីថ្ងៃទី២៣ ខែធ្នូ ឆ្នាំ២០១៩ នៅមន្ទីរពេទ្យមិត្តភាពខ្មែរ-សូវៀត។
នៅចំពោះមុខក្រុមគ្រូពេទ្យ និងឪពុកម្តាយកូនភ្លោះ៣នេះ លោក សេង ទៀង បានពាំនាំនូវការផ្តាំផ្ញើសាកសួរសុខទុក្ខដោយក្តីនឹករឭកពីសំណាក់សម្តេចតេជោនិងសម្តេចកិត្តិព្រឹទ្ធបណ្ឌិតដែលជានិច្ចកាលសម្តេចទាំង២ តែងតែមានការនឹករឭកចំពោះប្រជាពលរដ្ឋនៅគ្រប់ទីកន្លែងទាំងអស់ក្នុងប្រទេសកម្ពុជា ។ លោកមានប្រសាសន៍ថា ចាប់តាំងពីឆ្នាំ១៩៩៩រហូតមកដល់បច្ចុប្បន្ន មានគ្រួសារប្រសូតទារកភ្លោះ២នាក់ឬ៤នាក់ ចំនួន៣៥៥គ្រួសារហើយ បានទទួលអំណោយឧបត្ថម្ភសប្បុរសធម៌ ពីសម្តេចតេជោនិងសម្តេចកិត្តិព្រឹទ្ធបណ្ឌិត ក្នុងការជួយទំនុកបម្រុងដល់ការលំបាកខ្វះខាតក្នុងជីវភាពរស់នៅប្រចាំថ្ងៃ ពិសេសការចិញ្ចឹមបីបាច់ទារកភ្លោះ៣នាក់ ដែលជាចៅៗរបស់សម្តេចទាំង២ ក្រោយពេលឆ្លងទន្លេរួច ។
លោកបន្តថា ចំនួនគ្រួសារទារកភ្លោះ៣នាកមានច្រើនជាងនេះទៀត ដែលសម្តេចតេជោនិងសម្តេចកិត្តិព្រឹទ្ធបណ្ឌិត បានឧបត្ថម្ភតាមរយៈតំណាងរាស្ត្រ និងក្រុមការងារចុះជួយប្រជាពលរដ្ឋនៅតាមមូលដ្ឋានភូមិ ឃុំ ស្រុក រាជធានីខេត្ត កាលពីមុនឆ្នាំ១៩៩៩ ។ លោក សេង ទៀង បន្តទៀតថា ជំនួយឧបត្ថម្ភទាំងអស់នេះ មិនមែនជាអំណោយរបស់រារដ្ឋាភិបាល អំណោយរបស់កាកបាទក្រហមកម្ពុជា ឬអំណោយរបស់គណបក្សដែលបម្រើឲ្យសកម្មភាពនយោបាយនោះទេ តែគឺជាអំណោយទានកើតចេញពីទឹកចិត្តជ្រះថ្លាប្រកបដោយការគិតគួរខ្ពស់របស់សម្តេចតេជោនិងសម្តេចកិត្តិព្រឹទ្ធបណ្ឌិត ដែលបានឈ្វេងយល់ពីការលំបាកពិតប្រាកដ ចំពោះប្រជាពលរដ្ឋដែលកើតទារកភ្លោះ៣ឬ៤នាក់ពិតប្រាកដ ។
មាតាបិតាកូនភ្លោះ៣ បានសម្តែងនូវការគោរពដឹងគុណយ៉ាងជ្រាលជ្រៅបំផុតចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ដែលបានផ្តល់នូវអំណោយឧបត្ថម្ភសប្បុរសធម៌ដល់គ្រួសារបស់ខ្លួន ដែលជួបប្រទះនូវការលំបាក ក្នុងការចិញ្ចឹមបីបាច់កូនភ្លោះ៣នាក់ ក្នុងស្ថានភាពដែលគ្រួសារ មានជីវភាពរស់នៅដ៏លំបាកនេះ ។ចំណែកគ្រួសារកូនភ្លោះ៣ទី២ កើតនៅថ្ងៃទី២៥ ខែធ្នូ ឆ្នាំ២០១៩ នៅមជ្ឈមណ្ឌលគាំពារមាតា និងទារក ហៅមន្ទីរពេទ្យជប៉ុន ស្រីទាំងបី ជាកូនលើកទី៣ដែរ ដែលឪពុកឈ្មោះ ចាប វីន អាយុ៣៦ឆ្នាំ ម្តាយឈ្មោះ ហ៊ោង សារ៉ាត អាយុ៣៣ឆ្នាំ ជាកសិករ នៅភូមិអន្លង់ធំ ឃុំព្រែកអំបិលស្រុកស្អាង ខេត្តកណ្តាល ។ ដោយសារស្ថានភាពរបស់ទារិកាមានសភាពខ្សោយ គ្រូពេទ្យបានស្អំតាមវេជ្ជសាស្ត្រសម័យទំនើប ។
អញ្ជើញទៅពិនិត្យដោយផ្ទាល់នៅមន្ទីរពេទ្យលោក សេង ទៀង និងលោកជំទាវ បានមាន ប្រសាសន៍ថ្លែងអំណរគុណក្រុមគ្រួពេទ្យនៃមជ្ឈមណ្ឌលគាំពារមាតានិងទារក ដែលបានពុះពាររាល់ការលំបាក ក្នុងការថែទាំម្តាយនិងទារក ដែលសំរាកនិងថែទាំសុខភាព ប្រកបដោយក្រមសីលធម៌ វិជ្ជាជីវៈគ្រួពេទ្យ ។ ជាមួយនឹងការថ្លែងកោតសរសើរនេះ លោកសេង ទៀង ក៏បានក្រើនរំឭកដល់មាតាបិតា ទារិកាភ្លោះទាំង២នាក់នេះ ខិតខំថែរក្សាទារិកាឲ្យមានសុខភាពល្អ ពិសេសស្តាប់តាមការណែនាំរបស់គ្រូពេទ្យ ពោលគឺនៅពេលគ្រូពេទ្យអនុញ្ញាតឲ្យចេញទៅកាន់លំនៅឋាន យើងត្រូវអនុវត្តតាម ធ្វើយ៉ាងណាឲ្យទារិកាមានសុខភាពល្អ និងកាយសម្បទារឹងមាំ ។
ដូចគ្នានឹងគ្រួសារកូនភ្លោះ៣ទី១ដែរ លោកសេង ទៀង បានឧបត្ថម្ភសម្ភារ ថវិកា ដែលជាអំណោយសប្បុរសធម៌របស់សម្តេចតេជោនិងសម្តេចកិត្តិព្រឹទ្ធបណ្ឌិត ដល់មាតាបិតាកូនភ្លោះ៣ ដែលកំពុងសម្រាកថែទាំសុខភាពនៅមជ្ឈមណ្ឌលជាតិគាំពារមាតា និងទារក ។ ជាមួយគ្នានេះ រូបលោកផ្ទាល់ និងលោកជំទាវ ក៏បានឧបត្ថម្ភថវិកាជូនដល់គ្រូពេទ្យប្រចាំការផងដែរ។ សូមបញ្ជាក់ថា នាដើមខែមករា ឆ្នាំ២០២០នេះមានគ្រួសារប្រសូតទារកភ្លោះ៣ចំនួន៣គ្រួសារហើយ ដែលទទួលបាន អំណោយឧបត្ថម្ភពីសម្តេចតេជោ និងសម្តេចកិត្តិព្រឹទ្ធបណ្ឌិត ក្នុងការជួយ សម្រាលការលំបាកក្នុងជីវភាពរស់នៅប្រចាំថ្ងៃ។ ដោយឡែក ខេត្តកណ្តាលមានគ្រួសារកូនភ្លោះ៣ចំនួន៣៣គ្រួសាររួចមកហើយ ដែលទទួលបានអំណោយឧបត្ថម្ភពីសម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ៕
ចែករំលែកព័តមាននេះ