ខេត្តព្រៃវែង ៖ បើតាមសេចក្តីរាយការណ៍បឋមបានឱ្យដឹងថា មានការភ្ញាក់ផ្អើលពេញតំបន់ទីប្រជុំជនអ្នកលឿង បន្ទាប់ពីចោរ១ក្រុមមានគ្នា២នាក់ប្រដាប់ដោយកាំភ្លើងខ្លី១ដើម ចូលធ្វើសកម្មភាពភ្ជង់ប្លន់ផ្ទះលក់មាស១កន្លែង កាលពីម៉ោង៦និង២០នាទីល្ងាច ថ្ងៃទី២ ខែមករា ឆ្នាំ២០១៩ នៅក្បែផ្សារអ្នកលឿង ស្ថិតក្នុងភូមិ៤ ឃុំព្រែកខ្សាយ(ខ) ស្រុកពាមរក៌ តែសកម្មភាពប្លន់នោះមិនបានសំរេច ព្រោះតែកូនម្ចាស់ផ្ទះអាយុ៧ឆ្នាំម្នាក់រត់ចេញមកក្រៅស្រែកឆោឡោថា «ចោរៗ»។
សេចក្តីរាយការណ៍បន្តថា ផ្ទះដែលត្រូវចោរចូលប្លន់នោះមានម្ចាស់ ឈ្មោះ ហួន ស៊ាមកាង ភេទស្រី អាយុ៦៨ឆ្នាំ មុខរបរលក់មាស វេរលុយ ចំណែកឯក្រុមចោរមានគ្នា២នាក់ ប្រដាប់ដោយកាំភ្លើងខ្លី១ដើមម៉ាក រឺវុលរឺវែ ហើយសកម្មភាពចូលភ្ជង់ប្លន់នេះ ត្រូវបានថតជាប់ដោយកាមេរ៉ាសុវត្ថិភាពរបស់ម្ចាស់ផ្ទះតែម្តង។
សមត្ថកិច្ចបានអោយដឹងថា មុនពេលកើតហេតុ នៅម៉ោង៦និង២០នាទីល្ងាច ក្នុងពេលដែលជនរងគ្រោះកំពុងរៀបចំប្រមូលមាសប្រាក់ដែលដាក់តាំងលក់ទុកវិញ ស្រាប់តែមានជនសង្ស័យ២នាក់ដើរចូលមកក្នុងផ្ទះ ហើយក៏ដកកាំភ្លើងខ្លីភ្ជង់ម្ចាស់ផ្ទះ ដើម្បីគំរាមឱ្យយកមាសប្រាក់ទាំងអស់ឱ្យគេ ប៉ុន្តែជនរងគ្រោះដែលជាកូនស្រីម្ចាស់ផ្ទះបានប្រកែកមិនព្រមឱ្យ។
ប្រភពដដែលបន្តថា ភ្លាមៗនោះកូនប្រុសជនរងគ្រោះអាយុ៧ឆ្នាំ បានរត់ចេញទៅក្រៅស្រែកឆោឡោថា «ចោរៗ» ហៅអ្នកស្រុកឱ្យជួយ ទើបធ្វើឱ្យក្រុមចោរភ័យស្លន់ស្លោរក៏នាំគ្នាស្ទុះចេញមកក្រៅ ហើយរត់ចុះតាមផ្លូវបេតុងខាងលិចផ្សារ ទៅដល់កន្លែងលក់ផ្លែឈើ ក៏ភ្ជង់ប្លន់ជនរងគ្រោះម្នាក់ទៀតដែលកំពុងទិញផ្លែឈើយកបានម៉ូតូ១គ្រឿងម៉ាកឌ្រីមសង់សេ១២៥ ស៊េរីឆ្នាំ២០១១ ជិះរត់គេចខ្លួនសំដៅទៅភូមិព្រែករាំងបាត់ស្រមោលទៅ។
សមត្ថកិច្ចបានបញ្ជាក់ថា ក្រោយមានការផ្អើលឆោឡោភ្លាម កម្លាំងសមត្ថកិច្ច ទាំងប៉ូលិស និងអាវុធហត្ថ បានដេញតាមពីក្រោយចោរ និងប្រទះឃើញម៉ូតូដែលចោរប្លន់បាន ដោយត្រូវក្រុមចោរប្លុងចោលនៅនៅផ្លូវចុះទៅភូមិព្រែករាំង តែក្រុមចោរគេចខ្លួនបាត់អស់ទៅហើយ។
ទោះជាយ៉ាងណា សមត្ថកិច្ចកំពុងតែស្រាវជ្រាវ តាមរយៈរូបភាពដែលចាប់បានតាមកាមេរ៉ាសុវត្ថិភាព ដើម្បីស្វែងរកចាប់ខ្លួនជនសង្ស័យ បើទោះបីជាសកម្មភាពប្លន់នេះ ក្រុមចោរយកមិនបានអ្វីសោះក៏ដោយ៕ (កែសម្រួលដោយ ៖ បុប្ផា)
ចែករំលែកព័តមាននេះ