រាជធានីភ្នំពេញ ៖ សម្តេចតេជោ ហ៊ុនសែន នាយករដ្ឋមន្ត្រីបានលើកឡើងថា ប្រជាជនបានឆ្លងឆ្នាំយប់ថ្ងៃទី៣១ ធ្នូ ឈានដល់១មករា យ៉ាងសប្បាយរីករាយដោយសារមានសន្តិភាព ។ សម្តេចតេជោ បានសរសេរលើបណ្តាញសង្គម នៅថ្ងៃទី០១ មករា ឆ្នាំ២០២០យ៉ាងដូច្នេះថា៖«បងប្អូនប្រជាពលរដ្ឋ និងកូនក្មួយនៅទូទាំងប្រទេសបានចូលរួមឆ្លងឆ្នាំចាស់ផ្លាស់ចូលឆ្នាំសកលថ្មី២០២០ កាលពីយប់មិញក្នុងបរិយាកាសសប្បាយរីករាយក្រៃលែងទាំងនៅក្នុង និងក្រៅប្រទេស» ។
ជាមួយគ្នានោះដែរ សម្តេចបានចូលរួមអបអរសាទរ និងកម្សាន្តសប្បាយនៅក្នុងពិធីបុណ្យតូចធំទាំងអស់នេះបាន គឺដោយសារប្រទេសជាតិយើងមានសុខសន្តិភាព ។ គ្មានសន្តិភាព គឺគ្មានអ្វីៗទាំងអស់ ។ សម្តេចបានអរគុណបងប្អូនជនរួមជាតិ និងកូនក្មួយដែលបានចូលរួមថែរក្សាការពារសន្តិភាពនៅក្នុងប្រទេសជាតិយើង ។
សូមជូនពរបងប្អូនជនរួមជាតិ និងកូនក្មួយជាទីស្រឡាញ់ទាំងអស់ នៅក្នុងឆ្នាំថ្មី២០២០នេះជួបតែសេចក្តីសុខ សេចក្តីចម្រើនសំណាងល្អ ។ សម្តេចបានបញ្ជាក់ថា«យប់ថ្ងៃទី ៣១ ធ្នូនេះ ជាយប់ឆ្លងឆ្នាំចាស់ផ្លាស់ចូលឆ្នាំថ្មី២០២០ ។ ពិតណាស់ គឺមានបងប្អូនមួយចំនួនបានធ្វើដំណើរកម្សាន្តតាំងពីថ្ងៃទី២៥ ធ្នូ មកម្ល៉េះ» ។ សម្តេចបានបន្ថែមថា ប្រទេសមានសុខសន្តិភាព គឺផ្តល់ឱកាសឲ្យបងប្អូនប្រជាពលរដ្ធ និងក្មួយៗធ្វើដំណើរកម្សាន្តសប្បាយឆ្ងាយជិតទាំងនៅក្នុង និងក្រៅប្រទេស ជាពិសេសនៅក្នុងថ្ងៃចូលឆ្នាំថ្មីដោយគ្មានការបារម្ភភ័យព្រួយអ្វីឡើយ ។
សម្តេចបានគូសបញ្ជាក់ថា«ខ្ញុំ និងភរិយា សូមជូនពរបងប្អូនជនរួមជាតិជួបតែសេចក្តីសុខ សំណាងល្អ មានសុវត្ថិភាពក្នុងការធ្វើដំណើរ និងបានសប្បាយរីករាយជួបជុំក្រុមគ្រួសារនៅក្នុងថ្ងៃឆ្លងឆ្នាំចាស់ផ្លាស់ចូលឆ្នាំថ្មី២០២០ យប់នេះទាំងអស់គ្នា»៕
ចែករំលែកព័តមាននេះ