ប្រទេសកូរ៉េខាងជើង ៖ ទីភ្នាក់ងារព័ត៌មានកូរ៉េខាងជើងKCNAរាយការណ៍នាថ្ងៃទី១មករាថា មេដឹកនាំកូរ៉េខាងជើងលោកគីមជុងអ៊ុន ប្រកាសបញ្ចប់ការផ្អាកសាកល្បងនុយក្លេអ៊ែរ និងការសាកល្បងបណ្ដាមីស៊ីលបាលីស្ទិករំលងទ្វីបហើយសន្យាធ្វើសកម្មភាពភ្ញាក់ផ្អើលស្រឡាំងកាំងមួយ ប្រឆាំងសហរដ្ឋអាមេរិក។
លោកគីមជុងអ៊ុនបានលើកនៅចំពោះមុខបណ្ដាមេដឹកនាំបក្សពលករកូរ៉េថា យើងគ្មានហេតុផលណាមួយត្រូវបន្តជាឯកតោភាគី ការសន្យានោះទៀតឡើយ។ ពិភពលោកនឹងឃើញក្នុងពេលដ៏ឆាប់ខាងមុខនេះ នូវអាវុធយុទ្ធសាស្ត្រថ្មីមួយដែលកូរ៉េខាងជើងមាន។
លោកគីមធ្លាប់ថ្លែងកាលពីឆ្នាំ២០១៨ថា កូរ៉េខាងជើងមិនត្រូវការ ការសាកល្បងនុយក្លេអែ៊រនិងការសាកល្បងមីស៊ីលបាលីស្ទិករំលងទ្វីបទៀតទេ។ បណ្ដាឆ្នាំមុនៗកូរ៉េខាងជើងបានធ្វើការសាកល្បងនុយក្លេអ៊ែរ៦លើកព្រមទាំងសាកល្បងបណ្ដាមីសីុលដែលអាចបាញ់ដល់ដែនដីអាមេរិកទាំងមូល។
សេចក្ដីថ្លែងការណ៍របស់លោកគីមរាយការណ៍កាលពីថ្ងៃទី១មករា ហាក់ដូចជាបញ្ជាក់ពីការផ្លាស់ប្ដូរនៃនយោបាយនុយក្លេអ៊ែរ២ឆ្នាំចុងក្រោយនេះ ដែលប្រធានាធិបតីអាមេរិកលោកដូណាល់ត្រាំតែងលើកជាទៀងទាត់ ពីការសន្យាដែលលោកបានធ្វើ ចំពោះមេដឹកនាំកួរ៉េខាងជើង។ ប៉ុន្តែការចរចារវាងក្រុងវ៉ាសិុនតោននិងក្រុងព្យុងយ៉ាងហាក់ដូចជាទ័លច្រក ចាប់តាំងពីបរាជ័យនៃការជួបគ្នាកំពូលគីម-ត្រាំនៅក្រុងហាណូយកាលពីខែកុម្ភៈមក។
នៅមុខគណៈកម្មាធិការកណ្ដាលបក្សពលករកូរ៉េ លោកគីមគូសបញ្ជាក់យ៉ាងច្បាស់ថា កូរ៉េខាងជើងត្រៀមបន្តរស់នៅក្រោមរបបនៃទណ្ឌកម្មអន្តរជាតិ ដើម្បីថែរក្សាសមត្ថភាពនុយក្លេអ៊ែររបស់ខ្លួន។ លោកថាសហរដ្ឋអាមេរិកធ្វើការទាមទារ ផ្ទុយពីបណ្ដាផលប្រយោជន៍ជាមូលដ្ឋានទាំងឡាយរបស់រដ្ឋយើង ហើយប្រកាន់យកឥរិបថបែបអ្នកលេង។
ក្រុងវ៉ាស៊ិនតោននៅបន្តធ្វើសមយុទ្ធយោធារួមនានាជាមួយកូរ៉េខាងត្បូង ក៏ទោះបីលោកត្រាំសន្យាដោយខ្លួនលោកផ្ទាល់បញ្ឈប់ក្ដី ព្រមទាំងបញ្ជូនមកកាន់កួរ៉េខាងត្បូងបណ្ដាឧបករណ៍យោធាដែលមានបច្ចេកវិទ្យាខ្ពស់ ហើយពង្រឹងទណ្ឌកម្មថែមប្រឆាំងកូរ៉េខាងជើង។ ដាច់ខាតយើងនឹងមិនលក់ភាពថ្លៃថ្នូររបស់ខ្លួនឡើយ។ លោកសន្យាពីសកម្មភាពដ៏ស្រឡាំងកាំងមួយ ដើម្បីឲ្យសហរដ្ឋអាមេរិកបង់តម្លៃ ចំពោះការឈឺចាប់ដែលប្រជាជនយើងទទួលរង ៕ (កែសម្រួលដោយ ៖ បុប្ផា)
ចែករំលែកព័តមាននេះ