នៅកណ្តាលរាត្រីថ្ងៃទី៣១ ខែធ្នូ មនុស្សម្នាជាច្រើនបានមកនៅតាមដងទន្លេដើម្បីអបអសាទរឆ្នាំថ្មីឆ្នាំ២០២០ ខណៈដែលអ្នកខ្លះទៀតនាំគ្នាជួបជុំគ្រួសារសប្បាយនៅតាមផ្ទះរៀងៗខ្លួន ។ ប៉ុន្តែតើនឹងមានអ្វីកើតឡើងសម្រាប់ប្រទេសកម្ពុជានិងប្រជាជនកម្ពុជានៅឆ្នាំ២០២០នេះ ?
ចំហាយនយោបាយ និងសេដ្ឋកិច្ចនៅឆ្នាំ២០១៩ ប្រហែលជានឹងបន្តមានឥទ្ឋិពលដល់ ឆ្នាំ២០២០ទៀត ។ ខែមករាឆ្នាំ២០២០ នឹងក្លាយជាពេលវេលាដ៏សំខាន់មួយនៅពេលដែលសំណុំរឿងរបស់លោក កឹម សុខា នឹងត្រូវបើកការជំនុំជម្រះនៅថ្ងៃទី១៥ ខែមករា បន្ទាប់ពីរូបលោកត្រូវបានចោទប្រកាន់ពីបទក្បត់ជាតិនិងត្រូវឃុំខ្លួនអស់រយៈពេលពីរឆ្នាំមុនពេលដែលបានសេរីភាពនៅក្នុងការដើរហើរក្នុងប្រទេសកម្ពុជា ប៉ុន្តែមិនមានសិទ្ធិធ្វើនយោបាយ ។
បើសិនជាលោក កឹម សុខា ត្រូវបានតុលាការរកឃើញថាគ្មានកំហុស រូបលោកនឹងត្រូវ ដោះលែងឱ្យមានសេរីភាពពេញលេញ ។ ពេលនោះស្ថានភាពនយោបាយនឹង ត្រូវវិលត្រឡប់មករកធម្មតាវិញ ។ សេរីភាពដ៏ពេញលេញនោះក៏នឹងជាតម្រុយផងដែរថា សហភាពអឺរ៉ុបនឹងថែរក្សាគម្រោងអ្វីៗទាំងអស់លើកលែងតែអាវុធ ឬ EBA សម្រាប់ កម្ពុជាដោយធ្វើឱ្យកម្ពុជានៅតែមានសិទ្ធិរួចពន្ធសម្រាប់ការនាំចេញទំនិញទៅកាន់ទីផ្សារអឺរ៉ុប ។ ប៉ុន្តែបើសិនជាលោក កឹម សុខា នឹងត្រូវកាត់ទោស ដោយតុលាការក្រុងភ្នំពេញឱ្យមានទោសពីបទក្បត់ជាតិមែននោះ ស្ថានភាពនយោបាយអាចនឹងមានការប្រែប្រួល និងស្មុគស្មាញ ។ បើសិនជាលោក កឹម សុខា ប្តឹងឧទ្ទរណ៍ចំពោះការសម្រេចចិត្តរបស់តុលាការក្រុងភ្នំពេញ រឿងក្តីនឹងមិនត្រូវចប់ហើយវានឹងអួសបន្លាយពេលវេលាបន្តទៀត ដែលគេពិបាកនឹងដឹងថាតើនឹងយូរប៉ុណ្ណា ។
ក្នុងដំណើរផ្លូវមួយនេះ ពន្លឺសេរីភាព ពេញលេញសម្រាប់លោក កឹម សុខា វាប្រៀបដូចជាស្ថិតនៅក្នុងរូងដ៏ងងឹតមួយ ។ លទ្ឋភាពមួយទៀតដែលអាចកើតមានឡើង គឺបន្ទាប់ពីតុលាការក្រុងភ្នំពេញកាត់ក្តីឱ្យលោក កឹម សុខា មានទោសហើយ ការលើកលែងទោសមួយនឹងត្រូវធ្វើឡើង ដោយព្រះមហាក្សត្រតាមរយះការស្នើសុំពីនាយករដ្ឋមន្ត្រីគឺសម្តេចតេជោ ហ៊ុន សែន ។ បើសិនជាមានដំណោះស្រាយផ្នែកនយោបាយតាមច្រកនេះជម្រើសនេះក៏អាចនាំឱ្យស្ថានភាពនយោបាយអាចវិលត្រឡប់ទៅរកភាពធម្មតាវិញដែរ ។ ប៉ុន្តែតើសហភាព អឺរ៉ុបនឹងរក្សាគម្រោងEBA វិញសម្រាប់កម្ពុជាឬក៏អត់នោះ វាជាអ្វីដែលយើងត្រូវតាមមើលបន្តទៀត។ ខែកុម្ភៈ ខាងមុខនេះក៏ជាពេលវេលាសំខាន់មួយទៀត ពីព្រោះវាជាពេលដែលសហភាពអឺរ៉ុបត្រូវសម្រេចថាតើត្រូវព្យួរ EBA សម្រាប់កម្ពុជាឬក៏បន្តផ្តល់ឱ្យទៀត ។ អ្នកវិភាគច្រើនគិតថាការសម្រេចចិត្តរបស់សហភាពអឺរ៉ុបអាចធ្វើឱ្យប៉ះពាល់ដល់ការរីកចម្រើនសេដ្ឋកិច្ចរបស់ប្រទេសកម្ពុជា បើទោះបីជាកម្ពុជានៅតែរំពឹងថាខ្លួនអាចថែរក្សាកំណើនសេដ្ឋកិច្ចប្រមាណជា៧ភាគរយក្នុងមួយឆ្នាំក៏ដោយ ។ នៅពេលថ្មីៗនេះ មូលនិធិរូបិយវត្ថុអន្តរជាតិIMF បាននិយាយថា សេដ្ឋកិច្ចកម្ពុជាអាចនឹងប្រឈម បើសិនជាកម្ពុជាបាត់បង់EBA ។
ដោយពិចារណាទៅលើទីផ្សារដ៏ធំ របស់សហភាពអឺរ៉ុបសម្រាប់ទំនិញកម្ពុជានោះ ទោះតិចឬច្រើនវានឹងនាំឱ្យមានផលប៉ះពាល់ដល់ឧស្សាហកម្មកាត់ដេរកម្ពុជា ដែលផ្តល់ការងារធ្វើដល់កម្មករជិតមួយលាននាក់ ដោយមិនទាន់គិតដល់មុខរបរតូចៗ ដែលទាក់ទងនឹងវិស្ស័យនេះ ។ ទំហំនៃការនាំចេញរបស់កម្ពុជាទៅកាន់ទីផ្សារអឺរ៉ុប មានតម្លៃជាទឹកប្រាក់ចំនួនជិត៦០០០លានដុល្លារនៅឆ្នាំ២០១៨ ដោយបីភាគបួននៃចំនួននេះគឺការនាំចេញសម្លៀកបំពាក់និងស្បែកជើង ។ ប៉ុន្តែកម្ពុជាបានអះអាងពីការត្រៀមរបស់ខ្លួនសម្រាប់ហេតុការណ៍ណាមួយដែលឈានដល់ការបាត់បង់នEBA ។ នៅខែវិច្ឆិកាឆ្នាំ២០២០ កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ីអឺរ៉ុបដែល នឹងមានការចូលរួមរបស់មេដឹកនាំពិភពលោកជាច្រើន ។ នេះជាព្រឹតិ្តការណ៍ដ៏ធំនិងសំខាន់ មួយផងដែរសម្រាប់ប្រទេសកម្ពុជា ។ បច្ចុប្បន្ននេះ កិច្ចប្រជុំអាស៊ីនិងអឺរ៉ុប ASEM មានសមាជិកចំនួន៥១ប្រទេស ។ ប្រជាជននៅក្នុងតំបន់ASEM នេះមានចំនួន៦០ភាគរយ នៃប្រជាជននៅលើពិភពលោកហើយមានចំណែក៦៥ភាគរយនៃសេដ្ឋកិច្ចពិភពលោក ។
កម្ពុជាចាត់ទុកព្រឹត្តិការណ៍នេះ ជាព្រឹត្តិការណ៍ដ៏សំខាន់បំផុតមួយសម្រាប់ប្រទេស ។ លោក ប្រាក់ សុខុន រដ្ឋមន្ត្រីការបរទេសនិងកិច្ចសហប្រតិបត្តិការអន្តរជាតិធ្លាប់ បាននិយាយថាកម្ពុជានឹងទទួលបានផលប្រយោជន៍ជាច្រើនពីកិច្ចប្រជុំកម្រិតពិភពលោកមូយនេះ ។ វានឹងក្លាយជាឱកាសមាសសម្រាប់កម្ពុជាបង្ហាញពីពីសមត្ថភាពនិង សមិទ្ធផលរបស់ខ្លួនហើយនិងពង្រឹងសហប្រតិបត្តិការនិងភាពជាដៃគូជាមួយប្រទេសទាំងអស់ជាសមាជិក ។ ជាមួយនឹងព្រិត្តិការណ៍សំខាន់ៗជាច្រើននឹងកើតមានឡើងនោះ ឆ្នាំ២០២០នេះនឹង ក្លាយជាឆ្នាំមួយដែលមនុស្សម្នានឹងតាមដានដោយយកចិត្តទុកដាក់ចំពោះកម្ពុជា ៕
ចែករំលែកព័តមាននេះ