ខេត្តសៀមរាប ៖ ក្រុមជនសង្ស័យចំនួន៣នាក់ខណៈកំពុងធ្វើសកម្មភាពលួចកាត់ខ្សែភ្លើង ព្រមទាំងសង្ស័យថាមានផ្ទុកសារធាតុញៀនក្នុងខ្លួន ត្រូវបានប៉ូលិសប៉ុស្តិ៍សង្កាត់ស្លក្រាមឃាត់ខ្លួនរួចបញ្ជួនទៅសួរនាំ ដើម្បីរៀបចំកសាងសំណុំរឿងបញ្ជូនទៅតុលាការខេត្តដើម្បីចាត់ការទៅតាមផ្លូវច្បាប់។
ហេតុការណ៍ឃាត់ខ្លួនជនសង្ស័យ៣នាក់ខាងលើនេះធ្វើឡើងកាលពីវេលាម៉ោង១និង៤០នាទីយប់អាធ្រាត្រឈានចូលថ្ងៃទី១ ខែមករា ឆ្នាំ២០២០ ស្ថិតនៅភូមិមណ្ឌល៣ សង្កាត់ស្លក្រាម ក្រុងសៀមរាប ។
បើតាមប្រភពពីមន្ត្រីប៉ូលិសប៉ុស្តិ៍សង្កាត់ស្លក្រាម បានប្រាប់ថា ជនសង្ស័យចំនួន៣នាក់ខាងលើនេះរួមមាន ១-ឈ្មោះ ហាក់ ចាន់ស៊ីម ភេទប្រុស អាយុ២៥ឆ្នាំ មានទីលំនៅភូមិបឹងដូនប៉ាសង្កាត់ស្លក្រាម ក្រុងសៀមរាប ២-ឈ្មោះ ហាក់ ចាន់ស៊ី ភេទប្រុស អាយុ២៤ឆ្នាំ មានទីលំនៅ ភូមិគោកស្រុក ឃុំពួក ស្រុកពួក ខេត្តសៀមរាប ៣-ឈ្មោះ ហម ផានិត ភេទប្រុស អាយុ២២ឆ្នាំ មានទីលំនៅភូមិមណ្ឌល៣ សង្កាត់ស្លក្រាម ក្រុងសៀមរាប។ ចំណែកជនរងគ្រោះឈ្មោះ វ៉ាន់ មេត្តា ភេទប្រុស អាយុ២៦ឆ្នាំ មុខរបរជាងទង មានទីលំនៅ ក្រុមទី១ ភូមិទ្រាំង សង្កាត់ស្លក្រាម ក្រុងសៀមរាប។
តាមប្រភពបានបញ្ជាក់ថា មុនពេលកើតហេតុ កាលពី១និង៤០នាទីឈានចូលថ្ងៃទី១ ខែមករា ឆ្នាំ២០១៩ កម្លាំងសមត្ថកិច្ចបានទទួលព័ត៌ មានពីប្រជាពលរដ្ឋម្នាក់ឈ្មោះ ញែម សុភឿន ភេទប្រុស អាយុ៣៤ឆ្នាំ រស់នៅក្បែរកន្លែងកើតហេតុខាងលើ បានរាយការណ៍ប្រាប់សមត្ថកិច្ចថា មានជនសង្ស័យចំនួន៣នាក់ កំពុងធ្វើសកម្មភាពលួចកាត់ខ្សែភ្លើងនៅចំណុច ជាប់របងខាងជើងមជ្ឈមណ្ឌលអប់រំយុវជនកម្ពុជា ស្ថិតនៅភូមិមណ្ឌល៣ សង្កាត់ស្លក្រាម ក្រុងសៀមរាប ។
តាមប្រភពព័ត៌មានបានបន្តថា ក្រោយពីទទួលបានព័ត៌មានខាងលើភ្លាម សមត្ថកិច្ចប៉ុស្តិ៍បានដឹកនាំកម្លាំងចុះទៅដល់កន្លែងកើតហេតុ ហើយធ្វើការឃាត់ខ្លួនជនសង្ស័យចំនួន៣នាក់ភ្លាមៗ ព្រមទាំងដកហូតវត្ថុតាងរួមមាន ប៊ិចសម្រាប់វាស់ភ្លើងមួយដើម ពណ៌ស្លាទុំលាយប្រផេះ, កូនកាំបិតដងពណ៌ខ្មៅមួយដើម, ដង្កាប់កាត់ខ្សែភ្លើងមួយដើម, ស្រោមដៃពណ៌ក្រហមលាយខ្មៅមួយចំហៀង, ខ្សែភ្លើងប្រវែង២ម៉ែត្រ កូនកាបូបស្ពាយចំហៀងពណ៌ទឹកដោះ គោចំនួន១, ទូរស័ព្ទដៃណូគាអ៊ិនចុចពិលចំនួន២គ្រឿង និងម៉ូតូមួយគ្រឿង ម៉ាកហុងដា ធុនសេ១០០ ពណ៌ស្លែ ស៊េរីឆ្នាំ២០០១ពាក់ផ្លាកលេខ សៀមរាប ១H -៦៩៦៨ ។
បន្ទាប់ពីធ្វើការឃាត់ខ្លួនបានភ្លាម កម្លាំងនគរបាលប៉ុស្តិ៍នាំខ្លួនជនសង្ស័យទាំង៣នាក់ យកមកសួរនៅប៉ុស្តិ៍ ហើយនៅចំពោះមុខសមត្ថកិច្ច ជនសង្ស័យទាំង៣នាក់បានឆ្លើយសារភាពថា ពួកខ្លួនពិតជាបានធ្វើសកម្ម ភាពកាត់យកខ្សែភ្លើង និងប្រើប្រាស់នូវសារធាតុញៀនប្រាកដមែន។
បច្ចុប្បន្ន ជនសង្ស័យដែលកម្លាំងនគរបាលប៉ុស្តិ៍សង្កាត់ស្លក្រាមឃាត់ខ្លួនបាននោះ កំពុងកសាងសំណុំរឿងបញ្ជូនទៅអធិការដ្ឋាននគរបាលក្រុងសៀមរាប ដើម្បីសួរនាំបន្ត រួចរៀបចំកសាងសំណុំរឿងបញ្ជូនបន្តទៅតុលាការខេត្តចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ