ខេត្តប៉ៃលិន ៖ មានការភ្ញាក់ផ្អើលមួយ បានកើតឡើងកាលពីរសៀលថ្ងៃទី៣០ ខែធ្នូ ឆ្នាំ២០១៩ ដោយសារភ្លើងឆេះព្រៃដែលផ្តើមចេញពីការដុតភ្នក់ភ្លើងកម្តៅខ្លួន របស់អ្នកភូមិហើយភ្លេចពន្លត់ក៏បង្កជាអគ្គិភ័យយ៉ាងសន្ធោសន្ធៅរាលដាលដល់ចម្ការដំណាំ ។ ដោយសារមិនអាចពន្លត់បាន…
ខេត្តប៉ៃលិន ៖ មានការភ្ញាក់ផ្អើលមួយ បានកើតឡើងកាលពីរសៀលថ្ងៃទី៣០ ខែធ្នូ ឆ្នាំ២០១៩ ដោយសារភ្លើងឆេះព្រៃដែលផ្តើមចេញពីការដុតភ្នក់ភ្លើងកម្តៅខ្លួន របស់អ្នកភូមិហើយភ្លេចពន្លត់ក៏បង្កជាអគ្គិភ័យយ៉ាងសន្ធោសន្ធៅរាលដាលដល់ចម្ការដំណាំ ។
ដោយសារមិនអាចពន្លត់បាន ទើបអ្នកភូមិភ័យស្លន់ស្លោបានរាយការណ៍ជូនសមត្ថកិច្ចឱ្យជួយអន្តរាគមន៍ ។ បន្ទាប់មកក៏មានរថយន្តពន្លត់អគ្គិភ័យជាច្រើនគ្រឿងបោះពួយមកជួយបាញ់ទឹក ទើបគ្រប់គ្រងស្ថានការណ៍បាននិងរលត់ទាំងស្រុងនៅល្ងាចថ្ងៃដដែល ។
ការចុះពន្លត់ភ្លើងឆេះព្រៃនេះដែរគេសង្កេតឃើញមានវត្តមានលោក ផាន់ ចាន់ធុល អភិបាលខេត្តប៉ៃលិន អមដំណើរដោយ លោក ឃ្លោក នួយ អភិបាលរងខេត្ត បានអញ្ជើញចុះបញ្ជាផ្ទាល់ ព្រោះតែឃើញផ្សែងបក់បោកគ្របដណ្តប់មកលើក្រុងប៉ៃលិនឡើងអ័ព្ឌអួរ ។
ការពន្លត់ភ្លើងឆេះព្រៃចម្ការនេះបានទាន់ពេលវេលាល្អណាស់ ។ ប្រសិនបើគ្មានអន្តរាគមន៍ពីរថយន្តពន្លត់ភ្លាមៗទេ អំណាចភ្លើងអាចឆេះរាលដល់ផលដំណាំ និងលំនៅឋាន ស្ថិតនៅភូមិសួរស្តី សង្កាត់អូរតាវ៉ៅ ក្រុងប៉ៃលិនជាមិនខាន ។
ប្រភពពីសមត្ថកិច្ចបានបន្ថែមទៀតថា ការពន្លត់ភ្លើងឆេះព្រៃចម្ការនេះ ប្រើប្រាសរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តប៉ៃលិន ចំនួន៣គ្រឿង និងរថយន្តពន្លត់អគ្គិភ័យ របស់អធិការដ្ឋាននគរបាលស្រុករតនះមណ្ឌល ខេត្តបាត់ដំបងចំនួន២គ្រឿងទៀត ទើបអាចពន្លត់បានដោយជោគជ័យ មិនមានការខូចខាតផ្ទះសម្បែងនិងសម្ភារអ្វីនោះទេ គ្រាន់តែរាលដាលដល់ដំណាំបន្តិចបន្តួចប៉ុណ្ណោះ ៕
កែសម្រួលដោយ ៖ សំណាង
ចែករំលែកព័តមាននេះ