ខេត្តប៉ៃលិន ៖ កាលពីវេលាម៉ោង៧និង៣០នាទីព្រឹកថ្ងៃទី៣ ខែធ្នូ ឆ្នាំ២០២០ ស្ថិតនៅក្នុងបរិវេណ វត្តពោធិមារាម ហៅវត្តប៉ាហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន មានបុរសចំនួន៣នាក់បានប្រកបរបរដឹកដើមផ្កាគ្រប់ប្រភេទពេញរ៉ឺម៉កម៉ូតូមកពីខេត្តផ្សេងៗ ចូលស្នាក់នៅ ដើម្បីបន្តលក់ដូរនៅតាមភូមិៗក្នុងក្រុងប៉ៃលិន ។
បុរសទាំង៣នាក់ដែលប្រកបរបរលក់ដើមផ្កាខាងលើ ក្នុងនោះ ១-ឈ្មោះ ឆេង ថា អាយុ៣០ឆ្នាំ ២-ឈ្មោះ សុំ ឆាយ អាយុ៣០ឆ្នាំ និង៣-ឈ្មោះ សុខ លីន អាយុ៣៥ឆ្នាំ ។ បុរសទាំង៣នាក់នេះរស់នៅភូមិរកា ឃុំរកា ស្រុកពារាំង ខេត្តព្រៃវែង ។
បើតាមសម្តីរបស់បុរសទាំង៣នាក់ខាងលើបានរៀបរាប់ទាំងការត្អូ ញត្អែរឱ្យដឹងថា ពួកគាសត់មានគ្នា៣នាក់ បានទិញដើមផ្កាជាច្រើនប្រភេទដូចជា ដើមផ្កាកូលាប, ដើមផ្កាចំប៉ា, ដើមចំប៉ី, ប្រទាល, ដើមស្លឹកតើយ, ដើមជ្រៃក្រឹម, ដើមផ្កាក្រដាស, ដើមផ្កាអ័រគីដេ, ដើមផ្កាក្រវ៉ាន់, ដើមផ្ការំដួលជាដើម ដោយធ្វើដំណើរលក់ដូរនៅតាមបណ្តាខេត្តនានាទូទាំងប្រទេស ។
តាមប្រភពដដែលបានបន្តថា ការធ្វើដំណើរលក់ដើមផ្កាបែបផ្សងព្រេងនេះ ពិតជាមានការលំបាកខ្លាំង ដោយយប់ត្រង់ណាដេកត្រង់ហ្នឹង ហើយជួនកាលក្នុង១ថ្ងៃ លក់អត់ដាច់សូម្បីតែ១ដើម ។ ទោះបីជាយ៉ាងណា ក៏ពួកគាត់នៅតែខិតខំប្រឹងប្រែងតស៊ូលក់បន្តទៀត ដើម្បីជីវភាពគ្រួសារ ដោយព្យាយាមលក់រហូតដល់អ្នកភូមិទិញដើមផ្កាទាំងនោះ អស់ពីរ៉ឺម៉កម៉ូតូទើបពួកគាត់នាំគ្នាត្រឡប់ចូលផ្ទះវិញ ។
តាមប្រភពដដែលបានបន្តថា ពួកគាត់គ្មានដីស្រែចម្ការដាំដុះនឹងគេនោះទេ មានតែរបរមួយនេះ ដែលជាមុខរបរសុចរិត បន្ទាប់ពីមកដល់ខេត្តប៉ៃលិន ក៏បានសុំបរិវេណវត្តព្រះសង្ឃចតដើម្បីសម្រាកនាំគ្នាដាំបាយហូប រហូតដល់ព្រឹក ទើបនាំគ្នាធ្វើដំណើរបន្តលក់ដូរតាមដងផ្លូវក្រែងមានប្រជាពលរដ្ឋទិញយកទៅដាំលំអមុខផ្ទះ ឬមុខផ្ទះសំណាក់ សណ្ឋាគារជាដើម ។ ដើមផ្កាគ្រប់ប្រភេទដែលពួកគាត់លក់មានតម្លៃចាប់ពី៨០០០រៀល រហូតដល់១០ម៉ឺនរៀល តាមខ្នាតតូចឬធំ ព្រោះទិញពីគេមកក៏មានតម្លៃខ្ពស់ដែរ បើលក់ដូរទាបជាងនេះ មិនរួចខ្លួននោះទេ ។
តាមប្រភពដដែលបានបញ្ជាក់ថា ការធ្វើដំណើរផ្លូវឆ្ងាយបែបនេះ ពិតជាមានការព្រួយបារម្ភពីសុវត្ថិភាព និងបារម្ភពីការស្វែងរកប្រាក់ តាមរយៈការលក់ផ្កា ព្រោះពួកគាត់ធ្លាប់ប្រកបរបរនេះអស់រយៈពេលជាច្រើនឆ្នាំមកហើយ ។ តែការធ្វើដំណើរលក់ដូរដើមផ្កា គ្មានបញ្ហាជួបប្រទះរឿងក្មេងទំនើងមករករឿងពេលយប់ព្រលប់នោះទេ គឺមានសុខសុវត្ថិភាពជាបន្តបន្ទាប់តែម្តង ។
តាមប្រភពដដែលបានបញ្ជាក់ថា នៅកន្លែងខ្លះ ពេលពួកគាត់ធ្វើដំណើរទៅដល់ក៏មានម្ចាស់ហាងលក់ផ្កាខ្លះគេទិញច្រើនដើម្បីទុកលក់បន្តផងដែរ លុះលក់ដាច់អស់ទើបពួកគាត់ត្រឡប់ទៅផ្ទះជួបជុំក្រុមគ្រួសារម្តង ហើយក៏ចាប់ផ្តើមទិញដើមផ្កាដឹកយកទៅលក់តាមបណ្តាខេត្តនានាដូចជា ខេត្តកណ្តាល ខេត្តកំពង់ឆ្នាំង ខេត្តកំពង់ស្ពឺ ខេត្តពោធិ៍សាត់ រហូតដល់ខេត្តបាត់ដំបង ខេត្តប៉ៃលិន ។
បុរសជាអ្នកប្រកបរបរលក់ដើមផ្កាទាំង៣នាក់ខាងលើក៏សំណូមពរឱ្យប្រជាពលរដ្ឋរស់នៅតាមភូមិឃុំនានាជួយទិញផ្ការបស់ពួកគាត់យកទៅដាំ ដើម្បីលម្អគេហដ្ឋាន ក៏ដូចជាជួយដល់ពួកគាត់ដែលប្រកបរបរមួយនេះមានជីវភាពធូរធារផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ