រាជធានីភ្នំពេញ ៖ បន្ទប់ផ្ទះសំណាក់ជាន់ទី៣ ខណៈពេលអត់មានមនុស្សនៅ ស្រាប់តែឆ្លងចរន្តអគ្គិសនី បណ្ដាលឲ្យឆាបឆេះហុយផ្សែងខ្មួលខ្មាញ់ បង្កការភ្ញាក់ផ្អើលដល់ប្រជាពលរដ្ឋ និងរថយន្តពន្លត់អគ្គីភ័យចុះមកជួយអន្តរាគមន៍បាញ់ទឹកពន្លត់ជាច្រើនគ្រឿង ។ ហេតុការណ៍ខាងលើនេះបានបង្កអោយមានការភ្ញាក់ផ្អើលកាលពីវេលាម៉ោង៨និង៣០នាទីយប់ថ្ងៃទី១…
រាជធានីភ្នំពេញ ៖ បន្ទប់ផ្ទះសំណាក់ជាន់ទី៣ ខណៈពេលអត់មានមនុស្សនៅ ស្រាប់តែឆ្លងចរន្តអគ្គិសនី បណ្ដាលឲ្យឆាបឆេះហុយផ្សែងខ្មួលខ្មាញ់ បង្កការភ្ញាក់ផ្អើលដល់ប្រជាពលរដ្ឋ និងរថយន្តពន្លត់អគ្គីភ័យចុះមកជួយអន្តរាគមន៍បាញ់ទឹកពន្លត់ជាច្រើនគ្រឿង ។
ហេតុការណ៍ខាងលើនេះបានបង្កអោយមានការភ្ញាក់ផ្អើលកាលពីវេលាម៉ោង៨និង៣០នាទីយប់ថ្ងៃទី១ ខែមករា ឆ្នាំ២០២០ នៅបន្ទប់ផ្ទះសំណាក់ជាន់ទី៣ យីហោ សុខសប្បាយ២ ស្ថិតនៅផ្លូវ៣៧១សូឡា ភូមិទ្រា២ សង្កាត់ស្ទឹងមានជ័យ១ ខណ្ឌមានជ័យ ។
ម្ចាស់ផ្ទះសំណាក់ខាងលើឈ្មោះ សាយ ស៊ីវវ៉ាន់ ភេទប្រុស អាយុ៤៦ឆ្នាំ មុខរបរជាមន្ត្រីយោធា ស្នាក់នៅក្នុងភូមិឃុំកើតហេតុខាងលើ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គឺបន្ទប់ផ្ទះសំណាក់ជាន់ទី៣ខាងលើ គឺមិនទាន់មានមនុស្សមកជួលស្នាក់នៅនោះទេ គឺមានតែម្ចាស់ផ្ទះ និងអ្នកមើលការខុសត្រូវនៅអង្គុយជាន់ក្រោមតែប៉ុណ្ណោះ ។
តាមប្រភពដដែលបានបន្តថា លុះមកដល់វេលាម៉ោងកើតហេតុ ក៏ស្រាប់តែមានបងប្អូនប្រជាពលរដ្ឋដែលរស់នៅជិតខាងឃើញមានផ្សែងហុយខ្មួលខ្មាញ់ចេញពីបន្ទប់ខាងលើ ដោយមិនដឹងមូលហេតុអ្វី ទើបនាំគ្នាស្រែកផ្អើលឆោឡោថាមានភ្លើងឆេះ ។
តាមប្រភពដដែលបានបន្តថា ភ្លាមៗនោះដែរ បងប្អូនប្រជាពលរដ្ឋបាននាំគ្នាជួយយកបំពង់ពន្លត់អគ្គិភ័យទៅបាញ់អស់ចំនួន២បំពង់ តែមិនទាន់រលត់ នៅតែមានផ្សែងហុយខ្មួលខ្មាញ់បន្ថែមទៀត ទើបពួកគាត់រាយការណ៍ជូនសមត្ថកិច្ចមូលដ្ឋានសុំជំនួយរថយន្ដពន្លត់អគ្គីភ័យ របស់ស្នងការបង្ការនិងពន្លត់អគ្គីភ័យរាជធានីភ្នំពេញចំនួន៤គ្រឿង និងរថយន្តពន្លត់អគ្គីភ័យ របស់ក្រុមហ៊ុនស្រាបៀរកម្ពុជាចំនួន១គ្រឿង មកជួយបាញ់ពន្លត់អស់ទឹកចំនួន៤គ្រឿង ទើបភ្លើងរលត់ទៅវិញនៅវេលាម៉ោង៩និង១៥នាទីយប់ថ្ងៃដដែល ។
ក្នុងហេតុការណ៍នេះដែរ មិនបណ្ដាលឲ្យមានគ្រោះថ្នាក់ដល់មនុស្សណាម្នាក់នោះទេ គឺគ្រាន់តែខូចខាតសម្ភារដូចជាពូកខ្នើយអស់មួយចំនួនតែប៉ុណ្ណោះ ហើយក្នុងហេតុការណ៍នេះ សមត្ថកិច្ចបានសន្និដ្ឋានថា មកពីទុស្សេខ្សែភ្លើង ទើបបង្កជាអគ្គិភ័យឆាបឆេះបែបនេះ ៕ (កែសម្រួលដោយ ៖ ធីតា)
ចែករំលែកព័តមាននេះ