ខេត្តមណ្ឌលគិរី ៖ ភ្លើងឆេះព្រៃនៅស្រុកកោះញែកបានឆេះរាលដាលចូលទៅជិតក្រុមហ៊ុន ម៉ាស្ទើខេសាន់ កាលពីថ្ងៃទី២ មករា ឆ្នាំ២០២០ បណ្តាលឲ្យឆេះកំទេចកំទី និងឈើចាស់ៗដែលសេសសល់ ភ្លាមៗនោះអាជ្ញាធរខេត្តបានបញ្ជូនរថយន្តពន្លត់អគ្គីភ័យទៅពន្លត់ភ្លើង ការពារកុំឱ្យភ្លើងឆេះដល់គំនរឈើដែលគណៈកម្មការជាតិបានបង្ក្រាបបទល្មើសធនធានធម្មជាតិកាលពីពេលកន្លងទៅនេះ។
លោកឧត្តមសេនីយ៍ត្រី ហែម បូណារែល មេបញ្ជាការកងរាជអាវុធហត្ថខេត្តមណ្ឌលគិរី បានឲ្យដឹងថា ក្រោយទទួលបានព័ត៌មានខាងលើនេះភ្លាម លោកបានចាត់កម្លាំងចូលរួមជាមួយអាជ្ញាធរមូលដ្ឋាន ដើម្បីចុះពន្លត់ភ្លើងដែលកំពុងឆេះយ៉ាងខ្មួលខ្មាញ់ ហើយបើមិនបានទប់ស្កាត់ទាន់ពេលវេលានោះទេ ភ្លើងអាចឆេះបន្តដល់ទីតាំងឈើល្មើសច្បាប់ដែលបង្ក្រាបបានកាលពីពេលកន្លងទៅ។
លោក ហែម បូណារែល បានបន្តថា គិតត្រឹមវេលាម៉ោង៤ល្ងាចថ្ងៃទី៣ មករា ស្ថានភាពភ្លើងឆេះព្រៃខាងលើនោះ គឺកម្លាំងជំនាញអាចគ្រប់គ្រងបានហើយ ដោយមានការសហការពីកងកម្លាំងមន្ត្រីរដ្ឋបាលព្រៃឈើ មន្ត្រីបរិស្ថាន និងអាជ្ញាធរស្រុកកោះញែក ចាត់វិធានការប្រើគ្រឿងចក្រឈូសដីកាត់មុខភ្លើង និងរថយន្តពន្លត់អគ្គិភ័យប្រចាំការជានិច្ច។
ក្នុងករណីខាងលើនេះសមត្ថកិច្ចនៅមិនទាន់ដឹងច្បាស់ថា តើភ្លើងឆេះនេះបណ្តាលមកពីមូលហេតុអ្វីនៅឡើយទេ? តែបើតាមការសន្និដ្ឋានរបស់លោក ហែម បូណារែល កត់សម្គាល់ជំហ៊ានដំបូងថា វាអាចបណ្តាលមកពីមានព្រានព្រៃ ឬប្រជាពលរដ្ឋចូលព្រៃរកអុស រកឃ្មុំ ហើយដណ្តាំបាយភ្លេចពន្លត់រងើកភ្លើង ឬមានអ្នកចោលកន្ទុយបារីលើស្លឹកឈើងាប់ ទើបបណ្តាលឲ្យមានភ្លើងឆេះរាលដាលយ៉ាងឆាប់រហ័យបែបនេះ ។ ព្រោះរដូវនេះរាំងស្ងួតស្លឹកឈើ ស្មៅងាប់ វាងាយនិងឆេះខ្លាំងណាស់។
ជុំវិញករណីខាងលើនេះ លោក ស្វាយ សំអ៊ាង អភិបាលខេត្តមណ្ឌលគិរី ក៏បានផ្តាំផ្ញើដល់បងប្អូនប្រជាពលរដ្ឋដែលចូលទៅរកអុសឬរកឃ្មុំក្នុងព្រៃ ត្រូវបង្កើនការប្រុងប្រយ័ត្ន ក្រោយប្រើប្រាស់ភ្លើងរួចគប្បីនាំគ្នាពន្លត់ភ្លើងសិន មុនចាកចេញពីទីតាំងដែលខ្លួនស្នាក់អាស្រ័យ ។ បើមានការធ្វេសប្រហែសវាអាចនាំគ្រោះមហន្តរាយដល់ធនធានធម្មជាតិ និងពពួកសត្វព្រៃ ជាពិសេសបើភ្លើងឆេះមានទំហំធំធេងវាក៏អាចរាលដាលដល់ភូមិឋានអ្នកស្រុក ឆេះបំផ្លាញផ្ទះសម្បែងទៀតផង៕ (កែសម្រួលដោយ ៖ ធីតា)
ចែករំលែកព័តមាននេះ