រាជធានីភ្នំពេញ ៖ សំណង់អគារដ៏ធំស្កឹមស្កៃមួយមានតម្លៃរាប់លានដុល្លារ ទើបតែសាងសង់មិនទាន់រួចរាល់ផង ស្រាប់តែត្រូវវាយកម្ទេចចោលវិញ ជាហេតុធ្វើឱ្យអ្នកដំណើរដែលឆ្លងកាត់មានការងឿងឆ្ងល់គ្រប់ៗគ្នា និងបានចោទសួរថា ហេតុអ្វីបានជាវាយកម្ទេចចោល ? គួរឱ្យស្តាយណាស់ ?
ទោះបីជាយ៉ាងនេះក្តីគេពុំដឹងពីមូលអ្វីពិតប្រាកដនោះទេ ។ សំណង់ដែលសង់មិនទាន់រួចរាល់វាយកម្ទេចចោលវិញនេះ ត្រូវបានគេដឹងថា មានទំហំប្រមាណជិត២០ម៉ែត្រគុណនឹងជិត៣០ម៉ែត្រ មានកម្ពស់ប្រមាណ៧ជាន់កន្លះ ស្ថិតនៅតំបន់អភិវឌ្ឍន៍ឫស្សីកែវ ក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ ។ គេពុំដឹងថា ម្ចាស់សំណង់នោះមានឈ្មោះអ្វីឡើយ ។
តាមកម្មករដែលជាអ្នកវាយកម្ទេចបានឱ្យដឹងថា ពួកគាត់ត្រូវបានគេជួលឱ្យវាយសំណង់នេះ មានរយៈពេលប្រមាណ១ខែមកហើយ ។ កម្មកររូបនោះបានបញ្ជាក់ថា ការវាយចោលសំណង់នេះ ដើម្បីពង្រីកដីរបស់ម្ចាស់ភូមិគ្រិះមួយទៀតដើម្បីយកដីឱ្យធំទូលាយឱ្យមានហុងស៊ុយ តែបើតាមព័ត៌មានមួយទៀតបានឱ្យដឹងថា មូលហេតុ នៃការវាយកម្ទេចចោលដោយសារតែខុសហុងស៊ុយ ហើយម្ចាស់ក្រោយដែលទើបតែទិញក៏វាយកម្ទេចចោលតែម្តងទៅ ព្រោះសំណង់ប៉ុណ្ណឹងវាមានតម្លៃមិនស្មើដីទេនាសម័យនេះ ។
ជារៀងរាល់ថ្ងៃគេឃើញគ្រឿងចក្រ រួមជាមួយកម្មករប្រមាណជាង១០នាក់កំពុងតែសស្រាក់សស្រាំក្នុងការវាយកម្ទេចសំណង់ដ៏រឹងមាំនេះពីលើចុះក្រោម ។ តាមព័ត៌មានឱ្យដឹងថា សំណង់នេះសាងសង់ប្រមាណជាង១ឆ្នាំមកហើយ ដែលការសាងសង់បានជាគ្រោងរៀបឥដ្ឋបាន២ជាន់ខាងក្រោម ។ រីឯខាងលើមិនទាន់រៀបឥដ្ឋនៅឡើយទេ ។
លុះក្រោយមកនៅពេលថ្មីៗនេះ ម្ចាស់ក្រោយដែលទិញយក ដើម្បីពង្រីកភូមិគ្រឹះរបស់ខ្លួនដែលនៅជាប់នោះ ក៏បានវាយកម្ទេចចោលតែម្តង ។ ទោះបីជាយ៉ាងណាក្តី ការវាយកម្ទេចភូមិគ្រឹះដែលមានតម្លៃប្រាក់លានដុល្លារ កំពុងតែស្ថិតនៅជាអាថ៌កំបាំង ហើយអាជ្ញាធរពុំបានទម្លាយឱ្យដឹងឡើយ។ មហាជននិយាយថា កុំជោរជាមួយអ្នកមាន សំណង់តម្លៃវាល់លានគ្មានបញ្ហា ទិញវាយចោលព្រោះខុសហុងស៊ុយ ។
ព័ត៌មាននេះមិនមានន័យរិះគន់ទៅលើបុគ្គលណានោះទេ ហើយការទិញវាយចោលក៏ជាសិទ្ធិបុគ្គលដែលមានប្រាក់ចង់ធ្វើអ្វីក៏បានដែរ ។ រីឯអ្នកដ៏ទៃទៀតគ្រាន់តែស្តាយតែប៉ុណ្ណោះ…ស្តាយលេងៗទៅ…មានទាស់ខុសអីទេ ៕
កែសម្រួលដោយ ៖ សំណាង
ចែករំលែកព័តមាននេះ