រាជធានីភ្នំពេញ៖ ក្នុងវិស័យសំណង់ និងអចលនទ្រព្យរបស់កម្ពុជាស្ថិតក្នុងរយៈពេល ៥ ឬ១០ឆ្នាំចុងក្រោយនេះទាំងការសាងសង់ តម្រូវការទិញ និងលក់មានសន្ទុះ ព្រមទាំងមានកំណើនជាបន្តបន្ទាប់គួរឱ្យកត់សម្គាល់ ។ ស្របពេលវិស័យនេះនៅតែរក្សាបានកំណើនមួយល្អមកទល់សព្វថ្ងៃត្រូវបានធនគារកណ្តាលកម្ពុជាបានវាយតម្លៃថាតម្រូវការឥណទានក្នុងវិស័យសំណង់…
រាជធានីភ្នំពេញ៖ ក្នុងវិស័យសំណង់ និងអចលនទ្រព្យរបស់កម្ពុជាស្ថិតក្នុងរយៈពេល ៥ ឬ១០ឆ្នាំចុងក្រោយនេះទាំងការសាងសង់ តម្រូវការទិញ និងលក់មានសន្ទុះ ព្រមទាំងមានកំណើនជាបន្តបន្ទាប់គួរឱ្យកត់សម្គាល់ ។ ស្របពេលវិស័យនេះនៅតែរក្សាបានកំណើនមួយល្អមកទល់សព្វថ្ងៃត្រូវបានធនគារកណ្តាលកម្ពុជាបានវាយតម្លៃថាតម្រូវការឥណទានក្នុងវិស័យសំណង់ អចលនទ្រព្យ និងការប្រើប្រាស់ឥណទានក្នុងការធ្វើពាណិជ្ជកម្មបានជំរុញឱ្យការប្រើប្រាស់កម្ចីក្នុងប្រព័ន្ធធនាគារកើនឡើងវិញ ក្រោយពីខកខានរយៈពេល ៣ឆ្នាំកន្លងទៅ ។
យោងតាមរបាយការណ៍វឌ្ឍនភាពម៉ាក្រសេដ្ឋកិច្ច និងវិស័យធនាគារឆ្នាំ ២០១៩ និងទស្សនវិស័យឆ្នាំ ២០២០របស់ធនាគារជាតិ នៃ កម្ពុជា ចេញផ្សាយកាលពីថ្ងៃទី ២ ខែមករាឆ្នាំ ២០២០បង្ហាញថា ទន្ទឹមនឹងវិស័យធនាគារមានសុខភាពល្អ និងបានចូលរួមចំណែកយ៉ាងសកម្មក្នុងការជំរុញបរិយាប័ន្នហិរញ្ញវត្ថុ គាំទ្រការរីកចម្រើនសេដ្ឋកិច្ច និងកាត់បន្ថយភាពក្រីក្រ ក្រោមសុខសន្តិភាព និងស្ថិរភាពនយោបាយរឹងមាំ ។ ប្រជាជនពេញវ័យដែលកំពុងប្រើប្រាស់សេវាហិរញ្ញវត្ថុផ្លូវការមាន ៧១% នៃប្រជាជនពេញវ័យសរុប ជាមួយនឹងកំណើនប្រាក់បញ្ញើ ២៥% និងប្រាក់កម្ចី ២៦% ។
ធនគារជាតិ នៃ កម្ពុជា គូសបញ្ជាក់ថា «កំណើនប្រាក់កម្ចី បានកើនឡើងមកវិញបន្ទាប់ពីបានថយចុះនារយៈពេល ៣ឆ្នាំកន្លងទៅ ប៉ុន្តែមិនទាន់ដល់កម្រិតក្នុងអំឡុងឆ្នាំ ២០១០-២០១៥ (៣០%) ទេ ។ កំណើនឡើងវិញនេះជំរុញជាចម្បងដោយកំណើនឥណទានទៅកាន់វិស័យសំណង់ និងអចលនទ្រព្យ ការប្រើប្រាស់ និងពាណិជ្ជកម្ម ។ ដោយសារការកើនឡើងនៃចំណូល តម្រូវការ និងភាពសម្បូរបែបនៃសេវាហិរញ្ញវត្ថុ ឥណទានសម្រាប់ប្រើប្រាស់បានកើនឡើងនាប៉ុន្មានឆ្នាំចុងក្រោយនេះដូចជាឥណទានសម្រាប់ទិញទំនិញប្រើប្រាស់ និងលំនៅឋានសម្រាប់ស្នាក់នៅ» ។
បើតាមរបាយការណ៍ដដែលឱ្យដឹងទៀតថា ឥណទានទាំងនេះបានជំរុញការប្រើប្រាស់ដែលមានបច្ច័យវិជ្ជមានរួមចំណែកគាំំទ្រកំណើនសេដ្ឋកិច្ច ។ ទោះយ៉ាងណាប្រសិនបើអ្នកប្រើប្រាស់មិនបានចំណាយឱ្យចំគោលដៅទេ នោះការកើនឡើងនៃឥណទានក៏អាចបង្កជាហានិភ័យ ។ ម្យ៉ាងទៀតប្រព័ន្ធធនាគារបានធ្វើទំនើបកម្មទូទាត់ ដើម្បីគាំំទ្រការរីកចម្រើនឥតឈប់ឈរនៃសេដ្ឋកិច្ច និងសមាហរណកម្មទៅក្នុងតំបន់ ។
បច្ចុប្បន្នប្រជាជនប្រមាណ ៥លាននាក់កំពុងប្រើប្រាស់សេវាទូទាត់សងប្រាក់ប្រកបដោយភាពងាយស្រួល ឆាប់រហ័ស សុវត្ថិភាព និងតម្លៃសមរម្យ ។
ធនាគារជាតិ នៃ កម្ពុជា កំពុងអភិវឌ្ឍស្តង់ដារ QR Code និងដាក់ឱ្យដំណើរការសាកល្បងប្រព័ន្ធបាគង ផ្អែកលើបច្ចេកវិទ្យា Blockchain សម្រាប់សម្រួលដល់ការទូទាត់ឆ្លងកាត់គ្រឹះស្ថានធនាគារ និងហិរញ្ញវត្ថុព្រមទាំងប្រតិបត្តិការទូទាត់ឆ្លងដែន ៕ កែសម្រួលដោយ ៖ សុឃាក់
ចែករំលែកព័តមាននេះ