ខេត្តកំពត ៖ ទូកផ្កាចារចំនួន៣៧ទូកបានចូលរួមប្រណាំងនៅសមុទ្រខេត្តកែបដើម្បីអបអរសាទរឆ្នាំសកល២០២០ កាលពីព្រឹកថ្ងៃទី៣១ ធ្នូ ឆ្នាំ២០២០ និងទិវាបុណ្យជាតិថ្ងៃជ័យជំនះ៧ មករា១៩៧៩-៧ មករា ២០២០ផងដែរ។
លោកកែន សត្ថា អភិបាលខេត្តកែបបានមានប្រសាសន៍នៅក្នុងពិធីបើកការប្រណាំងទូកថា ខេត្តកែបបានធ្វើការប្រណាំងទូកផ្កាចារចំនួន១១លើកហើយ ។
លោកអភិបាលខេត្តបានមានប្រសាសន៍ថា ការប្រណាំងជារៀងរាល់ឆ្នាំនៅខេត្តជាប់មាត់សមុទ្រមួយនេះគឺផ្ដើមចេញពីការខិតខំរដ្ឋបាលខេត្តរួមទាំងមន្ត្រីរាជការទាំងអស់នៅតាមមន្ទីរនានាជុំវិញខេត្ត រួមទាំងកងកំលាំងទាំងអស់ដែលបានចូលរួមគាំទ្រដើម្បីបង្កើតព្រឹត្តិការណ៍នៅក្នុងខេត្តកែប ដែលសំបូរទៅដោយភ្ញៀវអ្នកទេសចរជាតិនិងអន្តរជាតិ។
លោកអភិបាលខេត្តមានប្រសាសន៍បន្តថា ការចូលរួមប្រណាំងទូកផ្កាចារនៅក្នុងសមុទ្រថ្ងៃនេះគឺអបអរឆ្នាំសកល២០២០ និងអបអរសារទរខួបលើកទី៤១ នៃថ្ងៃជ័យជំនះ៧ មករា ២០២០ ។ លោកបានបន្តថា សូមប្រជាពលរដ្ឋគ្រប់រូបចងចាំថ្ងៃរំដោះ៧ មករា ព្រោះជាថ្ងៃទេវតាជួយសង្គ្រោះជីវិតឱ្យរួចផុតពីបនប្រល័យពូជសាសន៍ប៉ុលពត ។ កុំតែមានថ្ងៃ៧ មករា ១៩៧៩ កុំអីក៏គ្មានថ្ងៃនេះដែរ។
លោកអភិបាលខេត្តបានមានប្រសាសន៍បន្តទៀតថា សូមប្រជាពលរដ្ឋខេត្តកែប ជាពិសេសកងកំលាំងការពារចូលរួមអបអរសារទរការប្រណាំងកង់ពិភពលោកចេញដំណើរពីខេត្តកោះកុងឆ្លងកាត់ខេត្តព្រះសីហនុ, ខេត្តកំពត និងខេត្តកែប នឹងត្រូវបញ្ចាប់នៅខេត្តកែបនៅរសៀលថ្ងៃទី៦ ខែមករា ឆ្នាំ២០២០ខាងមុខនេះ។
លោកសោម ពិសិដ្ឋ អភិបាលរងខេត្តកែបក៏បានប្រកាសបិទការប្រណាំងទូក និងលើកទឹកចិត្តដល់កីឡាករ-កីឡាការិនីដែលបានទទួលជ័យលាភី និងមិនទទួលជោគជ័យ ៕ (កែសម្រួលដោយ ៖ ធីតា)
ចែករំលែកព័តមាននេះ