ស្ទើរគ្រប់គ្នាហើយតែងតែមានទស្សនៈទាក់ទិននឹងការចាប់ផ្តើម និងគ្រប់គ្រងអាជីវកម្ម តែក្នុងនាមជាអាជីវករម្នាក់ តើអ្នកគួរតែស្តាប់តាមនរណា? ដំបូន្មានមួយចំនួននឹងជួយអ្នកក្នុងការដើរឆ្ពោះទៅរកភាពជោគជ័យ តែដំបូន្មានមួយចំនួនទៀតមានតែរុញច្រានអ្នកឲ្យបរាជ័យប៉ុណ្ណោះទោះជាវាបានជួយដល់អ្នកដទៃដែលស្ថិតក្នុងស្ថានការស្រដៀងនឹងអ្នកពិតមែនក្តី ។ ដោយហេតុដូចនេះ តើអ្នកគួរធ្វើយ៉ាងណាដើម្បីជៀសវាងធ្លាក់ក្នុងអន្ទាក់ទាំងនេះ?
ជាក់ស្តែងអ្នកត្រូវដឹងថាតើដំបូន្មានដែលអ្នកកំពុងតែស្តាប់ជាដំបូន្មានល្អឬអាក្រក់សម្រាប់អ្នកដោយចាប់ផ្តើមដំបូងគេពីអ្នកដែលផ្តល់ដំបូន្មាននោះ ។ តើមនុស្សម្នាក់នោះមានបទពិសោធន៍ធ្វើអ្វីដែលអ្នកចង់ធ្វើទេ? តើពួកគេដឹងពីអ្វីដែលខ្លួនកំពុងនិយាយទេ? តើសកម្មភាពរបស់ពួកគេស្របទៅនឹងមាត់ទេ?
បន្ទាប់មកទៀតមើលលើគោលបំណងរបស់ពួកគេ ។ តើពួកគេកំពុងតែនិយាយប្រាប់អ្នកដើម្បីអួតអាងដាក់អ្នក ឬធ្វើឲ្យអ្នកភ័យខ្លាចឬទេ? លើសពីនេះទៅទៀតនោះ តើពួកគេកំពុងតែចង់បញ្ចុះបញ្ចូលអ្នកឲ្យធ្វើអ្វីមួយមែនទេ? ក្រៅពីនេះហើយ អ្នកត្រូវជៀសវាងដំបូន្មានសំខាន់ៗខាងក្រោមនេះ៖
១. រៀនធ្វើឲ្យដូចមនុស្សម្នាក់នោះ៖
មនុស្សភាគច្រើនចូលចិត្តប្រៀបធៀបអាជីវកម្មមួយទៅនឹងអាជីវកម្មមួយទៀត ។ ជាក់ស្តែងវាអាចមានអត្ថប្រយោជន៍ ប៉ុន្តែវាក៏អាចបង្កជាបញ្ហាដល់អ្នកដែរព្រោះអ្នកអាចចាប់ផ្តើមធ្វើត្រាប់តាមអ្នកដទៃ ។ តម្លៃ គោលដៅ និងការផ្តល់អាទិភាពរបស់អាជីវកម្មអ្នកគួរតែមានភាពខុសប្លែកពីអាជីវកម្មដទៃលើទីផ្សារ ។
២. ទៅរៀនសិនទៅ៖
មនុស្សជាច្រើនអាចនឹងប្រាប់អ្នកឲ្យទៅរៀនយកអនុបណ្ឌិតផ្នែកអាជីវកម្មជាមុនសិនមុននឹងធ្វើជាម្ចាស់អាជីវកម្ម ។ ការបន្តការសិក្សាមិនមែនជារឿងមិនល្អទេ ប៉ុន្តែបើអ្នកចង់ចាប់ផ្តើមអាជីវកម្ម អ្នកមិនចាំបាច់មានសញ្ញាប័ត្រអនុបណ្ឌិតជាមុនសិនឡើយ ។
៣. អាជីវកម្មពិតប្រាកដត្រូវការ…៖
អ្នកដទៃនឹងប្រាប់អ្នកពីអ្វីដែលអ្នកត្រូវការដើម្បីចាប់ផ្តើមអាជីវកម្មមួយប៉ុន្តែសម្រាប់សហគ្រិន និងអាជីវករមួយចំនួន អ្វីដែលពួកគេត្រូវការគឺគ្រាន់តែគំនិតមួយនិងកុំព្យូ័ទ័រមួយគ្រឿងប៉ុណ្ណោះ ។ អ្នកត្រូវចងចាំថាពួកយើងរស់នៅក្នុងជំនាន់ដែលពោរពេញទៅដោយព័ត៌មាន និងអ្នកមានសមត្ថភាព។ បើអ្នកមិនមានក្រុមការងារពេញលេញទេនោះ អ្នកក៏តែអាចរកអ្នកធ្វើការក្រៅម៉ោងដែលមានសមត្ថភាពខ្ពស់ដែរ ។ អាជីវកម្មមានភាពបត់បែនទេ ៕ កែសម្រួលដោយ ៖ សុឃាក់
ចែករំលែកព័តមាននេះ