រាជធានីភ្នំពេញ ៖ លោក ប៉ាវ ស៊ីណា ប្រធានសហជីពចលនាកម្មករ បានឲ្យដឹងថា ម្ចាស់រោងចក្រមួយចំនួនមានការយឺតយ៉ាវក្នុងការបើកប្រាក់បំណាច់អតីតភាពការងារក្នុងឆ្នាំ២០១៩ តាមការកំណត់របស់ក្រសួងការងារនិងបណ្តុះបណ្តាលវិជ្ជាជីវៈ ។
លោក ប៉ាវ ស៊ីណា បានឲ្យដឹងនៅថ្ងៃទី៣០ ខែធ្នូ ឆ្នាំ២០១៩ ថា មានការត្អូញត្អែររបស់កម្មករ ជុំវិញភាពយឺតយ៉ាវនៃការបើកប្រាក់រំឭកបំណាច់អតីតភាពការងារមុនឆ្នាំ២០១៩ និងការផ្តល់ប្រាក់បំណាច់អតីតភាពការងារចាប់ពីឆ្នាំ២០១៩ ។ លោកបញ្ជាក់ថា ក្រុមការងារយើងខ្ញុំបានពិនិត្យឃើញថា មានរោងចក្រមួយចំនួនពុំបានអនុវត្តតាមប្រកាសរបស់ក្រសួងការងារទេ ពោលគឺអ្នកគ្រប់គ្រងរោងចក្រមានភាពយឺតយ៉ាវ និងពន្យារពេលបើករំឭកប្រាក់បំណាច់អតីតភាពការងារមុនឆ្នាំ២០១៩ និងការទូទាត់ប្រាក់បំណាច់អតីតភាពការងារក្នុងឆ្នាំ២០១៩ ដែលតម្រូវឲ្យម្ចាស់រោងចក្របើកជូនកម្មករនៅក្នុងខែធ្នូនេះ ។
ប៉ុន្តែអ្នកគ្រប់គ្រងរោងចក្រ បានលើកទៅបើកជូនកម្មករនៅខែមករា ឆ្នាំ២០២០ ចន្លោះពីថ្ងៃទី៥រហូត
ដល់ថ្ងៃទី២០ ខែមករាឯណោះ ហើយក៏មានរោងចក្រខ្លះទៀត ពុំទាន់បានកំណត់ថ្ងៃបើកជូនកម្មករផងដែរ។
លោក ប៉ាវ សុីណា បន្តថា ប្រកាសរបស់ក្រសួងការងារនិងបណ្តុះបណ្តាលវិជ្ជាជីវៈ ស្តីពីការទូទាត់ប្រាក់បំណាច់អតីតភាពការងារ បានតម្រូវឲ្យម្ចាស់រោងចក្រ សហគ្រាសបើក រំឭកប្រាក់បំណាច់អតីតភាពការងារ និងការទូទាត់ប្រាក់ជូន កម្មករពីរដងក្នុង១ឆ្នាំ ។ ការបើកជូននេះមានរយៈពេល៦ខែម្តង គឺបើកជូនរៀងរាល់ខែមិថុនា និងរៀងរាល់ខែធ្នូ នៃឆ្នាំនីមួយៗ ។
មេសហជីពរូបនេះបានអះអាងថា ករណីបើកយឹតយ៉ាវនូវប្រាក់បំណាច់នេះ អាចជាចរន្តរុញច្រានទៅជាវិវាទ ដែលអាចកើតឡើងក្នុងកំឡុងពេលណាមួយ ប្រសិនបើនិយោជកមិនបានអនុវត្តស្របតាមប្រកាស ហើយក្រសួងការងារមិនបានចាត់មន្ត្រីចុះធ្វើការតាមដាន ដោយយកចិត្តទុកដាក់ទេនោះ ។យោងតាមប្រកាសរបស់ក្រសួងការងារនិងបណ្តុះបណ្តាលវិជ្ជាជីវៈ ត្រង់ប្រការ២បានលើកឡើងថា ការផ្តល់ប្រាក់បំណាច់អតីតភាពការងារ២(ពីរ)ដងក្នុងមួយឆ្នាំ ត្រូវអនុវត្តចាប់ពីឆ្នាំ២០១៩ តទៅ ស្របតាមបែបបទដូចជា ៖
ទី១-និយោជកត្រូវផ្តល់ឲ្យកម្មករនិយោជិត ដែលកំពុងបម្រើការងារនូវប្រាក់ចំណាច់អតីតភាពការងារដែលស្មើនឹងប្រាក់ឈ្នូល និងប្រាក់បន្ទាប់បន្សំចំនួន១៥ថ្ងៃក្នុងមួយឆ្នាំ ។ ប្រាក់បំណាច់នេះត្រូវបើកជូួនកម្មករនិយោជិតចំនួនប្រាំពីរថ្ងៃកន្លះ នៅក្នុងខែមិថុនា នៃឆ្នាំនីមួយៗ និងប្រាំពីរថ្ងៃកន្លះនៅក្នុងខែធ្នូ នៃឆ្នាំនីមួយៗ ។ ទី២-ចំពោះកម្មករនិយោជិតដែលចូលធ្វើការនៅក្នុងឆ្នាំដំបូង ហើយបានបំពេញការងារជាប់ជានិច្ចចាប់ពី១ខែទៅដល់៦ខែ និយោជកត្រូវផ្តល់ឲ្យកម្មករនូវប្រាក់បំណាច់អតីតភាពការងារចំនួន៧,៥(ប្រាំពីរកន្លះ)ថ្ងៃ ។ ទី៣-ការបើកប្រាក់បំណាច់អតីតភាពការងារមុនឆ្នាំ២០១៩ របស់កម្មករនិយោជិត ដែលបាននិង កំពុងបម្រើការងារនៅតាមគ្រឹះស្ថាន ត្រូវអនុវត្តតាមបែបបទដូចជា ៖
ចំពោះសហគ្រាស គ្រឹះស្ថានផ្នែកវាយនភណ្ឌកាត់ដេរនិងផលិតស្បែកជើង និយោជកត្រូវបើករំឭកចំនួន៣០ថ្ងៃ នៃប្រាក់បំណាច់អតីតភាពការងារសរុបរៀងរាល់១ឆ្នាំម្តង ដោយចំនួន១៥ថ្ងៃនៅក្នុងខែមិនថុនា នៃឆ្នាំនីមួយៗ និងចំនួន១៥ថ្ងៃនៅក្នុងខែធ្នូនៃឆ្នាំនីមួយៗ ។ចំពោះសហគ្រាស គ្រឹះស្ថាន ផ្នែកផ្សេងពីវាយនភណ្ឌកាត់ដេរ និងផលិតស្បែកជើង និយោជកត្រូវបើករំឭកចំនួន១៥ថ្ងៃ នៃប្រាក់បំណាច់អតីតភាពការងារសរុបរៀងរាល់មួយឆ្នាំម្តង ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ