ខេត្តកំពង់ចាម ៖ នៅតំបន់ជាយក្រុងកំពង់ចាម ជាប់នឹងរង្វង់មូលនាគព័ន្ធ តាមដងផ្លូវជាតិលេខ៧ គេសង្កេតឃើញមានប្រជាពលរដ្ឋបានប្រកបមុខរបរលក់ផ្លែពុទ្រា ផ្លែស្វាយ ផ្លែក្រូច និងផ្លែឈើហូបផ្លែមួយចំនួនទៀត ដើម្បីដោះស្រាយជីវភាពគ្រួសារ។…
ខេត្តកំពង់ចាម ៖ នៅតំបន់ជាយក្រុងកំពង់ចាម ជាប់នឹងរង្វង់មូលនាគព័ន្ធ តាមដងផ្លូវជាតិលេខ៧ គេសង្កេតឃើញមានប្រជាពលរដ្ឋបានប្រកបមុខរបរលក់ផ្លែពុទ្រា ផ្លែស្វាយ ផ្លែក្រូច និងផ្លែឈើហូបផ្លែមួយចំនួនទៀត ដើម្បីដោះស្រាយជីវភាពគ្រួសារ។ ជាមួយនោះមានអ្នកធ្វើដំណើរតាមមធ្យោបាយម៉ូតូនិងរថយន្ត មកឈប់ចូលទិញ យកទៅពិសារហូរហែរផងដែរ។ នៅត្រង់ចំណុចស្ពានបេតុង ក្នុងឃុំរអាង ស្រុកកំពង់សៀម ក៏មានប្រជាពលរដ្ឋប្រកបមុខរបរលក់ផ្លែពុទ្រាបែបនេះដែរ តែមិនមានច្រើនកន្លែងដូចនៅម្ដុំនាគព័ន្ធនោះទេ ។
អ្នកស្រីរៀម ដានី អាយុ៣៨ឆ្នាំ បានប្រាប់ឲ្យដឹងនៅព្រឹកថ្ងៃទី៥ មករា ឆ្នាំ២០២០នេះថា គាត់បានប្រកបមុខរបរលក់ផ្លែពុទ្រាចំនួន៣ឆ្នាំមកហើយ ក្នុងមួយថ្ងៃអាចលក់បានពី២០ទៅ ៣០គីឡូក្រាម និងទទួលបានប្រាក់ចំណេញពី៣ទៅ៤ម៉ឺនរៀល សម្រាប់ដោះស្រាយជីវភាពគ្រួសារ ។ នៅទីនេះដំបូងឡើយមានលក់តែ២ទៅ៣គ្រែប៉ុណ្ណោះ តែមកដល់សព្វថ្ងៃនេះ អ្នកលក់បានកើនរហូតដល់ជិ២០គ្រែឯណោះ។ ចំពោះផ្លែឈើផ្សេងៗវិញ គាត់លក់បាន១គីឡូតម្លៃ១ម៉ឺនរៀលទៅ ១២.០០០រៀល តាមប្រភេទឆ្ងាញ់ ឬមិនឆ្ងាញ់។
អ្នកស្រីឡេង វន្នី អាយុ៥៨ឆ្នាំ បានឲ្យដឹងថា ចំពោះតម្លៃផ្លែពុទ្រាគឺគាត់លក់មិនខុសគ្នានៅកន្លែងផ្សេងៗនោះទេ។ ក្នុងពេលលក់ដំបូងដាក់តែផ្លែពុទ្រាលក់មួយមុខតែប៉ុណ្ណោះ លុះមានអ្នកដំណើរមកសួររកទិញផ្លែឈើផ្សេងៗទៀត ទើបគាត់ដាក់លក់ផ្លែឈើជាច្រើនមុខក្នុងនោះរួមមាន ផ្លែពុទ្រា ផ្លែស្វាយ ផ្លែអំពិលទុំ និងផ្លែក្រូចថ្លុងជាដើម។
អ្នកស្រីឡេង វន្នី ប្រាប់បន្តថា ចាប់តាំងពីពេលដែលគាត់បានប្រកបរបរលក់ដូរផ្លែឈើនេះមកដល់បច្ចុប្បន្នមានរយៈពេល៥ឆ្នាំហើយ ក្នុងមួយថ្ងៃគាត់អាចទទួលបានប្រាក់ចំណេញ៥ម៉ឺនរៀល ឬលើសនេះក៏មាន។ របរនេះបានទទួលប្រាក់ចំណេញគ្រាន់ដោះស្រាយជីវភាពគ្រួសារដោយចិញ្ចឹមកូនចំនួន២នាក់ឲ្យបានសិក្សារៀនសូត្រ ហើយពេលទំនេរកូនស្រីរបស់គាត់តែងតែមកជួយលក់ដូរ ដើម្បីជួយសម្រាលការលំបាក ចំណែកប្ដីរបស់គាត់វិញមានរបរជួសជុលម៉ូតូ ។
អ្នកស្រីឡេង វន្នី បានប្រាប់បន្តទៀតថា ចំពោះផ្លែពុទ្រាត្រូវបានប្រមូលទិញ ពីម៉ូយនៅស្រុកចំការលើ ឬនៅទំនប់ជ្រោយចេក ស្រុកកំពង់សៀម និងនៅក្រោយបន្ទាយទាហានសឹករងខេត្ត ផ្លែពុទ្រាសំបូរជាងគេគឺនៅក្នុងខែធ្នូហើយមកដល់ដើមឆ្នាំ ២០២០រាងស្បើយបន្តិច ។
សូមបញ្ជាក់ថា ដោយសារតែផ្លែពុទ្រានៅខេត្តកំពង់ចាម មានរសជាតិឆ្ងាញ់ សូម្បីតែអាជីវករនៅស្រុកស្នួល ខេត្តក្រចេះ ក៏បានមកកុំម្មង់ទិញយកទៅលក់នៅទីនោះផងដែរ។ ក្នុងមួយសប្តាហ៍ថ្ងៃដែលលក់ដាច់ជាងគេគឺនៅថ្ងៃសៅរ៍ឬអាទិត្យគឺមានប្រជាពលរដ្ឋធ្វើដំណើរតាមមធ្យោបាយម៉ូតូ និងរថយន្តច្រើនជាងបណ្ដាថ្ងៃណាៗទាំងអស់។ មកដល់សព្វថ្ងៃអាជីវករលក់ដូរផ្លែឈើត្រង់ចំណុចខាងលើមានម៉ូយច្រើននៅឆ្ងាយៗបានឆៀងចូលមកទិញផ្លែពុទ្រាយកទៅពិសា ហើយក្នុងមួយគីឡូក្រាមតម្លៃ១២.០០០រៀល ក្នុងនោះជាប្រភេទផ្លែពុទ្រាតូចមែន តែមានរសជាតិឆ្ងាញ់ ៕ (កែសម្រួលដោយ ៖ ធីតា)
ចែករំលែកព័តមាននេះ