ខេត្តកំពង់ឆ្នាំង ៖ ប្រព័ន្ធធារាសាស្ត្រលំហាចកំពុងកសាង ដើម្បីយកទឹកស្រោចស្រពលើផ្ទៃដីស្រែប្រមាណជាង៣ពាន់ហិកតា ។ ប្រព័ន្ធធារាសាស្ត្រថ្មីនេះ ស្ថិតក្នុងភូមិអញ្ចាញ ឃុំក្តុលសែនជ័យ ស្រុកទឹកផុស ចម្ងាយជាង៦០គីឡូម៉ែត្រពីទីរួមខេត្តកំពង់ឆ្នាំង ។ ក្រោយពេលរួចរាល់ វានឹងជួយដល់ដំណាំស្រូវវស្សាក្នុងស្រុកចំនួន៣ គឺស្រុកបរិបូណ៌ ស្រុករលាប្អៀរ និងស្រុកទឹកផុស ហើយអាចនឹងប្រែក្លាយជាតំបន់ទេសចរណ៍ផងដែរ ។
លោកដោក ប៊ុនថុន ប្រធានមន្ទីរធនធានទឹក និងឧតុនិយម ខេត្តកំពង់ឆ្នាំង ឲ្យដឹងកាលពីពេល ថ្មីៗកន្លងមកថាប្រព័ន្ធធារាសាស្ត្រលំហាច សាងសង់បានជាង៩០%ហើយអាចស្រោចស្រពលើផ្ទៃដីស្រែវស្សា៣២៨៩ហិកតា ។
ប្រព័ន្ធធារាសាស្ត្រនេះមានប្រឡាយតូចធំវែង និងខ្លីចំនួន១៣៣ខ្សែប្រវែងសរុប១៧៣,៨០គីឡូម៉ែត្រ ក្នុងនោះមានសំណង់ក្បាលហុងទឹក១ ,សំណង់ទ្វារទឹក១,ប្រឡាយមេចំនួន១ខ្សែប្រវែង១៦,៤០គីឡូម៉ែត្រ, សាងប្រឡាយថ្នាក់ទី២ចំនួន១៣ខ្សែប្រវែង៤២,៥០គីឡូម៉ែត្រ,សាងសង់ប្រឡាយរំដោះទឹកចំនួន១៥ខ្សែប្រវែង៥២,៩០គីឡូម៉ែត្រ ,សាងសង់ប្រឡាយទឹកថ្នាក់ទី៣ចំនួន៩៣ខ្សែប្រវែង៦២គីឡូម៉ែត្រ,សាងសង់សំណង់សិល្បការសរុបចំនួន៥៥៧ និងសាងសង់អគារសហគមន៍កសិករប្រើប្រាស់ទឹក១ ។
ប្រព័ន្ធធារាសាស្ត្រនេះ គឺជាជំនួយរបស់រាជរដ្ឋាភិបាលជប៉ុន កសាងដោយអង្គការចៃការបានចាប់ផ្ដើមកសាងនៅអំឡុងខែមីនា ឆ្នាំ២០១៧ ហើយអាចនឹងអាចបញ្ចប់គម្រោងនៅក្នុងខែធ្នូឆ្នាំ២០២០ ។
ប្រព័ន្ធធារាសាស្ត្រលំហាចមានប្រភពទឹកពីស្ទឹងអូររំចេក ឃុំក្តុលសែនជ័យ និងមួយផ្នែកពីលើភ្នំគុក មានព្រំប្រទល់រវាងខេត្តកំពង់ឆ្នាំង ជាប់ជាមួយខេត្តពោធិ៍សាត់ ។ ប្រព័ន្ធធារាសាស្ត្រនេះប្រសិនបើប្រជាពលរដ្ឋកែប្រែទម្លាប់ពីធ្វើស្រូវធ្ងន់មកធ្វើស្រូវកណ្តាលវិញ គឺអាចធ្វើបាន២ដងនៅក្នុងខែវស្សា ។
អ្នកស្រុក និងមន្ត្រីជំនាញទេសចរណ៍រំពឹងថានៅពេលសំណង់ស្ទាក់ទឹកលំហាចរួចរាល់នឹងបានជាប្រយោជន៍២យ៉ាង ទី១សម្រាប់ស្រោចស្រពទឹកធ្វើស្រែនៅតំបន់នោះ ។ ទី២នឹងក្លាយជាតំបន់ទេសចរណ៍ដ៏ស្រស់ត្រកាលទាក់ទាញភ្ញៀវទេសចរទៅកម្សាន្តដូចសំណង់ធារាសាស្ត្រអាចាង ក្នុងឃុំអញ្ចាញរូងស្រុកបរិបូណ៌ដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ