រាជធានីភ្នំពេញ ៖ បុរសមានវិបតិ្តម្នាក់បានជិះម៉ូតូមួយគ្រឿងទៅលោតទឹកសម្លាប់ខ្លួនពីលើស្ពានជ្រោយចង្វា តែមិនបានសម្រេច ត្រូវបានកម្លាំងនគរបាលចរាចរណ៍ និងនគរបាលគោលដៅទី៣ឃាត់ទាន់ ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោងប្រមាណ៩និង១៥នាទីព្រឹក ថៃ្ងទី២ ខែមករា…
រាជធានីភ្នំពេញ ៖ បុរសមានវិបតិ្តម្នាក់បានជិះម៉ូតូមួយគ្រឿងទៅលោតទឹកសម្លាប់ខ្លួនពីលើស្ពានជ្រោយចង្វា តែមិនបានសម្រេច ត្រូវបានកម្លាំងនគរបាលចរាចរណ៍ និងនគរបាលគោលដៅទី៣ឃាត់ទាន់ ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោងប្រមាណ៩និង១៥នាទីព្រឹក ថៃ្ងទី២ ខែមករា ឆ្នាំ២០២០ នៅលើស្ពានជ្រោយចង្វាចាស់ ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។ បុរសដែលគិតខ្លីឈ្មោះ ហេង ពុទ្ធីយ៉ា អាយុ៣១ឆ្នាំ មានលំនៅភូមិអូរអណ្តូង៦ សង្កាត់គោករកា ខណ្ឌព្រែកព្នៅ រាជធានីភ្នំពេញ ។
តាមសាក្សីបានឱ្យដឹងថា នៅមុនពេលកើតហេតុគេឃើញបុរសរូបនោះបានជិះម៉ូតូមួយគ្រឿងម៉ាកស៊ីរូស ពណ៌ខ្មៅ ពាក់ស្លាកលេខព្រៃវែង 1C 1065 ធ្វើដំណើរឡើងស្ពានជ្រោយចង្វា ក្នុងទិសដៅពីលិចទៅកើត ។ នៅពេលធ្វើដំណើរដល់កណ្តាលស្ពានក៏បានឈប់ តោងបង្កាន់ដៃស្ពានប្រុងលោតសម្លាប់ខ្លួន តែត្រូវបានអ្នកដំណើរ ប្រទះឃើញរាយការណ៍ទៅនគរបាលចរាចរណ៍ និងនគរបាលការពារស្ពាន ទៅឃាត់ទាន់រួចរាយការណ៍ ឱ្យនគរបាលមូលដ្ឋាននាំយកទៅសាកសួរនៅប៉ុស្តិ៍នគរបាលជ្រោយចង្វា ។
ភ្លាមៗនោះបន្ទាប់ពីឃាត់ខ្លួនបុរសរូបនោះឱ្យដឹងថា ខ្លួនមិនបានលោតទឹកនោះទេ ដោយឈប់ឈរលេង ។ ទោះបីជាយ៉ាងណា បុរសរូបនោះមានបណ្តាំមួយសន្លឹកនៅជាប់ម៉ូតូរួចទៅហើយ ។ តាមបណ្តាំបានឱ្យដឹងថា «សូមអរគុណ ដែលអ្នកម្តាយចង់ឱ្យកូនល្អ ជាតិនេះខ្ញុំមិនបានសងគុណម្តាយ ចាំជាតិក្រោយណាម្តាយ» ។ នៅក្នុងសំបុត្របណ្តាំ សូមឱ្យខលទៅម្តាយខ្ញុំផង ព្រមទាំងប្រាប់លេខទូរស័ព្ទម្តាយផងដែរ ។
តាមព័ត៌មានមូលហេតុដែលធ្វើឱ្យបុរសនោះគិតខ្លី ដោយសារតែបុរសរូបនោះតូចចិត្តខ្លួនឯង ដែលម្តាយក្មេកយកប្រពន្ធនិងកូនរបស់ខ្លួនទៅវិញ ហើយពេលដែលខ្លួនចង់ជួបកូន ម្តាយក្មេកមិនឱ្យជួបក៏បានគិតខ្លីបែបនេះ ។
តាមព័ត៌មានឱ្យដឹងថា បន្ទាប់ពីបុរសរូបនោះរៀបអាពាហ៍ពិពាហ៍ឪពុកម្តាយបានទំនុកបម្រុងឱ្យប្រាក់រាប់ម៉ឺនដុល្លារដើម្បីរកស៊ីក៏បានខាតចុងខាតដើម ។ លុះក្រោយមកបុរសរូបនោះក៏បានឈ្លក់នឹងល្បែង ។ ដោយសារតែគំនិតមិនកើត ឪពុកម្តាយក្មេកក៏បានបំបែកយកកូនឱ្យទៅធ្វើការនៅខេត្តព្រះសីហនុ ។
ចំណែកកូនក៏យកទៅរស់នៅខេត្តបាត់ដំបង។ នៅពេលថ្មីនេះ បុរសរូបនោះក៏បានសុំជួបកូន តែម្តាយក្មេងមិនឱ្យជួបក៏មានគំនិតចង់ស្លាប់ក៏ជិះម៉ូតូមកលោតទឹកតែម្តង ។ បន្ទាប់ពីឃាត់ខ្លួនទៅសាកសួរ បុរសរូបនេះដឹងខ្លួនខុសនិងគិតតែយំស្រែកនិងសំពះ ។ តាមរយៈពេលលេខទូរស័ព្ទ នគរបាលក៏បានទាក់ទងហៅក្រុមគ្រួសារមកនាំយកត្រឡប់ទៅផ្ទះវិញ ៕
កែសម្រួលដោយ ៖ សំណាង
ចែករំលែកព័តមាននេះ