រាជធានីភ្នំពេញ ៖តារាសម្តែងរាងតូចច្រឡឹងម៉ុន ផលចរិយា ហៅរីយ៉ា បានបង្ហាញសកម្មភាពថ្មីៗរបស់ខ្លួននៅលើហ្វេសប៊ុក ខណៈអាជីពសិល្បៈនៅបន្តស្ងាត់ស្ងៀមគ្មានមូលហេតុ ក្នុងរយៈពេលប៉ុន្មានឆ្នាំចុងក្រោយនេះ ។ មិនថាតែសកម្មភាពក្នុងសិល្បៈស្ងប់ស្ងាត់នោះទេ សូម្បីតែហ្វេសប៊ុករបស់នាងដែលធ្លាប់បង្ហោះរូបភាព ថ្មីៗជាបន្តបន្ទាប់នោះ ក៏គ្មានសកម្មភាពអ្វីនោះដែរ ជាហេតុធ្វើឲ្យមហាជនជាច្រើនដែលធ្លាប់គាំទ្រតារាស្រីរូបនេះហាក់មានការងឿងឆ្ងល់យ៉ាងណាខ្លាំង ។
កាលពីពេល ថ្មីៗកន្លងមកតារាស្រីដែលល្បីក្នុងបទ «ទីបំផុត» របស់តារាចម្រៀងហេង ពិទូ រូបនេះបានបង្ហោះរូបភាព ថ្មីៗឡើងវិញ នាំឲ្យទស្សនិកជនមួយចំនួនសន្មតថា រីយ៉ា ទំនងជានឹងវិលមកសិល្បៈជាថ្មីឡើងវិញ បំបែកភាពស្ងាប់ស្ងាត់ ។
ជាការកត់សម្គាល់រូបភាពដែល រីយ៉ា បង្ហោះនាពេលនេះគឺជាសកម្មភាពដែលនាងបានចូលរួមនៅក្នុងពិធីមង្គលការមួយ ជាមួយឈុតសម្លៀកបំពាក់យ៉ាងសាមញ្ញ អមជាមួយនឹងរូបសម្រស់នៅតែស្រស់ស្អាត ប៉ុន្តែរូបរាងរបស់នាងហាក់ស្គមជាងមុនបន្តិច ។ បន្ទាប់ពីរូបភាពដែលរីយ៉ា បានបង្ហោះនោះគឺគេសង្កេតឃើញមានមិត្តភក្តិ និងប្រិយមិត្តគាំទ្ររូបនាងជាច្រើនបាននាំគ្នាចូលខំមិន ជាមួយនឹងការលើកសរសើរពីរូបសម្រស់ និងការសួរសុខទុក្ខ ក្រោយពេលដែលនាងបានស្ងប់ស្ងាត់ពីសិល្បៈមួយរយៈមកនេះ ។
ទោះជាយ៉ាងណាក្ដី រីយ៉ា ហាក់មិនបានឆ្លើយតបឲ្យចំទិសដៅពិតប្រាកដនោះឡើយ ដោយបែរជាឆ្លើយបង្វែងដានថា មូលហេតុដែលនាងមិនសូវបានបង្ហោះរូបភាពលើហ្វេសប៊ុកនោះ គឺដោយសារតែនាងមិនមានរូបថតល្អ និងត្រឹមត្រូវសម្រាប់បង្ហោះ ។
ពាក់ព័ន្ធនឹងការបាត់មុខពីសិល្បៈដោយគ្មានមូលហេតុនេះដែរ កោះសន្តិភាពបានព្យាយាមទាក់ទងសុំការបកស្រាយពីតារាស្រីរូបនេះផងដែរ ប៉ុន្តែមិនមានការឆ្លើយតបណាមួយឡើយ ។
តារាសម្តែងរីយ៉ា បានចាប់ឈោងភាពល្បីល្បាញ បន្ទាប់ពីនាងបានសម្តែងក្នុងបទ «ទីបំផុត» របស់តារាចម្រៀងហេង ពិទូ ដែលមានការគាំទ្រយ៉ាងខ្លាំង ជាមួយនឹងអត្ថន័យបទចម្រៀង និងកាយវិការសម្តែងរបស់នាង។ បន្ទាប់ពីចាប់ឈោងភាពល្បីល្បាញនោះមកតារាស្រីរូបនេះបានចាប់ផ្តើមមានទីផ្សារសិល្បៈជាបន្តបន្ទាប់ដូចទឹកបាក់ទំនប់ ជាមួយនឹងការសម្តែងរឿងភាគទូរទស្សន៍ និងរឿងខ្នាតធំស្ទើរមិនដាច់រយៈ ជាមួយការកែប្រែជីវភាពកាន់តែហ៊ឺហាជាងមុន ។
យ៉ាងណាក្ដីបន្ទាប់ពីចាប់ឈោងភាពល្បីល្បាញបានមួយរយៈនោះមក នាងក៏បាត់មុខពីសិល្បៈវិញ ដោយមិនដឹងពីមូលហេតុ ក្រោយពេលដែលនាងបានចូលបម្រើការងារនៅក្រសួងមហាផ្ទៃ ។ ការបាត់មុខពីសិល្បៈនេះត្រូវបានមហាជនមួយចំនួនដាក់ការសង្ស័យថា រីយ៉ា អាចនឹងមិនវិលរកសិល្បៈជាថ្មីទេ ដោយសារតែនាងទំនងជាមានគូកំណាន់ចិត្ត ដែលដាក់គំនាប ៕ (កែសម្រួលដោយ ៖ បុប្ផា)
ចែករំលែកព័តមាននេះ