រាជធានីភ្នំពេញ ៖ ជនជាតិចិន២ក្រុមឈ្លោះប្រកែកគ្នា រហូតឈានទៅដល់ផ្ទុះហិង្សារួចដកកាំភ្លើងខ្លីបាញ់ចំនួន៤ទៅ៥គ្រាប់ បណ្តាលឱ្យរងរបួសធ្ងន់ម្នាក់ ហើយកម្លាំងព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញបានឃាត់ខ្លួនបុរសជនជាតិចិនម្នាក់ រួមជាមួយកាំភ្លើងខ្លីចំនួន២ដើម ។
ហេតុការណ៍ខាងលើនេះបានកើតឡើងកាលពីវេលាម៉ោង២រសៀលថ្ងៃទី២ ខែមករា ឆ្នាំ២០២០ តាមបណ្តោយផ្លូវP11 ស្ថិតក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
តាមប្រភពព័ត៌មានពីសមត្ថកិច្ចបានអោយដឹងថា មុនពេលកើតហេតុ គឺមានបុរសជនជាតិចិនជាជនសង្ស័យមានគ្នា២ទៅ៣នាក់មិនស្គាល់អត្តសញ្ញាណនោះទេ ហើយក៏មិនដឹងថាធ្លាប់មានគំនុំអ្វីជាមួយជនរងគ្រោះនោះទេ ទើបបានជាឈ្លោះប្រកែកគ្នា រហូតឈានទៅដល់ជនបង្កទាញកាំភ្លើងខ្លីដកបាញ់ទៅលើជនរងគ្រោះចំនួន៤ទៅ៥គ្រាប់ បណ្តាលអោយជនរងគ្រោះមិនដឹងថាជាស្រីឬប្រុសនោះទេ បានរងរបួសហូរឈាមពេញក្នុងផ្ទះលេខ៥៨ ដែលជាផ្ទះរបស់ជនរងគ្រោះគាត់ស្នាក់នៅ ។
តាមប្រភពដដែលបានបន្តថា ពេលភ្លាមៗនោះដែរ សមត្ថកិច្ចជំនាញព្រហ្មទណ្ឌខណ្ឌសែនសុខបានធ្វើការចុះទៅដល់កន្លែងកើតហេតុ ប៉ុន្តែមិនឃើញជនរងគ្រោះនៅក្នុងផ្ទះកើតហេតុនោះទេ គ្រាន់តែឃើញត្រឹមសំបកគ្រាប់ជាង៣២គ្រាប់ និងដានឈាមពេញក្នុងផ្ទះ ។
តាមប្រភពដដែលបានបន្តទៀតថា ពាក់ព័ន្ធនឹងករណីខាងលើនេះ សន្តិសុខនៅក្នុងបុរីក៏បានប្រាប់សមត្ថកិច្ចថា មានជនជាតិចិនបានរត់ទៅប្រាប់ជនជាតិចិនដូចគ្នានៅផ្ទះលេខ៤៨ រួចក៏បើករថយន្តមួយគ្រឿងម៉ាកKin ពណ៌ស មិនចាំស្លាកលេខ បើកគេចខ្លួនបាត់ស្រមោល រហូតដល់ម៉ោង៩យប់ថ្ងៃដដែល ទើបកម្លាំងព្រហ្មទណ្ឌកំរិតស្រាលនៃស្នងការដ្ឋានរាជធានីភ្នំពេញបានធ្វើការស្រាវជ្រាវរហូតឈានដល់ធ្វើការឃាត់ខ្លួនជនសង្ស័យម្នាក់ឈ្មោះ CHIANG CHUN YI ភេទប្រុស អាយុ៤០ឆ្នាំ នៅចំណុចផ្លូវព្រះស៊ីសុវត្ថិ មុខមាត់ទន្លេ សង្កាត់ផ្សារកណ្តាល១ ខណ្ឌដូនពេញ ។
បន្ទាប់ពីឃាត់ខ្លួន ជនសង្ស័យម្នាក់ខាងលើនេះក៏បានប្រាប់សមត្ថកិច្ចថា ខ្លួនមិនមែនជាអ្នកបាញ់នោះទេ គឺបក្ខពួករបស់ខ្លួនជាអ្នកបាញ់ លុះសមត្ថកិច្ចសួរនាំចប់ក៏ឃុំខ្លួនជនសង្ស័យម្នាក់នោះជាបណ្តោះអាសន្ននៅអធិការខណ្ឌសែនសុខ ។
ក្រោយពេលកើតហេតុ សមត្ថកិច្ចនឹងបន្តការធ្វើការស្រាវជ្រាវចាប់ជនដៃដល់យកមកផ្តន្ទាទោសតាមផ្លូវច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ