ខេត្តប៉ៃលិន ៖ ជង្រុកដាក់កសិផលពោត និងដំឡូងមីរបស់ប្រជាពលរដ្ឋ១ខ្នង រួមនឹងសម្ភារ:ជាច្រើនដែលនៅក្នុងនោះត្រូវអគ្គីភ័យលេបត្របាក់អស់គ្មានសល់ ខណ:ម្ចាស់និងកម្មករនាំគ្នាបិទទ្វារចាក់សោទុកចោល រួចនាំគ្នាទៅធ្វើការក្នុងចម្ការ ស្រាប់តែមានអណ្តាតភ្លើងយ៉ាងសន្ធោសន្ធៅ លុះនាំគ្នារត់ទៅពន្លត់មិនបាន ក៏ទូរស័ព្ទហៅរថយន្តពន្លត់អគ្គីភ័យទៅជួយថែមទៀត តែអ្វីៗហួសពេលបាត់ទៅហើយ ។
ហេតុការណ៍ខាងលើនេះបានកើតឡើកាលពីវេលាម៉ោងប្រហែល១២ថ្ងៃទី២ ខែមករា ឆ្នាំ២០២០ ស្ថិតនៅក្នុងភូមិព្រៃមង្គល សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ម្ចាស់ជង្រុកដាក់កសិផលខាងលើឈ្មោះ ឃុត គឹមហេន ភេទស្រី អាយុ៣៧ឆ្នាំ មុខរបរកសិករ រស់នៅភូមិអូរច្រាកណ្ដាល សង្កាត់ទួលល្វា ក្រុងប៉ៃលិន ខេត្តប៉ៃលិន ។
តាមប្រភពព័ត៌មានពីលោក យ៉ែម សារិទ្ធ អធិការនគរបាលក្រុងប៉ៃលិន បានឱ្យដឹងថា មានករណីឆេះជង្រុកទាំងស្រុងមួយ ខណ:ម្ចាស់ចាក់សោទុកចោល រួចនាំកម្មករទៅធ្វើការក្នុងចម្ការឆ្ងាយពីកន្លែងកើតហេតុ រហូតដល់វេលាថ្ងៃត្រង់ថ្ងៃកើតហេតុ ស្រាប់តែមានអណ្តាតភ្លើង និងផ្សែងហុយយ៉ាងសន្ធោរសន្ធៅ ក៏នាំគ្នារត់ទៅពន្លត់ ។ តែដោយសារភ្លើងឆេះយ៉ាងខ្លាំងពេល ទើបទាក់ទងទៅខាងសមត្ថកិច្ចឱ្យប្រញាប់យករថយន្តពន្លត់អគ្គិភ័យចុះមកជួយបាញ់ទឹកជួយពន្លត់ លុះពេលទៅដល់ ភ្លើងឆេះអស់ទាំងស្រុងបាត់ទៅហើយ ដោយមិនអាចជួយបាននោះទេ ។
តាមប្រភពដដែលបានបន្តទៀតថា ជង្រុកដែលត្រូវភ្លើងឆេះនេះមិនដឹងពីមូលហេតុនោះទេ ហើយមានទំហំ៨ម៉ែត្រ គុណនឹង៥០ម៉ែត្រ ក៏មានសម្ភារៈ និងរបស់របរត្រូវភ្លើងឆេះអស់ទាំងស្រុងដូចជា ៖ ត្រាក់ទរ័ចំនួន ១គ្រឿង ម៉ាស៊ីនដេរសំលៀកបំពាក់ចំនួន១ឈុត ម៉ាស៊ីនកាត់ស្មៅ១គ្រឿង ម៉ាស៊ីនបាញ់ថ្នាំ១គ្រឿង និងឈើសំរាប់ទុកសាងសង់ផ្ទះជាច្រើន រួមទាំងរបស់ផ្សេងទៀត ក៏ត្រូវភ្លើងឆេះទាំងស្រុងដែរ ។
តាមប្រភពដដែលបានបញ្ជាក់ថា ពាក់ព័ន្ធនឹងករណីខាងលើនេះ មិនបង្កអោយមានមនុស្សណាម្នាក់រងរបួសនោះទេ ហើយការឆេះនេះ គឺមិនទាន់ដឹងពីមូលហេតុច្បាស់លាស់នៅឡើយទេ ព្រោះម្ចាស់ជង្រុកដាក់កសិផល និងកម្មករ មិននៅទីនោះមុនពេលកើតហេតុ ។ ភ្លើងបានរលត់ទាំងស្រុង ដោយសារមានការជួយអន្តរាគមន៍ពន្លត់ពីរថយន្តពន្លត់អគ្គីភ័យនៃស្នងការដ្ឋាននគរបាលខេត្តប៉ៃលិនចំនួន៣គ្រឿង ប្រើប្រាស់ទឹកអស់ចំនួន៥រថយន្ត ៕ (កែសម្រួលដោយ ៖ ធីតា)
ចែករំលែកព័តមាននេះ