ខេត្តប៉ៃលិន ៖ ជនសង្ស័យប្រុសស្រីចំនួន៤នាក់ ត្រូវបានកម្លាំងអធិការនគរបាលក្រុងប៉ៃលិន ចាប់ឃាត់ខ្លួន ខណៈមានជាប់ពាក់ព័ន្ធករណីរក្សាទុក និងចែកចាយគ្រឿងញៀនខុសច្បាប់ ។ ហេតុការណ៍ខាងលើនេះ បានកើតឡើង…
ខេត្តប៉ៃលិន ៖ ជនសង្ស័យប្រុសស្រីចំនួន៤នាក់ ត្រូវបានកម្លាំងអធិការនគរបាលក្រុងប៉ៃលិន ចាប់ឃាត់ខ្លួន ខណៈមានជាប់ពាក់ព័ន្ធករណីរក្សាទុក និងចែកចាយគ្រឿងញៀនខុសច្បាប់ ។
ហេតុការណ៍ខាងលើនេះ បានកើតឡើង កាលពីវេលាម៉ោង១០និង៤៥នាទីព្រឹកថ្ងៃទី៤ មករា ២០២០ ស្ថិតនៅចំណុចផ្សារថ្មី ក្នុងភូមិអូរច្រាលើ សង្កាត់ទួលល្វា ក្រុងប៉ៃលិន ខេត្តប៉ៃលិន ។
បើតាមនគរបាលក្រុងប៉ៃលិន បានឲ្យដឹងថា កម្លាំងជំនាញ ប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ៃលិន ចុះបង្ក្រាបករណីជួញដូរគ្រឿងញៀនខុសច្បាប់មួយករណី នៅចំណុចកើតហេតុខាងលើ ដោយឃាត់ខ្លួនបានជនសង្ស័យម្នាក់ ឈ្មោះ ចាន់ សាន ភេទប្រុស អាយុ៣៥ឆ្នាំ មុខរបរមិនពិតប្រាកដ រស់នៅក្នុងភូមិឃុំកន្លែងកើតហេតុ ដោយដកហូតបានម្សៅក្រាមពណ៌សថ្លា សង្ស័យជាម៉ាទឹកកកចំនួន៦កញ្ចប់ ។
តាមប្រភពដដែលបានបន្តថា ដោយមានការសង្ស័យថាមានសារធាតុញៀន នៅទីតាំងខាងលើទៀត ក៏បានសុំគោលការណ៍ពីលោក សេង សុគន្ធ ស្នងការនគរបាលខេត្តប៉ៃលិន បន្តនីតិវិធី ដោយមានការសម្របសម្រួលពីលោក តូច សុភក្តី ព្រះរាជអាជ្ញាអមសាលាដំបូងខេត្ត ឈានទៅដល់ការបង្ក្រាប និងឆែកឆេរផ្ទះជនសង្ស័យខាងលើ ជាលទ្ធផលបាននាំខ្លួនបានជនសង្ស័យចំនួន៣នាក់បន្ថែមទៀត រួមមាន ១-ឈ្មោះ ចាន់ នី ភេទស្រី អាយុ៦៨ឆ្នាំ មុខរបរកសិករ ត្រូវជាម្តាយរបស់ជនសង្ស័យឈ្មោះចាន់ សាន ២-ឈ្មោះ ទឹម ប៊ុនធឿន ភេទស្រី អាយុ៣៩ឆ្នាំ មុខរបរកោសជប់ និង៣-ឈ្មោះ ហេង លៀប ភេទស្រី អាយុ៣៥ឆ្នាំ មុខរបរកោសជប់ ។
ក្នុងការចុះឆែកឆេរនោះ សមត្ថកិច្ចជំនាញដកហូត វត្ថុតាងរួមមាន ម្សៅក្រាមពណ៌សថ្លាសង្ស័យ ជាម៉ាទឹកកកចំនួន៣៨កញ្ចប់ សរុបទាំងអស់ចំនួន៤៤កញ្ចប់ ជញ្ជីងថ្លឹងចំនួនមួយគ្រឿង ប្រាក់ចំនួន១.២០០.០០០រៀល (មួយលានពីរសែនរៀល)។ ប្រាក់ចំនួន២.០០០បាត និងសម្ភារៈសម្រាប់ជក់មួយចំនួនទៀត ។
បច្ចុប្បន្នជនសង្ស័យខាងលើ ត្រូវបានកម្លាំងជំនាញប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ៃលិននាំខ្លួន រួមទាំងវត្ថុតាងទៅកាន់អធិការដ្ឋាននគរបាលក្រុងប៉ៃលិន ដើម្បីរៀបចំសំណុំរឿងបញ្ជូនទៅតុលាការ ចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ