រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន ដែលតែងតែគិតគូរចំពោះជីវភាពរស់នៅរបស់មន្ត្រីរាជការ និងកម្លាំងប្រដាប់អាវុធគ្រប់ប្រភេទនោះ កាលពីថ្ងៃទី៤ ខែធ្នូ ឆ្នាំ២០១៩ កន្លងមក បានចុះហត្ថលេខាលើអនុក្រឹត្យលេខ១៩២ អនក្រ.បក ស្តីពីការកែប្រែតម្លៃឯកតានៃសន្ទស្សន៍បៀវត្សរ៍មូលដ្ឋានរបស់មន្ត្រីរាជការឆ្នាំ២០២០ ។
អនុក្រឹត្យនេះ សម្រេចកែប្រែឯកតានៃសន្ទស្សន៍បៀវត្សរ៍មូលដ្ឋានពីចំនួន២៣៤០រៀល ទៅចំនួន២៥០០រៀលក្នុងមួយសន្ទស្សន៍ ដែលចាប់អនុវត្តពីថ្ងៃទី១ ខែមករា ឆ្នាំ២០២០តទៅ ។ការដំឡើងឯកតានៃសន្ទស្សន៍បៀវត្សរ៍មូលដ្ឋានពីចំនួន២៣៤០រៀល ទៅចំនួន២៥០០រៀល នេះ ធ្វើឲ្យកម្រិតប្រាក់បៀវត្សរ៍ទាបបំផុតរបស់មន្ត្រីរាជការស៊ីវិល គ្រូបង្រៀន គ្រូពេទ្យ នគរបាលជាតិ និងយោធិន ចាប់ពីខែមករា ឆ្នាំ២០២០គឺ៖
១-មន្ត្រីរាជការស៊ីវិល៖ ពីប្រមាណ១.១០០.១០០រៀល ឆ្នាំ២០១៩ ដល់ប្រមាណ១.១៤២.៥០០រៀល នៅខែមករា ឆ្នាំ២០២០ ។២-គ្រូបង្រៀន និងគ្រូពេទ្យ៖ ពីប្រមាណ១.២០០.១០០រៀល ឆ្នាំ២០១៩ ដល់ប្រមាណ១.២៤២.៥០០រៀល នៅខែមករា ឆ្នាំ២០២០។ ៣-នគរបាលជាតិ(ពលបាលត្រី)៖ ពីប្រមាណ១.១៨៤.៥៧៧រៀល(ដោយគិតបញ្ចូលរបបអង្ករ) ឆ្នាំ២០១៩ ដល់ប្រមាណ១.២២៦.៩៧៧រៀល (គិតបញ្ចូលរបបអង្ករ) នៅខែមករា ឆ្នាំ២០២០ ។ ៤-យោធិន(ពលទោ)៖ ពីប្រមាណ១.០៥៥៩០០រៀល ឆ្នាំ២០១៩ ដល់ប្រមាណ១,០៩៣.៥០០រៀល នៅខែមករា ឆ្នាំ២០២០ (មិនគិតបញ្ចូលរបបអង្ករ) ។
សម្រាប់ឆ្នាំ២០២០ ប្រាក់បំណាច់របស់មន្ត្រីជាប់កិច្ចសន្យានឹងត្រូវបានដំឡើងដល់ចំនួន ៦៧០.០០០រៀល។ ដោយឡែក សម្រាប់ការដំឡើងប្រាក់បំណាច់មុខងារ នៅខែមេសា ឆ្នាំ២០២០វិញ នឹងធ្វើឲ្យកម្រិតប្រាក់បៀវត្សរ៍ទាបបំផុតរបស់មន្ត្រីរាជការ និងកងកម្លាំងប្រដាប់អាវុធកើនឡើង ៖
១-មន្ត្រីរាជការស៊ីវិល៖ ចាប់ពីខែមេសា ឆ្នាំ២០២០ ឡើងដល់១.១៧២.៥០០រៀល ។២-គ្រូបង្រៀននិងគ្រូពេទ្យ៖ ចាប់ពីខែមេសា ឆ្នាំ២០២០ ឡើងដល់១.២៧២.៥០០រៀល ។៣-នគរបាលជាតិ(ពលបាលត្រី)៖ ចាប់ពីខែមេសា ឆ្នាំ២០២០ ឡើងដល់១.២៥៦.៩៧៧រៀល (គិតបញ្ចូលរបបអង្ករ) ។៤-យោធិន(ពលទោ)៖ ចាប់ពីខែមេសា ឆ្នាំ២០២០ ឡើងដល់១.១២៣.៥០០រៀល(មិនគិតបញ្ចូលរបបអង្ករ) ហើយបើគិតបញ្ចូលរបបអង្ករត្រូវជាប្រមាណ ១.១៨១.៩៧៧រៀល ។ថ្លែងក្នុងកិច្ចប្រជុំគណៈរដ្ឋមន្ត្រី កាលថ្ងៃទី២៥ ខែតុលា ឆ្នាំ២០១៩ សម្តេចតេជោ នាយក រដ្ឋមន្ត្រី ហ៊ុន សែន បានបញ្ជាក់ថា «ចាប់ តាំងពីនីតិកាលទី៥នៃរដ្ឋសភាមក ក្នុងការអនុវត្តគោលនយោបាយលើកកម្ពស់ជីវភាពរស់នៅរបស់មន្ត្រីរាជការស៊ីវិលគ្រូបង្រៀន គ្រូពេទ្យ នគរបាលជាតិ និងយោធិន ក៏ដូចជាកម្មករនិយោជិត រាជរដ្ឋាភិបាលបានខិតខំផ្តោតការយកចិត្តទុកដាក់ជាប្រចាំ ក្នុងការដំឡើងប្រាក់បៀវត្សរ៍អប្បបរមា និងប្រាក់ឈ្នួលអប្បបរមា ។
ស្របជាមួយគ្នានេះ រាជរដ្ឋាភិបាលតែងគិតគូរឲ្យប្រាក់បៀវត្សរ៍អប្បបរមា និងប្រាក់ឈ្នួលអប្បបរមា ដែលត្រូវបានដំឡើងនោះ ត្រូវតែរួចផុតពីកាតព្វកិច្ចបង់ពន្ធលើប្រាក់បៀវត្សរ៍ ក្នុងស្មារតីសម្រាលបន្ទុកសម្រាប់មន្ត្រីរាជការ ក៏ដូចជាកម្មករនិយោជិតមួយកម្រិតថែមទៀត»។ក្រៅពីដំឡើងប្រាក់បៀវត្សរ៍ហើយនោះ សម្តេចតេជោ ហ៊ុន សែន ក៏បានកែសម្រួលពិតានប្រាក់បៀវត្សរ៍អប្បបរមានេះ មិនឲ្យជាប់ពន្ធលើប្រាក់បៀវត្សរ៍នោះឡើយ ទាំងមន្ត្រីរាជការ កម្លាំងប្រដាប់អាវុធ និងកម្មករនិយោជិត ។ សម្តេចតេជោនាយករដ្ឋមន្ត្រី ក៏បានបញ្ជាក់ដែរថា នៅឆ្នាំ២០២០ មន្ត្រីរាជការ កងកម្លាំង ប្រដាប់អាវុធ មានប្រាក់បៀវត្សរ៍ចាប់ពី១លាន៣សែនរៀលឡើងទៅទើបជាប់ពន្ធ ៕
ចែករំលែកព័តមាននេះ