រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា មនុស្សដែលជួយសង្គ្រោះក្នុងឧបទ្ទេវហេតុនៃការបាក់រលំអគានៅខេត្តកែប មនុស្សដែលជួយសង្គ្រោះសរុប៥៩នាក់ ក្នុងនោះអ្នកដែលបាត់បង់ជីវិតមាន៣៦នាក់ ។ ថ្លែងក្នុងសន្និសីទសារព័ត៌មាន ក្រោយបិតបញ្ចប់ការរុករកជនរងគ្រោះនៃការបាក់រលំអគា នាព្រឹកថ្ងៃទី០៥ ខែមករា ឆ្នាំ២០២០ សម្តេចតេជោ ហ៊ុន សែន នាយករដ្ឋមន្ត្រីបានថ្លែងអរគុណដល់ក្រុមជំនាញបានចុះជួយសង្គ្រោះជនរងគ្រោះនៃការបាក់រលំអគាកម្ពស់៧ជាន់ក៏ដូចជា សម្តែងការសោកស្តាយនៃឧបទ្ទេវហេតុនេះ ។
សម្តេចបានបន្ត នេះព្រឹត្តិករណ៍ដ៏ជូចត់មួយទៀត បន្ទាប់ពីព្រឹត្តិការណ៍នៅខេត្តព្រះសីហនុ កាលពីឆ្នាំកន្លងទៅ ។ ពិតមែនហើយ ដំណើរនៃការសង្គ្រោះនេះទោះបីជារឿងបានកើតរួចហើយដោយបង្កើតឲ្យមានយុទ្ធនាការនៃការសង្គ្រោះ ហើយត្រូវបិទបញ្ចប់នៅពេលនេះដោយប្រើពេលវេលាអស់រយៈពេល៤៣ម៉ោង២០នាទី (បញ្ចប់ម៉ោង១១និង៣៥នាទី) ។
សម្តេចបានពន្យល់អំពីដំណើរការជួយសង្គ្រោះថា គោលការណ៍នៃការជួយសង្គ្រោះត្រូវផ្តល់អាទិភាពខ្ពស់ទៅលើការជួយសង្គ្រោះជីវិតមនុស្ស ដោយមិនត្រូវធ្វើដោយទទឹងទិស និងខ្វះការប្រុងប្រយ័ត្ននោះទេ ។ ដូច្នេះហើយនៅពេលរុករកឃើញសញ្ញាមួយមិនប្រក្រតីត្រូវបញ្ឈប់គ្រឿងចក្រ ដោយប្រើកម្លាំងមនុស្ស ឬមធ្យោបាយផ្សេងៗដែលធ្វើទៅបាន ។
អាទិភាពបន្ត គឺគោរពដល់សាកសព បើទោះបីជាពួកគាត់បានស្លាប់ទៅហើយ តែត្រូវធានាថា សាកសពនោះមិនត្រូវពុះជ្រៀកដោយគ្រឿងចក្រនោះទេ ។ សម្តេចបានគូសបញ្ជាក់ថា ៖«តួលេខាផ្លូវការ គឺមនុស្សដែលនៅរស់២៣នាក់ (ស្រី៨នាក់) ស្លាប់៣៦នាក់ (ស្រី១៤នាក់ ) សរុបទាំងអស់៥៩ (ស្ត្រី២២នាក់) ក៏មានកុមារា និងកុមារីផងដែរ ។
នេះជាព្រឹត្តិការណ៍ដែលសោកសង្រេងមួយ សម្រាប់ប្រទេសជាតិរបស់យើង ដែលជួបប្រទះនូវអកុសលទាំងនេះ» ។ សម្តេចតេជោក៏បានថ្លែងអរគុណ និងអរព្រះគុណចំពោះព្រះករុណព្រះមហាក្សត្រក៏ដូចជា សម្តេចម៉ែ ជាទីសក្ការៈដែលព្រះអង្គបានតែងតែគិតគូរចំពោះសុខទុក្ខរបស់ប្រជារាស្ត្ររបស់ព្រះអង្គដោយរាប់ទាំងការចូលរួមជាថវិកា ។ អរគុណចំពោះស្ថានប័នរដ្ឋសភា ព្រឹទ្ធសភា និងចំពោះសប្បុរសជននានាដែលចូលរួមវិភាគទានដោយរហូតមកដល់ពេលនេះមានសរុបប្រមាណជាង១លាន៧សែនដុល្លារអាមេរិក ។
សម្តេចតេជោក៏បានអរគុណដល់វិស័យឯកជនក៏ដូចជា អ្នកជំនាញរបស់ចិន និងអ្នកជំនាញរបស់ខេត្តកែប និងខេត្តផ្សេងដែលបានចូលរួមជួយសង្គ្រោះជីវិតដែលកើតក្នុងឧបទ្ទេវហេតុនេះតាមជំនាញរៀងៗខ្លួនទាំងកន្លែងដែលមនុស្សនៅរស់ ឬកន្លែងផ្សេងផងដែរ ។ សម្តេចតេជោក៏បានកោតសរសើចំពោះកម្លាំងអ្នករុករកជួយសង្គ្រោះជីវិតអ្នករងគ្រោះដោយគ្មានការភ័យខ្លាចទាំងបុរស និងស្ត្រី ។
សម្តេចក៏បានឲ្យដឹងថា អ្នករងគ្រោះរបួសនៃឧបទ្ទេវហេតុនឹងទទួលបានថវិកា១ម៉ឺនដុល្លារ ដោយឡែកករណីពិសេស៧នាក់ ដែលជួយសង្គ្រោះពីគំនរបាក់បែកទទួលបានម្នាក់២ម៉ឺនដុល្លារ ។ ចំណែកសាកសពម្នាក់ទទួលបាន៥ម៉ឺនដុល្លារ និងថវិកា១០លានរៀល ។ ក្នុងករណីដែលថវិកាសេសសល់នឹងពិនិត្យចែកជូនដល់គ្រួសារសព ដើម្បីឲ្យកូនចៅ ឬឪម្តាយបន្តជីវភាព ព្រោះគេខ្លះបានបង់បង្គោលគ្រួសារ ៕ កែសម្រួលដោយ ៖ សុឃាក់
ចែករំលែកព័តមាននេះ