រាជធានីភ្នំពេញ ៖ នៅឆ្នាំ២០២០នេះ ថ្ងៃឈប់សម្រាកប្រចាំឆ្នាំរបស់មន្ត្រីរាជការ កម្មករ និយោជិត មានត្រឹម២២ថ្ងៃប៉ុណ្ណោះ ពោលគឺត្រូវបានកាត់បន្ថយចំនួន៦ថ្ងៃ បើធៀបនឹងឆ្នាំកន្លងទៅ ។…
រាជធានីភ្នំពេញ ៖ នៅឆ្នាំ២០២០នេះ ថ្ងៃឈប់សម្រាកប្រចាំឆ្នាំរបស់មន្ត្រីរាជការ កម្មករ និយោជិត មានត្រឹម២២ថ្ងៃប៉ុណ្ណោះ ពោលគឺត្រូវបានកាត់បន្ថយចំនួន៦ថ្ងៃ បើធៀបនឹងឆ្នាំកន្លងទៅ ។ បើទោះបីថ្ងៃឈប់សម្រាកប្រចាំឆ្នាំត្រូវបានកាត់បន្ថយក្តី តែថ្ងៃឈប់សម្រាកពេលបុណ្យចូលឆ្នាំថ្មីប្រពៃណីជាតិ ត្រូវបានដំឡើងដល់ទៅ៤ថ្ងៃ ដែលពីដើមមកមានតែ៣ថ្ងៃទេ ។
យោងតាមអនុក្រឹត្យស្តីពីប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ២០២០ ដែលចុះហត្ថលេខាដោយសម្តេចតេជោនាយករដ្ឋមន្ត្រី ហ៊ុន សែន កាលពីខែសីហា ឆ្នាំ២០១៩ បានបង្ហាញថា ឆ្នាំ២០២០ ព្រះរាជពិធីបុណ្យចម្រើនព្រះជន្មព្រះមហាក្សត្រ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ត្រូវបានកាត់បន្ថយ២ថ្ងៃ ពោលគឺថ្ងៃឈប់សម្រាកនៅសល់តែ១ថ្ងៃ ។
ឯពិធីបុណ្យចំនួន៥ផ្សេងទៀត មិនត្រូវបាន អនុញ្ញាតឱ្យឈប់សម្រាកទៀតឡើយ ដែលពិធីបុណ្យទាំង៥នោះរួមមាន៖ បុណ្យមាឃបូជា ទិវាជាតិនៃការចងចាំ២០ឧសភា ទិវាកុមារអន្តរជាតិ១មិថុនា ទិវារំឭកខួបនៃកិច្ចព្រមព្រៀងសន្តិភាពទីក្រុងប៉ារីស២៣តុលា និងទិវាសិទ្ធិមនុស្ស ១០ធ្នូ ។
ថ្ងៃឈប់សម្រាកនៅឆ្នាំ២០២០នេះរួមមាន ៖
១-ថ្ងៃចូលឆ្នាំសកល ១មករា សម្រាក១ថ្ងៃ
២-ទិវាជ័យជម្នះលើរបបប្រល័យពូជសាសន៍ ៧ មករា សម្រាក ១ថ្ងៃ
៣-ទិវាអន្តរជាតិនារី ៨ មីនា សម្រាក ១ថ្ងៃ
៤-ពិធីបុណ្យចូលឆ្នាំថ្មីប្រពៃណីជាតិ សម្រាក ៤ថ្ងៃ (១៣-១៤-១៥-១៦ មេសា)
៥-ទិវាពលកម្មអន្តរជាតិ ១ឧសភា សម្រាក ១ថ្ងៃ
៦-ពិធីបុណ្យវិសាខបូជា ថ្ងៃ៦ ឧសភា សម្រាក១ថ្ងៃ
៧-ព្រះរាជពិធីច្រត់ព្រះនង្គ័ល នៅថ្ងៃទី១០ ឧសភា សម្រាក១ថ្ងៃ
៨-ព្រះរាជពិធីបុណ្យចម្រើនព្រះជន្មព្រះមហាក្សត្រ នៅថ្ងៃទី១៤ ឧសភា សម្រាក ១ថ្ងៃ
៩-ព្រះរាជពិធីបុណ្យចម្រើនព្រះជន្មសម្តេច
ព្រះមហាក្សត្រី នៅថ្ងៃទី១៨ ខែមិថុនា សម្រាក ១ថ្ងៃ
១០-ពិធីបុណ្យភ្ជុំបិណ្ឌ សម្រាក ៣ថ្ងៃ (១៦-
១៧-១៨ កញ្ញា)
១១-ទិវាប្រកាសរដ្ឋធម្មនុញ្ញថ្ងៃ២៤ កញ្ញា សម្រាក ១ថ្ងៃ
១២-ទិវាប្រារព្ធពិធីគោរពព្រះវិញ្ញាណក្ខន្ធ ព្រះបរមរតនកោដ្ឋ នរោត្តម សីហនុ ថ្ងៃ១៥ តុលា សម្រាក ១ថ្ងៃ
១៣-ព្រះរាជពិធីគ្រងព្រះបរមរាជសម្បត្តិរបស់ព្រះករុណាសម្តេចព្រះបរមនាថ នរោត្តម សីហមុនី ថ្ងៃ២៩ តុលា សម្រាក ១ថ្ងៃ
១៤-ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក សម្រាក៣ថ្ងៃ (៣០-៣១ តុលា និង ១ វិច្ឆិកា)
១៥-ពិធីបុណ្យឯករាជ្យជាតិ ៩ វិច្ឆិកា សម្រាក១ថ្ងៃ ។
សូមបញ្ជាក់ថា បណ្តាឆ្នាំកន្លងទៅ ថ្ងៃឈប់សម្រាកមានរហូតដល់២៨ថ្ងៃ ដែលចំនួនថ្ងៃឈប់សម្រាកមានចំនួនច្រើនជាងបណ្តាប្រទេសដទៃ ។ ការឈប់សម្រាកច្រើនថ្ងៃនេះ ត្រូវបានមើលឃើញថា បណ្តាលឱ្យប៉ះពាល់ដល់សង្វាក់ផលិតកម្ម ហើយមានការទទូចជាច្រើនពីភាគីនិយោជកចង់ឱ្យមានការកាត់បន្ថយថ្ងៃឈប់សម្រាកនេះ ។
ឆ្លើយតបតាមសំណូមពររបស់និយោជក និងដើម្បីធានាដល់ភាពប្រកួតប្រជែង ក៏ដូចជាបំពេញតម្រូវការទីផ្សារផលិតផលនោះ រាជរដ្ឋាភិបាលបានសម្រេចកាត់បន្ថយថ្ងៃឈប់សម្រាកចំនួន៦ថ្ងៃ នៅឆ្នាំ២០២០នេះ ហើយក៏អាចនឹងអនុវត្តនៅឆ្នាំបន្តបន្ទាប់ផងដែរ ។ ការកាត់បន្ថយថ្ងៃឈប់សម្រាកនេះ ត្រូវបានរំពឹងថា នឹង
រួមចំណែកជួយទាក់ទាញអ្នកវិនិយោគមកកាន់កម្ពុជាថែមទៀត ៕
ចែករំលែកព័តមាននេះ