រាជធានីភ្នំពេញ ៖ តំបន់ប៉ែកខាងលិចនៃរាជធានីភ្នំពេញដូចជា តំបន់មួយចំនួនក្នុងខណ្ឌពោធិ៍សែនជ័យ តំបន់មួយចំនួនក្នុងខណ្ឌសែនសុខ ឃើញថាការអភិវឌ្ឍលំនៅឋាន ជាពិសេសលំនៅឋានជាលក្ខណៈបុរី មានសកម្មភាពផុសផុលខ្លាំង ដែលធ្វើឱ្យតំបន់ទាំងនោះ ក្លាយជាតំបន់អភិវឌ្ឍន៍លំឋានដ៏មានសក្ដានុពល…
រាជធានីភ្នំពេញ ៖ តំបន់ប៉ែកខាងលិចនៃរាជធានីភ្នំពេញដូចជា តំបន់មួយចំនួនក្នុងខណ្ឌពោធិ៍សែនជ័យ តំបន់មួយចំនួនក្នុងខណ្ឌសែនសុខ ឃើញថាការអភិវឌ្ឍលំនៅឋាន ជាពិសេសលំនៅឋានជាលក្ខណៈបុរី មានសកម្មភាពផុសផុលខ្លាំង ដែលធ្វើឱ្យតំបន់ទាំងនោះ ក្លាយជាតំបន់អភិវឌ្ឍន៍លំឋានដ៏មានសក្ដានុពល និងជំរុញឱ្យក្រុមហ៊ុនអភិវឌ្ឍន៍លំនៅឋានក្នុងស្រុកជាច្រើនសម្រុកទៅអភិវឌ្ឍន៍តំបន់ទាំងនោះកាន់តែច្រើន ។
បើតាមតំណាងក្រុមហ៊ុនអភិវឌ្ឍន៍លំនៅឋានបុរីភ្នំពេញថ្មី ក្នុងតំបន់ភាគខាងលិចនៃរាជធានីភ្នំពេញ បានឱ្យដឹងថា ក្រុមហ៊ុនបានបង្កើតគម្រោងថ្មីៗដែលមានជាច្រើនខ្នងផ្ទះនៅតំបន់ភាគខាងលិចនៃរាជធានីភ្នំពេញ ជាពិសេសនៅតំបន់សង្កាត់ក្រាំងធ្នង់ ខណ្ឌសែនសុខ ដោយសារតែតំបន់នេះពេលបច្ចុប្បន្នខុសពីមុន ។
បច្ចុប្បន្នមានក្រុមហ៊ុនអភិវឌ្ឍន៍លំនៅឋានជាច្រើនបានបោះទីតាំង បង្កើតគម្រោងអភិវឌ្ឍន៍លំនៅឋានជាច្រើនដើម្បីផ្ដល់ជូនប្រជាពលរដ្ឋដែលកំពុងមានតម្រូវការលំនៅឋានស្នាក់នៅ ។ លោកបន្តថា៖ «តំបន់ខាងលិចរាជធានីភ្នំពេញ ត្រូវបានរាជរដ្ឋាភិបាលអភិវឌ្ឍន៍លើហេដ្ឋារចនាសម្ព័ន្ធផ្លូវ ភ្លើង ទឹក និងប្រព័ន្ធលូ ដូច្នេះលែងក្លាយជាតំបន់វាលស្រែដូចមុនទៀតហើយ ។ វាក្លាយជាតំបន់ដែលមានសក្ដានុពលខ្ពស់លើការអភិវឌ្ឍន៍លំឋានលក្ខណៈបុរី ដែលវានៅមិនឆ្ងាយពីផ្សារទំនើបអ៊ីអនពីរ និងព្រលានយន្តហោះអន្តរជាតិភ្នំពេញ ដូច្នេះហើយទើបប្រជាពលរដ្ឋចង់មកស្នាក់នៅតំបន់មួយនេះ» ។
លោកបន្ថែមទៀតថា ការអភិវឌ្ឍន៍អ្វីមួយគឺអាស្រ័យលើតម្រូវការ បើគ្មានតម្រូវការក៏គ្មានការផ្គត់ផ្គង់ដែរ ។ ដូច្នេះការអភិវឌ្ឍរបស់បុរីភ្នំពេញថ្មី ក៏ដូចជាបុរីផ្សេងទៀតក្នុងតំបន់ភាគខាងលិចរាជធានីភ្នំពេញនេះដែរ ក៏ដោយសារតែមានតម្រូវការពីប្រជាពលរដ្ឋដែលត្រូវការលំនៅឋានសម្រាប់ស្នាក់នៅ និងដោយសារតែកំណើនប្រជាពលរដ្ឋក្នុងរាជធានីភ្នំពេញកាន់តែច្រើន ។
យោងតាមការបញ្ជាក់ពីអ្នកជំនាញអចលនទ្រព្យកម្ពុជា បានឱ្យដឹងថា លំនៅឋានបុរី មិនអាចសង់បានទៀតទេនៅតំបន់កណ្ដាលក្រុង ព្រោះតម្លៃដីធ្លីកាន់តែឡើងថ្លៃដូច្នេះហើយគេទុកតំបន់កណ្ដាលក្រុងធ្វើជាអគារពាណិជ្ជកម្ម និងអគារខុនដូជាដើម ដោយអ្នកអភិវឌ្ឍន៍លំនៅឋានត្រូវការស្វែងរកទីតាំងនៅតំបន់ជាយរាជធានី ដើម្បីអភិវឌ្ឍន៍នូវគម្រោងរបស់ខ្លួន ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា បានមានប្រសាសន៍ថា ការអភិវឌ្ឍទីក្រុង គឺត្រូវតែរីកទៅតំបន់ជាយៗ ដោយសារតែតំបន់ជាយៗមានតម្លៃដីធ្លីនៅទាប ដែលធ្វើឱ្យអ្នកអភិវឌ្ឍន៍លំនៅឋានជាបុរីត្រូវការស្វែងរកទីតាំងនោះដើម្បីអភិវឌ្ឍន៍គម្រោងរបស់ខ្លួន ។ ចំណែកអ្នកចង់ទិញលំនៅឋានជាលក្ខណៈបុរីស្នាក់នៅ ក៏ត្រូវតែស្វែងរកនៅតំបន់ឆ្ងាយពីកណ្ដាលក្រុងដែរ ព្រោះកណ្ដាលតម្លៃផ្ទះក៏កាន់តែឡើងខ្ពស់ដូចគ្នា ដូច្នេះអ្នកមានជីវភាពសមរម្យល្មមត្រូវទៅស្នាក់នៅកាន់តែឆ្ងាយពីកណ្ដាលក្រុង ។
បើតាមលោក ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា កំណើនលំនៅឋានក្នុងប្រទេសកម្ពុជា មានការកើនឡើងជាបន្តបន្ទាប់ ដោយសារតែកំណើនប្រជាពលរដ្ឋ និងកំណើនអ្នកមានគ្រួសារថ្មីកាន់តែច្រើន ។ លោកបន្តថា៖ «តាមការព្យាករណ៍របស់ក្រសួងរៀបចំដែនដី នគរូបនីយកម្ម និងសំណង់ថា តម្រូវការលំនៅឋានក្នុងប្រទេសកម្ពុជា នឹងកើនដល់ ១លានខ្នងក្នុងមួយឆ្នាំ នៅឆ្នាំ ២០៣០ ដូច្នេះទាមទារឱ្យមានការវិនិយោគបន្ថែមទៀត ដើម្បីឆ្លើយតបទៅនឹងតម្រូវការ» ។
បើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា ក្នុងឆ្នាំ ២០១៩ក្រសួងបានចេញលិខិតសាងសង់លំនៅឋានសរុប ៧៣២គម្រោង ក្នុងទុនវិនិយោគ ៦៦១,២៧លានដុល្លារអាមេរិក ស្មើនឹង ៣៨.៤៨៨ខ្នងល្វែង ។ ចំណែកបុរីលំនៅឋាន និងបណ្ដុំលំនៅឋានលក្ខណៈបុរី នៅទូទាំងប្រទេសវិញ មានចំនួន ៤០គម្រោង ស្មើនឹង ១៦.៥៨៩ខ្នង មានទុនវិនិយោគប្រមាណ ៨២១លានដុល្លារអាមេរិក ។ ដោយឡែកអគារផ្ទះល្វែង និងភូមិគ្រឹះទូទាំងប្រទេសមាន ២០.៧៨១ល្វែង/ខ្នង មានទុនវិនិយោគជិត ២ពាន់លានដុល្លារអាមេរិក ៕ កែសម្រួលដោយ ៖ សុឃាក់
ចែករំលែកព័តមាននេះ