ទីផ្សារការងាររបស់ប្រទេសកម្ពុជាពោរពេញទៅដោយក្រុមហ៊ុនដែលប្រកួតប្រជែងគ្នា ដើម្បីដណ្តើមយកបុគ្គលិកដែលមានសមត្ថភាពខ្ពស់ដើម្បីជំរុញដល់ការលូតលាស់ទៅមុខរបស់ក្រុមហ៊ុន និងអាជីវកម្មទាំងតូច ទាំងធំ ។ ដើម្បីទាក់ទាញអ្នកដែលមានសមត្ថភាពនិងទេពកោសល្យ ក្រុមហ៊ុន និងអាជីវកម្មជាច្រើនផ្តោតស្មារតីលើការផ្តល់កញ្ចប់អត្ថប្រយោជន៍ផ្សេងៗដល់បុគ្គលិក ដោយមើលរំលងកត្តាសំខាន់មួយដែលបុគ្គលិកផ្តល់តម្លៃលើនោះ គឺវប្បធម៌នៅកន្លែងការងារ ។
វប្បធម៌នៅកន្លែងការងារអាចជះឥទ្ធិពលលើការជ្រើសរើសក្រុមហ៊ុន ការបន្តនៅក្រុមហ៊ុន ឬការចាកចេញពីក្រុមហ៊ុន ឬអាជីវកម្មណាមួយ ។ ដូច្នេះសម្រាប់អ្នកដែលចង់បង្កើនប្រាក់ចំណូល និងពង្រីកក្រុមហ៊ុនទៅមុខ ការពង្រឹងវប្បធម៌នៅកន្លែងការងារអាចជួយឲ្យអ្នកសម្រេចគោលដៅនេះបានព្រោះតែអត្ថប្រយោជន៍ខាងក្រោមនេះ៖
១. ប្រសិទ្ធិភាពការងារបុគ្គលិកកើនឡើង៖
វប្បធម៌ល្អនៅកន្លែងការងារប្រៀបបានជាដែកឆក់ដែលរក្សាបុគ្គលិកល្អៗឲ្យបន្តនៅធ្វើការឲ្យក្រុមហ៊ុន ឬអាជីវកម្មរបស់អ្នក ។ ពេលដែលបុគ្គលិកគិតថាពួកគេស័ក្កិសមនឹងក្រុមហ៊ុន ពួកគេបង្កើតចំណងមនោសញ្ចេតនាជាមួយនឹងការងារ និងបុគ្គលិករបស់ពួកគេ ។ ហើយចំណងនេះបង្កើនដល់ប្រសិទ្ធិភាពការងាររបស់ពួកគេផងដែរ ។
២. អ្នកដែលមានសមត្ថភាពខ្ពស់នឹងចង់ធ្វើការឲ្យអ្នក៖
វប្បធម៌ល្អអាចផ្តល់ជាភាពទាក់ទាញដល់អ្នកដទៃពេលដែលបុគ្គលិករបស់អ្នកប្រាស្រ័យទាក់ទងជាមួយនឹងអតិថិជន ឬសន្ទនាជាមួយនឹងក្រុមគ្រួសារនិងមិត្តភក្តិជាដើម ។ អ្នកដែលមានទេព្យកោសល្យ និងសមត្ថភាពខ្ពស់នឹងចាប់អារម្មណ៍លើក្រុមហ៊ុន ឬអាជីវកម្មអ្នកដែលធ្វើឲ្យអ្នកអាចទាក់ទាញបុគ្គលិកបន្ថែមជាដើម ។
៣. មនុស្សដែលមិនស័ក្កិសមនឹងចាកចេញដោយខ្លួនឯង៖
វប្បធម៌នៅកន្លែងការងារក៏អាចបណ្តេញមនុស្សដែលមិនស័ក្កិសមនឹងបរិស្ថានការងារដែរប្រសិនបើពួកគេមិនអាចសម្របខ្លួននឹងវាបាន ។ វប្បធម៌ជាអ្វីដែលកំណត់អាកប្បកិរិយាដែលសមរម្យ និងមិនសមរម្យសម្រាប់បុគ្គលិកអ្នក ។ បើកន្លែងការងារអ្នកមានវប្បធម៌រឹងមាំនោះសកម្មភាពរបស់ពួកគេនឹងស្របទៅតាមវប្បធម៌ដែលបានកំណត់ ៕ កែសម្រួលដោយ ៖ សុឃាក់
ចែករំលែកព័តមាននេះ