ហាណូយ៖ សមាគមនាំចេញឈើនិងព្រៃឈើវៀតណាម (VTFPA) បានឲ្យដឹងថា ការនាំចេញឈើរបស់ប្រទេសវៀតណាមទៅកាន់ទីផ្សារអន្តរជាតិនៅឆ្នាំ២០១៩នេះបានកើនឡើងដល់ប្រមាណជាង ១១,៥ ពាន់លានដុល្លារអាមេរិកដែលជាចំនួនលើសពីគោលដៅកំណត់ដោយរបស់ឧស្សាហកម្មនេះដែលបានកំណត់ត្រឹមតែចំនួន ១០,៥ ពាន់លានដុល្លារ ពោលគឺកើនឡើង…
ហាណូយ៖ សមាគមនាំចេញឈើនិងព្រៃឈើវៀតណាម (VTFPA) បានឲ្យដឹងថា ការនាំចេញឈើរបស់ប្រទេសវៀតណាមទៅកាន់ទីផ្សារអន្តរជាតិនៅឆ្នាំ២០១៩នេះបានកើនឡើងដល់ប្រមាណជាង ១១,៥ ពាន់លានដុល្លារអាមេរិកដែលជាចំនួនលើសពីគោលដៅកំណត់ដោយរបស់ឧស្សាហកម្មនេះដែលបានកំណត់ត្រឹមតែចំនួន ១០,៥ ពាន់លានដុល្លារ ពោលគឺកើនឡើង ២០ ភាគរយបើប្រៀបធៀបទៅនឹងឆ្នាំមុន។ នេះបើតាមយោងតាមការចុះផ្សាយរបស់សារព័ត៌មាន vietnamnews ថ្ងៃទី ៣០ ខែធ្នូម្សិលមិញនេះ។
លោក Đỗ Xuân Lập ប្រធាន VTFPA បាននិយាយថាក្រុមហ៊ុនវៀតណាមអាចមានលទ្ធភាពក្នុងការទទួលបានកន្លែងឈរជើងនៅតាមទីផ្សារជាច្រើននៅជុំវិញពិភពលោកសម្រាប់ឧស្សាហកម្មឈើ ដោយយកឈ្នះលើចំណុចខ្វះខាតនិងដែនកំណត់របស់ពួកគេ។
នាយកដ្ឋាននាំចេញ – នាំចូលដែលស្ថិតនៅក្រោមក្រសួងឧស្សាហកម្មនិងពាណិជ្ជកម្មវៀតណាមក៏បានឱ្យដឹងផងដែរថា ការនាំចេញផលិតផលឈើទៅកាន់សហរដ្ឋអាមេរិកមានការកើនឡើងយ៉ាងខ្លាំងនៅឆ្នាំនេះ ក៏ដូចជាកំណើនដ៏ខ្លាំងក្លាទៅកាន់ទីផ្សារផ្សេងទៀតរួមមានប្រទេសជប៉ុន ចក្រភពអង់គ្លេស កាណាដា អាល្លឺម៉ង់ និងហូឡង់។
ជាមួយដៃគូជប៉ុននិងកាណាដាក្នុងកិច្ចព្រមព្រៀងគ្រប់ជ្រុងជ្រោយនិងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) មន្ត្រីនាយកដ្ឋានខាងលើក៏បាននិយាយថាក្រុមហ៊ុនវៀតណាមកំពុងចាប់ផ្តើមទាញយកផលប្រយោជន៍ពីកិច្ចព្រមព្រៀងផ្សេងៗដែលផ្តល់នូវការកាត់បន្ថយការបង់ពន្ធ ដែលជាផ្នែកមួយនៃកិច្ចព្រមព្រៀងពាណិជ្ជកម្មដើម្បីជ្រៀតចូលទីផ្សារទាំងនេះបានងាយស្រួលជាងមុន ។
នៅពេលកិច្ចព្រមព្រៀងពាណិជ្ជកម្មសេរីអឺរ៉ុប – វៀតណាម (EVFTA) ដែលនឹងចូលជាធរមាននៅឆ្នាំ ២០២០ ដ៏ខ្លីខាងមុខនេះ ក្រុមហ៊ុនវៀតណាមក៏អាចមានលទ្ធភាពថ្មីបន្ថែមទៀតសម្រាប់អត្ថប្រយោជន៍នៃការកាត់ពន្ធគយស្រដៀងគ្នានិងគុណសម្បត្តិពាណិជ្ជកម្មពីសហភាពអឺរ៉ុបដែលជាទីផ្សារនាំចេញផលិតផលឈើដ៏សំខាន់មួយរបស់ប្រទេសវៀតណាម។
នាយកដ្ឋាននាំចេញ – នាំចូល បានកំណត់គោលដៅចំនួន ១២ ពាន់លានដុល្លារសម្រាប់ការនាំចេញឈើនៅឆ្នាំ ២០២០ ដោយនិយាយថាការរីកចម្រើនយ៉ាងឆាប់រហ័សនៃទីផ្សារធំ ៗ ដូចជាសហរដ្ឋអាមេរិកនិងសហភាពអឺរ៉ុប គឺជាកត្តាជំរុញដ៏សំខាន់សម្រាប់ឧស្សាហកម្មនេះ ។
លោក Nguyễn Quốc Khanh ប្រធានសមាគមសិប្បកម្មនិងកែច្នៃឈើរបស់ទីក្រុងហូជីមិញបាននិយាយថាវិស័យឈើរបស់ប្រទេសនេះបានរក្សាអត្រាកំណើនថេរក្នុងរយៈពេលពីរទសវត្សរ៍ចុងក្រោយនេះកំពុងត្រៀមខ្លួនដើម្បីក្លាយជាអ្នកឈានមុខគេនៅអាស៊ីអាគ្នេយ៍សម្រាប់ការនាំចេញឈើទៅកាន់ទៅផ្សារអន្តរជាតិ ។
លោក Nguyễn Quốc Khanh បានពោលជាមួយសុទិដ្ឋិនិយមថា ថាជាមួយនឹងកិច្ចព្រមព្រៀងពាណិជ្ជកម្មកាន់តែច្រើនរវាងវៀតណាមនិងបណ្តាប្រទេសមហាអំណាចធំៗដែលនឹងចូលជាធរមាននាឆ្នាំខាងមុខមានចំនួនកើនឡើង នោះតម្រូវការផលិតផលវៀតណាមនិងការវិនិយោគបរទេសធំៗ ដែលហូរចូលក្នុងឧស្សាហកម្មនេះនឹងមានកំណើនផងដែរ នោះការនាំចេញឈើរបស់វៀតណាមក៏រំពឹងថាមានលទ្ធផលកាន់តែប្រសើរ ហើយរំពឹងថាមានគោលដៅកំណើន ២០ ភាគរយបន្ថែមទៀតនៅឆ្នាំក្រោយនេះ ៕
ចែករំលែកព័តមាននេះ