ខេត្តសៀមរាប ៖ បើតាមការអះអាងពីលោក ម៉ុង ប៊ុនលីម នាយរដ្ឋបាលព្រៃ ឈើខេត្តបានប្រាប់កាលពីរសៀលថ្ងៃទី២ ខែមករា ឆ្នាំ២០២០នេះថា មានសេចក្តីរាយការណ៍ពីមន្ត្រីស្នាក់ការរដ្ឋបាលព្រៃ ឈើស្វាយលើ បានស្ទាក់ចាប់រថយន្តខ្នាតយក្សមួយគ្រឿង ដឹកដំឡូងពីលើនិងបង្កប់ឈើពីក្រោម ស្ថិតនៅចំណុចស្រុកស្វាយ លើ ខេត្តសៀមរាប ព្រមទាំងធ្វើការឃាត់ខ្លួនទាំងអ្នកបើកបរផងដែរ រួចនាំយកមកទុកនៅស្នាក់ការរដ្ឋបាលព្រៃឈើស្វាយលើ ដើម្បីសួរនាំ ហើយរៀបចំកសាងសំណុំរឿងបញ្ជូនទៅខណ្ឌរដ្ឋបាលព្រៃឈើខេត្ត ចាត់ការបន្តតាមនីតិវិធីច្បាប់ស្តីពីព្រៃឈើ។
ហេតុការណ៍ឃាត់រថយន្តដឹកដំឡូងពីលើ និងបង្កប់ឈើពីក្រោមនោះ បានធ្វើឡើងកាលពីថ្ងៃទី១ ខែមករា ឆ្នាំ២០១៩ ស្ថិតនៅភូមិសាស្ត្រស្រុកស្វាយលើ ខេត្តសៀមរាប។
លោកម៉ុង ប៊ុនលិម នាយខណ្ឌរដ្ឋបាលព្រៃឈើ ឱ្យដឹងបន្ថែមថា រថយន្តដែលមន្ត្រីរដ្ឋបាលព្រៃឈើស្រុកស្វាយលើបានចាប់ឃាត់មានម្ចាស់ឈ្មោះ ឡុង រដ្ឋា ភេទប្រុស អាយុ៣២ឆ្នាំ ទីលំនៅខេត្តព្រៃវែង ហើយបើកបរ រថយន្តម៉ាកហ៊ីយានដាយ (HYUNDAI)ធុន(វេអង) ពណ៌ស ពាក់ស្លាកលេខ កំពង់ចាម ៣A-៧៨២៩ ដឹកចេញមកពីស្រុកត្រពាំងប្រាសាទ ខេត្តឧត្តរមានជ័យ ឆ្លងកាត់ស្រុកស្វាយ បំរុងឆ្ពោះទៅខេត្តព្រៃវែង ដើម្បីយកទៅចែកចាយ ប៉ុន្តែសំណាងមិនល្អ ត្រូវមន្ត្រីជំនាញ ធ្វើការឃាត់បានភ្លាមៗផងដែរ។
លោកនាយខណ្ឌបន្តទៀតថា រថយន្តខាងលើ ដែលបានដឹកដំឡូងពីលើ និងបង្កប់ឈើខាងក្រោម ដែលក្នុងនោះរកឃើញឈើប្រភេទលេខ១ (ស្រឡៅ)ចំនួន២១៣សន្លឹក, ឈើអារលេខ១ចំនួន២១១សន្លឹក និងឈើអារចម្រុះចំនួន៣៩សន្លឹក ។
លោកនាយខណ្ឌបន្ថែមថា ក្រោយពីបាននាំយកមករក្សាទុកនៅសង្កាត់រដ្ឋ បាលព្រៃឈើកន្ទួតខ្នារក្រៅ ដើម្បីផ្តល់ឱកាសឱ្យម្ចាស់ចូលខ្លួនមកទទួលពិន័យជាអន្តរកាល ក្នុងរយៈពេល៣០ថ្ងៃ។ ក្នុងករណីម្ចាស់មិនចូលខ្លួន មកដោះស្រាយទេ សមត្ថកិច្ចនឹងបញ្ជូនសំណុំរឿងទៅតុលាការ អនុវត្តតាមច្បាប់ស្តីពីព្រៃឈើ៕ (កែសម្រួលដោយ ៖ ធីតា)
ចែករំលែកព័តមាននេះ