ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា មហាជនបានរិះគន់ក្រុមអជីវកម្មលក់អាចម៍ដី ដែលកំពុងធ្វើសកម្មភាពជីករណ្តៅយកអាចម៍ដីលក់ បានបង្កឲ្យមានផលប៉ះពាល់ដល់សុវត្ថិភាពដីដែលនៅជិតខាងរណ្តៅដីនោះ និងភ័យខ្លាចបាក់ដីចូលក្នុងរណ្តៅ ព្រមទាំងខ្លាចបង្កឲ្យធ្លាក់គោក្របីលង់នៅរដូវវស្សា និងគ្រោះថ្នាក់ដល់កូនចៅ ដោយក្រុមឈ្មួញបានជីករណ្តៅយកអាចម៍ដី…
ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា មហាជនបានរិះគន់ក្រុមអជីវកម្មលក់អាចម៍ដី ដែលកំពុងធ្វើសកម្មភាពជីករណ្តៅយកអាចម៍ដីលក់ បានបង្កឲ្យមានផលប៉ះពាល់ដល់សុវត្ថិភាពដីដែលនៅជិតខាងរណ្តៅដីនោះ និងភ័យខ្លាចបាក់ដីចូលក្នុងរណ្តៅ ព្រមទាំងខ្លាចបង្កឲ្យធ្លាក់គោក្របីលង់នៅរដូវវស្សា និងគ្រោះថ្នាក់ដល់កូនចៅ ដោយក្រុមឈ្មួញបានជីករណ្តៅយកអាចម៍ដី មានជម្រៅជ្រៅជិត១០ម៉ែត្រ ចង់ហួសក្បាលប្រេតទៅហើយ ។
បើតាមអ្នកស្រុកនិយាយថា ជីករណ្តៅដីជ្រៅដល់ក្បាលប្រេតនេះ ដើម្បីយកអាចម៍ដីលក់ ដោយមិនខ្វល់ពីផលប៉ះពាល់ និងគ្រោះថ្នាក់ដល់ប្រជាពលរដ្ឋរស់នៅក្បែរណ្តៅដីនោះទេ។
ទាក់ទិននឹងករណីរិះគន់ពីមហាជនខាងលើនេះដែរ ម្ចាស់អជីវកម្មរណ្តៅដីម្នាក់ឈ្មោះ ពៅ រាក់ បានប្រាប់អ្នកសារព័ត៌មានតាមទូរស័ព្ទនៅរសៀលថ្ងៃទី០៤ ខែមករា ឆ្នាំ២០២០នេះថា លោកមានអាជ្ញាប័ណ្ណអាជីវកម្មជីករណ្តៅដីនេះ ដែលមានទំហំ១ហិកតា ហើយច្បាប់បានអនុញ្ញាតិឲ្យជីកជម្រៅ០៥ម៉ែត្រ ។ ខណៈពេលបច្ចុប្បន្ននេះ ទើបតែជីកបានទទឹង៤០ម៉ែត្របណ្តោយ៩០ម៉ែត្រប៉ុណ្ណោះ។
ហើយចំពោះមហាជនរិះគន់ថា ជីជ្រៅលើសច្បាប់អនុញ្ញាតិនោះ លោកទទួលស្គាល់ថា បើតាមការចុះវាស់វែងពីមន្ត្រីជំនាញនៃមន្ទីររ៉ែ និងថាមពលខេត្តស្វាយរៀង បានពិនិត្យវាស់វែងឃើញថា ជម្រៅ០៦ម៉ែត្រ គឺលើសតែ១ម៉ែត្រទេ។ ក៏ប៉ុន្តែមហាជនវិញ ប្រាប់ថា រណ្តៅដីរបស់ឈ្មោះពៅ រឹត និងពៅ រាក់ នោះ គឺជីកដល់ក្បាលប្រែតឯណោះ (ជម្រៅចាប់ពី៨ម៉ែត្រទៅ១០ម៉ែត្រទៅហើយ)។
លោក ប៉ុក តក ប្រធានមន្ទីររ៉ែ និងថាមពលខេត្តស្វាយរៀង បានមានប្រសាសន៍ថា លោកមិនបានដឹងទាំងអស់នោះទេ ដោយសារតែមានអជីវកម្មជីករណ្តៅដីជាច្រើន ហើយចំពោះអជីវកម្ម ពៅ រឹត និងពៅ រាក់ នេះ លោកមិនបានចុះទៅពិនិត្យទេ ដោយជាប់រវល់ប្រជុំច្រើន។ ប្រសិនបើការជីកយកអាចម៍ដីរបស់អជីវកម្ម ពៅ រឹត និងពៅរាក់នេះ ជីករណ្តៅដីជ្រៅលើសពីច្បាប់សុំធ្វើអជីវកម្មនោះ លោកនឹងចាត់មន្ត្រីឲ្យចុះទៅពិនិត្យវាស់វែងនៅសប្តាហ៍ក្រោយនេះហើយ។ (កែសម្រួលដោយ ៖ បុប្ផា)
ចែករំលែកព័តមាននេះ