ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា សមត្ថកិច្ចនគបាលខេត្តស្វាយរៀង សហការជាមួយសមត្ថកិច្ចវៀតណាម បានបង្ក្រាបករណីរក្សាទុកគ្រឿងញៀននិងសារធាតុគីមីផ្សំ ក្នុងនោះឃាត់ខ្លួនមនុស្ស២នាក់បម្រុងនាំគ្រឿងញៀនឆ្លងដែនទៅប្រទេសវៀតណាម។
បើតាមលោកវរសេនីយ៍ឯក កែវ សុថា ស្នងការរងនគរបាលខេត្តស្វាយរៀងបានឲ្យដឹងថា នៅម៉ោង១០និង៣០នាទីថ្ងៃទី២ ខែមករា ឆ្នាំ២០២០ កម្លាំងជំនាញបានទទួលព័ត៌មានពីភាគីវៀតណាមស្តីពីការបង្ក្រាបករណីជួញដូរគ្រឿងញៀនឆ្លងដែននៅចំណុចស្លាបខាងឆ្វេង ចន្លោះបង្គោលសីម៉ា១៧០-១៧១ ព្រំដែនវៀតណាម ស្ថិតក្នុងភូមិឡុងភីឃុំឡុហឹង ស្រុកបេនកូវ ខេត្តតៃនិញ ដោយឃាត់ខ្លួនជនសង្ស័យម្នាក់ ឈ្មោះ Nguyen thingoc bich ភេទស្រីអាយុ២៥ឆ្នាំ ជាជនជាតិវៀតណាម។
ប្រភពដដែលបន្តថា ក្រោយធ្វើការសាកសួរ ជនសង្ស័យបានឆ្លើយសារភាពថា ខ្លួនបាននាំយកថ្នាំញៀនពីជនជាតិចិនម្នាក់ មុខរបរបុគ្គលិកអនឡាញកាស៊ីណូ បច្ចុប្បន្នស្នាក់នៅបន្ទប់ជួលភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
លោកបានបន្តថា ក្រោយពីទទួលបានព័ត៌មាននេះ រូបលោកដែលជាស្នងការរងទទួលផែនការងារប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលក្រុងបាវិត និងដោយមានការសម្របសម្រួលនីតិវិធីតាមរយៈទូរស័ព្ទផ្ទាល់ពីលោកព្រះរាជអាជ្ញាអមសាលាដំបូងខេត្តស្វាយរៀង កម្លាំងជំនាញបានធ្វើការស្រាវជ្រាវ និងឃាត់ខ្លួនជនសង្ស័យបានម្នាក់ទៀត ឈ្មោះ Wendusu ភេទប្រុស ជនជាតិចិន នៅបន្ទប់ជួលទីតាំងខាងលើ និង ធ្វើការឆែកឆេរក្នុងបន្ទប់ជួលស្នាក់នៅរបស់ជនសង្ស័យរកឃើញ និងរឹបអូសសម្ភារៈវត្ថុតាងរួមមាន ៖
១-ថង់ម្សៅក្រាមពណ៌ថ្លា សង្ស័យជាថ្នាំញៀនប្រភេទមេតំហ្វេតាមីនទម្ងន់៧.៩១ក្រាម។
២-ថង់ម្សៅក្រាម ពណ៌ស សង្ស័យជាថ្នាំញៀនប្រភេទមេតំហ្វេតាមីនទម្ងន់៨៣៤.២៦ក្រាម។
៣-ថង់ម្សៅក្រាមពណ៌ផ្កាឈូក សង្សយ័ជាថ្នាំញៀនប្រភេទ MDMA (អិចស្តាស៊ី) ទម្ងន់១៣១.៦៤ក្រាម។
៤-ថង់ម្សៅ ថ្នាំគ្រាប់ពណ៌ផ្កាឈូក សង្ស័យជាថ្នាំញៀនមេតំហ្វេតាមីនចំនួន៤០០ គ្រាប់ ទម្ងន់១០២.៤២ក្រាម។
៥-ថង់ម្សៅ ក្រាមពណ៌សថ្លា ចំនួន០១កញ្ចប់ ទម្ងន់៦.១៣ក្រាម។ ទឹកអាកុលចំនួន៣ដប។
៦-សារធាតុគីមីផ្សំ (ទឹកថ្នាំដប) ចំនួន០៧ដប(ធំ១) រួមនឹងសម្ភារៈប្រើប្រាស់វេចខ្ចប់ថ្នាំញៀនមួយចំនួនទៀតផង។
លោក កែវ ថា បានបញ្ជាក់ថា ថ្នាំញៀនទាំងនេះ ត្រូវបានជនសង្ស័យនាំមកពីភ្នំពេញ ដើម្បីឆ្លងដែនទៅប្រទេសវៀតណាម ហើយត្រូវកម្លាំងជំនាញរបស់យើងធ្វើការបង្ក្រាបបានតែម្តង។ បច្ចុប្បន្នជនសង្ស័យម្នាក់ដែលជាជនជាតិចិន កំពុងត្រូវបានឃាត់ខ្លួននៅការិយាលយ័ជំនាញនៃស្នងការនគបាលខេត្តស្វាយរៀង ដើម្បីបំពេញសំណុំរឿងចាត់ការបន្តតាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ