តែម ម៉ឺន ស្នើឱ្យត្រួតពិនិត្យកីឡាករប្រើប្រាស់សារជាតិប៉ូវកម្លាំងមុនឡើងរេញ
- ភ្នំពេញ
រាជធានីភ្នំពេញ ៖ នៅក្នុងវេទិកាសន្និសីទសារព័ត៌មាន បើកការប្រដាល់អធិរាជកម្លាំងរេដអាន កាលពីព្រឹកថ្ងៃទី៣ ខែមករា ឆ្នាំ២០២០ លោក តែម ម៉ឺន…
រាជធានីភ្នំពេញ ៖ នៅក្នុងវេទិកាសន្និសីទសារព័ត៌មាន បើកការប្រដាល់អធិរាជកម្លាំងរេដអាន កាលពីព្រឹកថ្ងៃទី៣ ខែមករា ឆ្នាំ២០២០ លោក តែម ម៉ឺន ប្រធានសហព័ន្ធកីឡាប្រដាល់កម្ពុជា បានស្នើឱ្យត្រួតពិនិត្យកីឡាករទាំងកម្ពុជា និងថៃ មុនឡើងរេញ ដោយលោកប្រកាសថា ការប្រើប្រាស់ថ្នាំ ឬសារជាតិជំនួយកម្លាំងគ្រប់ប្រភេទ ដើម្បីឱ្យមានកម្លាំងខ្លាំងមុនឡើងរេញ គឺជាករណីខុសច្បាប់។
យ៉ាងណាមិញ លោកសារភាពថា ស្ទើរតែ១០០ភាគរយ នៃការរៀបចំប្រដាល់កន្លងមក គឺខាងសហព័ន្ធមិនដែលបានត្រួតពិនិត្យស្ថានភាពនេះរបស់កីឡាករទេ ដែលអាចនឹងធ្វើឱ្យកើតមានករណីនេះ ហើយសហព័ន្ធមិនដឹងក៏មានដែរ។
លោក តែម ម៉ឺន និយាយថា គឺជារឿងប្រសើរណាស់ដែលក្រុមហ៊ុនឯកជន គឺក្រុមហ៊ុនភេសជ្ជៈរេដអាន បានរួមចំណែករៀបចំការប្រដាល់ជាលក្ខណៈមិត្តភាព និងគ្រោងដណ្ដើមខ្សែក្រវាត់នៅលើសង្វៀទូរទស្សន៍អាស៊ីអាគ្នេយ៍ ដែលមិនខុសពីការលើកស្ទួយវិស័យប្រដាល់នៅកម្ពុជាឱ្យមានការរីកចំរើន។
លោកថា ការរួមចំណែកពីបណ្ដាក្រុមហ៊ុនកាន់តែច្រើន នឹងជួយឱ្យកីឡាករប្រដាល់នៅកម្ពុជា មានឱកាសការងារកាន់តែច្រើន ប៉ុន្តែលោកក៏សម្ដែងការបារម្ភផងដែរ ប្រសិនបើកីឡាករដែលមានទីផ្សារចាប់ផ្ដើមលួចប្រើសារជាតិជំនួយ ដើម្បីឱ្យខ្លួនអាចវាយបានល្អ វាយបានញឹក។
លោកថា មិនថាភេសជ្ជៈប៉ូវកម្លាំង មិនថាសារជាតិជំនួយកម្លាំង នៅក្នុងសហព័ន្ធ មានច្បាប់មិនឱ្យប្រើទេ ដោយសារតែសារជាតិទាំងនោះ វាជួយឱ្យសាមីខ្លួនមានកម្លាំងខ្លាំង ប៉ុន្តែវាគ្រោះថ្នាក់ដល់សុខភាព និងប៉ះពាល់ដល់សុខភាព ក្រោយពេលសារជាតិទាំងនោះវាសាបរលាប។
លោកថា កន្លងមក សហព័ន្ធបានត្រឹមតែណែនាំប៉ុណ្ណោះ ប៉ុន្តែសម្រាប់ការត្រួតពិនិត្យឱ្យជាក់ច្បាស់ថា តើកីឡាករនោះមានសារជាតិប៉ូវកម្លាំងខុសប្រក្រតី ឬក៏អត់? គឺមិនមានតែម្ដង។ យ៉ាងណាមិញលោកថា ប្រសិនបើមានករណីចាំបាច់ ឧទាហរណ៍ថា មានកីឡាករប្រើសារជាតិប៉ូវកន្លងគួរឱ្យកត់សម្គាល់នោះ គឺលោកនឹងតម្រូវឱ្យត្រួតពិនិត្យ ហើយពិន័យតាមផ្លូវច្បាប់តែម្ដង។ (កែសម្រួលដោយ ៖ បុប្ផា)
ចែករំលែកព័តមាននេះ