រាជធានីភ្នំពេញ ៖ ឯកអគ្គរដ្ឋទូតប្រទេសទីម័រខាងកើត បានសម្តែងនូវការកោតសរសើរចំពោះការអភិវឌ្ឍរបស់ប្រទេសកម្ពុជា និងថាយកគំរូនិងបទពិសោធន៍នេះទៅធ្វើការអភិវឌ្ឍប្រទេសខ្លួន ។ នេះបើតាមលោកឯកអគ្គរដ្ឋទូតលើកឡើង ក្នុងជំនួបជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភា ។
ក្នុងជំនួបពិភាក្សាជាមួយសម្តេចវិបុលសេនា ភក្តី សាយ ឈុំ នាព្រឹកថ្ងៃទី៣០ ខែធ្នូ ឆ្នាំ២០១៩ នៅវិមានព្រឹទ្ធសភា លោកជំទាវ ហ្វេលីស៊ីដាដេដេ ស៊ូសា ហ្គូទែរែស (Felicidade de Sousa Guterres) ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋប្រជាធិបតេយ្យទីម័រខាងកើត បានថ្លែងថា ក្នុងអំឡុងពេលបំពេញបេសកកម្មការទូតរយៈពេល៤ឆ្នាំរបស់លោកជំទាវនៅព្រះរាជាណាចក្រកម្ពុជា លោកជំទាវបានទទួលជោគជ័យ ក៏ដោយសារមានការគាំទ្រពីព្រឹទ្ធសភារដ្ឋសភា រាជរដ្ឋាភិបាល និងគ្រប់ស្ថាប័នជាតិដែលជំរុញឱ្យទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរ កម្ពុជា-ទីម័រខាងកើត
មានការរីកចម្រើន ។
ជាមួយគ្នានេះ លោកជំទាវក៏បានសម្ដែងនូវក្ដីរីករាយជាខ្លាំង ដោយឃើញថាសេដ្ឋកិច្ចកម្ពុជាមានការអភិវឌ្ឍយ៉ាងឆាប់រហ័ស ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលធ្វើឱ្យប្រទេសកម្ពុជាមានកំណើនសេដ្ឋកិច្ចជាមធ្យម៧%ក្នុង១ឆ្នាំ រយៈពេលជាង២ទសវត្សរ៍មកហើយ ។ លោកជំទាវបានសង្កេតឃើញថា នៅរាជធានីភ្នំពេញមានការីកចម្រើនខ្លាំងលើវិស័យហេដ្ឋា
រចនាសម្ព័ន្ធផ្លូវថ្នល់ ស្ពានអាកាស និងអគារខ្ពស់ៗជាច្រើន ។
លោកជំទាវឯកអគ្គរដ្ឋទូតបញ្ជាក់ថា អ្វីដែលខ្ញុំបានមើលឃើញទាំងអស់នេះ ខ្ញុំនឹងយកទៅជម្រាបជូនរដ្ឋាភិបាលទីម័រខាងកើត ដើម្បីសិក្សាស្វែងយល់អំពីការអភិវឌ្ឍ និងការកែទម្រង់លើគ្រប់វិស័យ ។ នេះគឺជាគំរូមួយ និងបទពិសោធន៍ដ៏ល្អសម្រាប់ប្រទេសទីម័តខាងកើតផងដែរ ។ ក្នុងនាមរដ្ឋាភិបាលទីម័រខាងកើត លោកជំទាវឯកអគ្គរដ្ឋទូត បានថ្លែងអំណរគុណរាជរដ្ឋាភិបាលនៃព្រះរាជាណាចក្រកម្ពុជា ដែលបានគាំទ្រឱ្យប្រទេសទីម័រខាងកើតចូលជាសមាជិកអាស៊ានពេញសិទ្ធិ ។
សម្តេចវិបុលសេនាភក្តី សាយ ឈុំ ប្រធានព្រឹទ្ធសភា បានសម្តែងនូវក្តីពេញចិត្តនិងវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អលើគ្រប់វិស័យ រវាងប្រជាជននិងប្រទេសទាំងពីរ ។ ថ្នាក់ដឹកនាំកំពូល និងមន្ត្រីជាន់ខ្ពស់គ្រប់លំដាប់ថ្នាក់ បានផ្លាស់ប្តូរទស្សនកិច្ចគ្នាទៅវិញទៅមកជាបន្តបន្ទាប់ និងបានគាំទ្រគ្នាទៅវិញទៅមកលើបញ្ហាជាច្រើន ក្នុងក្របខណ្ឌកិច្ចសហប្រតិបត្តិការអន្តរជាតិ ។ ក្នុងនាមព្រឹទ្ធសភា រដ្ឋសភា និងរាជរដ្ឋាភិបាលកម្ពុជា សម្តេចប្រធានព្រឹទ្ធសភា សូមគាំទ្រ ប្រទេសទីម័រខាងកើតចូលជាសមាជិកអាស៊ាន ។
សម្តេចវិបុលសេនាភក្តីបញ្ជាក់ថា ក្រោមការខិតខំសម្របសម្រួលរបស់លោកជំទាវ ប្រទេសទាំងពីរបានចុះហត្ថលេខាលើកិច្ចព្រមព្រៀង និងអនុស្សរណៈយោគយល់គ្នារវាងប្រទេសទាំងពីរជាច្រើន ហើយតាមរយៈនៃកិច្ចព្រមព្រៀងទាំងអស់នេះ នឹងក្លាយជាចលករជំរុញកំណើនពាណិជ្ជកម្ម ជំរុញការផ្លាស់ប្តូរទេសចរ វប្បធម៌ និងវិនិយោគជាក់ជាពុំខាន ។ សម្តេចនឹងត្រៀមខ្លួនជានិច្ច បន្តធ្វើកិច្ចសហប្រតិបត្តិការដ៏ជិតស្និទ្ធជាមួយនឹងឯកអគ្គរដ្ឋទូតថ្មីទីម័រខាងកើត និងស្ថានទូតទីម័រខាងកើតប្រចាំព្រះរាជាណាចក្រកម្ពុជា ដើម្បីរួមចំណែកពង្រឹងពង្រីកចំណងមិត្តភាព និងកិច្ចសហប្រតិបត្តិការ ដែលនឹងនាំមកនូវផលប្រយោជន៍ទៅវិញទៅមកជូនប្រជាជន និងប្រទេសទាំងពីរ ។
នៅថ្ងៃដដែលនោះដែរ តាមលោក អ៊ាង សុផល្លែត ជំនួយការសម្ដេចតេជោ បានថ្លែងឲ្យដឹងដែរថា ក្នុងឱកាសអញ្ជើញចូលជម្រាបលាសម្តេចតេជោនាយករដ្ឋមន្ត្រី នៅទីស្ដីការនាយករដ្ឋមន្ត្រីវិមានសន្តិភាព លោកជំទាវឯកអគ្គរដ្ឋទូតបានថ្លែងអំណរគុណយ៉ាងជ្រាលជ្រៅជាទីបំផុត ក្នុងឱកាសដែលលោកជំទាវបានទទួលគ្រឿងឥស្សរិយយសពីព្រះករុណាព្រះមហាក្សត្រនាពេលនេះ ។លោកជំទាវមានប្រសាសន៍ថា លោកជំទាវ ពិតជាមានកិត្តិយសយ៉ាងខ្លាំង ដែលបានមកបម្រើការងារការទូតនៅព្រះរាជាណាចក្រកម្ពុជា ។
បន្ទាប់ពី៤ឆ្នាំកន្លងមកនេះ បេះដូងរបស់លោកជំទាវគឺស្ថិតនៅក្នុងប្រទេសកម្ពុជារួចហើយ។ លោកជំទាវបានពិនិត្យឃើញថា កម្ពុជាគឺជាប្រទេសដ៏គំរូមួយដែលអាចដកស្រង់បទពិសោធន៍ ហើយយកបទពិសោធន៍នោះ ដើម្បីជាការរៀនសូត្រផង ដើម្បីជាការចែករំលែករវាងមិត្តភក្កិ និងប្រទេសដទៃទៀតផង ។
លោកជំទាវបានឃើញនូវសុខសន្តិភាព ស្ថិរភាពរបស់កម្ពុជា ។ សុខសន្តិភាព ស្ថិរភាពនេះហើយ ដែលបានជំរុញនូវការអភិវឌ្ឍរបស់កម្ពុជាយ៉ាងឆាប់រហ័ស ។ ជាងនេះទៀត កម្ពុជាគឺជាប្រទេសមួយដែលមានប្រជាជនរីករាយស្រស់ថ្លា ហើយភាពស្រស់ថ្លានេះ ជាមួយនឹងសុខសន្តិភាព សុវត្ថិភាពនេះឯង ដែលជាការទាក់ទាញសម្រាប់អ្នកទេសចរមកទស្សនាកម្ពុជា និងមកវិនិយោគនៅកម្ពុជា ។ កត្តាសន្តិភាព សុវត្ថិភាពនេះឯងដែលជាការទាក់ទាញជាទីបំផុត ។ ក្នុងន័យនេះដែរ លោកជំទាវបានសម្តែងនូវការរីករាយ ដែលលោកជំទាវបានក្លាយជាអ្នកការទូតរបស់ទីម័រខាងកើតលើកទី១ មកកាន់កម្ពុជា ។
ជាទីបញ្ចប់ លោកជំទាវក៏បានគោរពថ្លែងអំណរគុណយ៉ាងជ្រាលជ្រៅជាទីបំផុត ចំពោះរាជរដ្ឋាភិបាលកម្ពុជា ដែលបានផ្ដល់អាហារូបករណ៍ដល់និស្សិតទីម័រខាងកើតមកសិក្សានៅកម្ពុជា ។និស្សិតទាំងនោះកំពុងបន្តការសិក្សានៅកម្ពុជានៅពេលនេះ ហើយលោកជំទាវក៏បានថ្លែងអំណរគុណសម្ដេចតេជោ និងជូនស័ព្ទសាធុការពរក្នុងឱកាសឆ្នាំថ្មីឆ្នាំសកលនេះ ។ ជាការឆ្លើយតប សម្ដេចតេជោបានសម្តែងនូវការអបអរសាទរជូនចំពោះលោកជំទាវ ដែលបានទទួលគ្រឿងឥស្សរិយយសពីព្រះករុណាព្រះមហាក្សត្រ ។ សម្តេចតេជោមានប្រសាសន៍ថា
ប្រទេសកម្ពុជានិងប្រទេសទីម័រខាងកើត គឺជាប្រទេសដែលកំពុងអភិវឌ្ឍន៍ ដូច្នេះចាំបាច់យើងត្រូវការចែករំលែកបទពិសោធន៍រវាងគ្នាទៅវិញទៅមក ។ កម្ពុជាមានបទពិសោធន៍សម្រាប់ចែកជូនទីម័រខាងកើត ឯទីម័រខាងកើតក៏មានបទពិសោធន៍សម្រាប់ចែកជូនដល់កម្ពុជាដែរ ។ អ្វីដែលជាកត្តាសំខាន់នោះ គឺយើងផ្លាស់ប្ដូរបទពិសោធន៍ទៅវិញទៅមក រៀនពីគ្នាទៅវិញទៅមក ហើយប្រើប្រាស់នូវអ្វីដែលយើងមាននោះ ដើម្បីជំរុញកិច្ចសហប្រតិបត្តិការរវាងប្រទេសទាំងពីរ ដើម្បីទទួលបាននូវផលប្រយោជន៍រួមទាំងសងខាង។
សម្ដេចតេជោមានប្រសាសន៍ដែរថា សម្ដេចពិតជាមានការរីករាយណាស់ ដែលនិស្សិតរបស់
ទីម័រខាងកើតបានមកសិក្សានៅកម្ពុជា ។ សម្ដេចតេជោ ចង់ឲ្យមាននិស្សិតបរទេសច្រើនមកសិក្សានៅកម្ពុជា ៖ ទី១-ដើម្បីចែករំលែកនូវចំណេះដឹងរវាងនិស្សិតនិងនិស្សិត ទី២-ដើម្បីជាកម្មវិធីផ្លាស់ប្ដូរនិស្សិតរវាងប្រទេសកម្ពុជានិងប្រទេសដទៃទៀត ។ ជាទីបញ្ចប់ សម្ដេចតេជោបានជូនពរលោកជំទាវ ទទួលបានជោគជ័យជាបន្តបន្ទាប់ទៀត ជាពិសេសនៅឆ្នាំថ្មីដែលឈានមកដល់ និងបេសកកម្មថ្មីរបស់លោកជំទាវនាពេលអនាគត ៕
អត្ថបទសរសេរ ដោយ
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ