រាជធានីភ្នំពេញ ៖ ក្នុងរយៈពេល ១ឆ្នាំ ២០១៩កន្លងទៅនេះ ចំណូលដែលបានមកពីការលក់ប័ណ្ណជូនភ្ញៀវបរទេសចូលទស្សនារមណីយដ្ឋានតំបន់អង្គរបានធា្លក់ចុះ ១៥,០៥ភាគរយ បើធៀបនឹងឆ្នាំ ២០១៨កន្លងទៅ ។ ចំណូលក្នុងឆ្នាំ ២០១៩ទាំងមូលមានចំនួន ប្រមាណតែជាង ៩៩លានដុល្លារអាមេរិកប៉ុណ្ណោះ ខណៈឆ្នាំ ២០១៨កន្លងទៅចំណូលពីការលក់ប័ណ្ណជូនភ្ញៀវបរទេសចូលទស្សនាតំបន់អង្គរមានចំនួនជាង ១១៦លានដុល្លារអាមេរិក ។ នេះបើយោងតាមរបាយការណ៍របស់គ្រឹះស្ថានអង្គរចេញផ្សាយថ្ងៃទី ០១ ខែមករា ឆ្នាំ ២០២០នេះ ។
តាមរបាយការណ៍ដដែលនេះបានបង្ហាញផងដែរថា ក្នុងរយៈពេលមួយឆ្នាំ ២០១៩នេះដែរ ចំនួនភ្ញៀវទេសចរដែលបានទិញប័ណ្ណចូលទស្សនារមណីយដ្ឋានអង្គរ មានចំនួន២.២០៥.៦៩៧នាក់ ហើយបើធៀបនឹងឆ្នាំ ២០១៨ មានការធ្លាក់ចុះដល់ទៅ ១៤,៨៦ភាគរយ ។ ជាក់ស្ដែងឆ្នាំ ២០១៨ ចំនួនភ្ញៀវបរទេសទិញប័ណ្ណចូលទស្សនាតំបន់អង្គរមានចំនួនដល់ទៅជាង ២លាន ៥៩០ពាន់នាក់ ហើយការធ្លាក់ចុះភ្ញៀវបរទេសចរ ចូលទស្សនាតំបន់អង្គរនេះបានបង្កឱ្យមានការព្រួយបារម្ភដល់អ្នកបម្រើសេវាក្នុងវិស័យទេសចរណ៍ ក្នុងខេត្តសៀមរាបទាំងមូលផងដែរ ។
លោក ឈឹម សុផល អ្នកប្រកបរបររត់កង់បី នៅតំបន់អង្គរខេត្តសៀមរាប បានឱ្យដឹងថា ឆ្នាំ ២០១៩នេះដោយសារតែបាត់ភ្ញៀវទេសចរ ក្នុងខេត្តសៀមរាប ធ្វើឱ្យអ្នកប្រកបអាជីវកម្មបម្រើក្នុងវិស័យទេសចរណ៍ បានបាត់បង់ចំណូលរបស់ខ្លួនអស់ច្រើន ជាក់ស្ដែងរូបលោកផ្ទាល់ ក្នុងមួយថ្ងៃលោកអាចរកបានត្រឹមតែ ២ម៉ឺនទៅ ៣ម៉ឺនរៀលប៉ុណ្ណោះ ខុសពីឆ្នាំមុនៗលោកអាចរកបានពី ៣០ដុល្លារទៅ ៥០ដុល្លារក្នុងមួយថ្ងៃ ។
លោក សុផល បាននិយាយថា ភ្ញៀវទេសចរដែលមកសៀមរាបបានធ្លាក់ចុះ តាមការកត់សម្គាល់ គឺតាំងពីដើមឆ្នាំ ២០១៩មកម្ល៉េះ ហើយកត្តាមួយចំនួនដែលលោកកត់សម្គាល់នោះ គឺវាអាចពាក់ព័ន្ធនឹងនយោបាយខ្លះៗដែរ ។ លោកបន្តថា៖ «មិនថាតែខ្ញុំ ឬគេទេ ពេលនេះ ចំណូលបានធ្លាក់ចុះច្រើន ព្រោះតែមិនមានម៉ូយសម្រាប់ដឹកឡើយ ។ ហើយម្យ៉ាងទៀត អ្នករកស៊ីរបរនេះមួយចំនួនបានធ្វើឱ្យភ្ញៀវអន់ចិត្តតាមរយៈ កោរគេ ដូចជា មុនឡើងជិះតម្លៃផ្សេង ដល់ពេលចុះតម្លៃផ្សេង ហើយរកមូលហេតុផ្សេងៗមកដោះស្រាយដើម្បីបានប្រាក់បន្ថែម ។ ធ្វើដូច្នេះនឹងធ្វើឱ្យបាត់ភ្ញៀវបន្ថែមទៀតផងដែរ»។ លោកបន្ថែមថា មិនមែនតែរបររត់កង់បីទេ ដែលបាត់ចំណូលនោះ សណ្ឋាគារ ភោជនីយដ្ឋាន និងសេវាកម្មទេសចរណ៍ផ្សេងទៀតក៏មានបញ្ហាដែរ ពោលគឺបាត់បង់ចំណូលដូចគ្នា ក្នុងពេលដែលទេសចរធ្លាក់ចុះ ។ លោកឱ្យដឹងថា៖ «បើសិនជានៅតែបន្តបែបនេះទៀត ទាំងលោក និងអ្នករត់កង់បីផ្សេងទៀតអាចត្រលប់ទៅធ្វើស្រែវិញហើយ ព្រោះចំណូលមិនឆ្លើយតបនឹងការចំណាយប្រចាំថ្ងៃ ដូច្នេះត្រូវរករបរផ្សេងដើម្បីបង្កើនចំណូលវិញ» ។
យ៉ាងណាក៏ដោយ ទោះបីជាចំនួនភ្ញៀវបរទេសទស្សនាតំបន់អង្គរក្នុងខេត្តសៀមរាបធ្លាក់ចុះក្ដី បើតាមរបាយការណ៍របស់ក្រសួងទេសចរណ៍វិញ បង្ហាញថា កំណើនភ្ញៀវទេសចរបរទេសចូលមកកម្ពុជា ក្នុងឆ្នាំ ២០១៩នេះ នៅតែល្អប្រសើរ និងមានកំណើនខ្ពស់ធៀបនឹងឆ្នាំមុន ខណៈប្រទេសជិតខាងកម្ពុជា មានការថយចុះភ្ញៀវបរទេសទៅវិញ ។
លោក សូ ម៉ារ៉ា រដ្ឋលេខាធិការក្រសួងទេសចរណ៍ បានឱ្យដឹងថា ការថយភ្ញៀវទេសចរ ក្នុងខេត្តសៀមរាប ជាពិសេសភ្ញៀវដែលចូលទស្សនារមណីយដ្ឋានអង្គរនេះ ដោយសារតែកម្ពុជាមានតំបន់រមណីយដ្ឋានបង្កើតថ្មីៗច្រើន ដូច្នេះហើយភ្ញៀវបរទេសដែលមកដល់កម្ពុជា គេទៅទស្សនានៅតំបន់រមណីយដ្ឋានថ្មីៗទាំងនោះ ។ លោកបន្តថា៖ «បច្ចុប្បន្ននេះរដ្ឋាភិបាល និងដៃគូរពាក់ព័ន្ធជាច្រើនបានបង្កើតរមណីយដ្ឋាននៅតំបន់ភូមិភាគឦសានប្រទេស និងតំបន់កោះជាច្រើន ដូច្នេះភ្ញៀវបរទេសដែលមកកម្ពុជា ក្នុងឆ្នាំ ២០១៩ក៏ទៅទស្សនាតំបន់ទាំងនោះ» ។
គួរបញ្ជាក់ផងដែរថា ក្នុងរយៈពេល ២ថ្ងៃ ដើមឆ្នាំ ២០២០នេះឃើញថា ចំនួនភ្ញៀវទេសចរបរទេសទិញប័ណ្ណចូលទស្សនាតំបន់អង្គរមានចំនួនច្រើនឡើងវិញ ជាក់ស្ដែងពីរថ្ងៃនេះ គឺថ្ងៃទី ០១ និងថ្ងៃទី ០២ ខែមករា ឆ្នាំ ២០២០ភ្ញៀវទេសចរបរទេសទិញប័ណ្ណចូលទស្សនាអង្គរមានចំនួន ១៤.៤០៩នាក់ ៕
ចែករំលែកព័តមាននេះ