មនុស្សម្នាក់ៗតែងតែមានអារម្មណ៍ល្អ និងសុវត្ថិភាពពេលដែលដឹងថាខ្លួនមានទុកលុយច្រើនក្នុងគណនីសន្សំដែលពួកគេអាចដកបានគ្រប់ពេលដែលខ្លួនត្រូវការ ។ ប៉ុន្តែការមានលុយច្រើនពេកទុកសន្សំក៏មានផលវិបាកជាច្រើនដែរ ។ បញ្ហាទីមួយ គឺអ្នកមិនអាចរកប្រាក់ចំណូលពីវាច្រើនឡើយ ។ ជាទូទៅធនាគារឲ្យការប្រាក់សម្រាប់ប្រាក់សន្សំមិនខ្ពស់ទេ លើសពីនេះទៅទៀត…
មនុស្សម្នាក់ៗតែងតែមានអារម្មណ៍ល្អ និងសុវត្ថិភាពពេលដែលដឹងថាខ្លួនមានទុកលុយច្រើនក្នុងគណនីសន្សំដែលពួកគេអាចដកបានគ្រប់ពេលដែលខ្លួនត្រូវការ ។ ប៉ុន្តែការមានលុយច្រើនពេកទុកសន្សំក៏មានផលវិបាកជាច្រើនដែរ ។
បញ្ហាទីមួយ គឺអ្នកមិនអាចរកប្រាក់ចំណូលពីវាច្រើនឡើយ ។ ជាទូទៅធនាគារឲ្យការប្រាក់សម្រាប់ប្រាក់សន្សំមិនខ្ពស់ទេ លើសពីនេះទៅទៀត ប្រទេសតែងតែជួបអតិផរណាដែលធ្វើឲ្យលុយរបស់អ្នកបាត់បង់តម្លៃពីមួយឆ្នាំទៅមួយឆ្នាំ ។ មានន័យថាលុយដែលអ្នកមានថ្ងៃនេះអាចទិញរបស់បានតិចជាងមុននៅថ្ងៃក្រោយ ។
លើសពីនេះទៅទៀត អ្នកបាត់បង់ឱកាសក្នុងការរកចំណូលបន្ថែមព្រោះតែអ្នកទុកលុយចោល និងមិនយកវាទៅប្រើប្រាស់ឬវិនិយោគ ។ ដូច្នេះអ្នកត្រូវធ្វើយ៉ាងណាដើម្បីដោះស្រាយបញ្ហានេះ?
អ្នកជំនាញបានផ្តល់យោបល់មកថា អ្នកគួរតែទុកលុយដែលស្មើនឹងការចំណាយរបស់អ្នកគ្រប់ពី ៤ទៅ ៦ខែក្នុងគណនីសន្សំ ហើយថវិកាដែលនៅសល់ទាំងប៉ុន្មាន អ្នកគួរតែយកវាទៅវិនិយោគដើម្បីរកចំណូលឲ្យអ្នកបន្ថែម ។ បញ្ហាទីពីរនៅពេលដែលអ្នកមានលុយច្រើនទុកក្នុងគណនីសន្សំគឺវាជំរុញឲ្យមនុស្សចាយវាយច្រើន ។ លុយប្រៀបបានជាទឹក ដែលតែងតែរកច្រកហូរចេញដោយខ្លួនឯង ។ នៅពេលដែលមានលុយច្រើនទុកចោលមិនធ្វើអ្វីខួរក្បាលមនុស្សដំណើរការខុសគ្នានឹងពេលដែលមនុស្សគ្មានលុយ ។ លុយច្រើនបង្កើតតម្រូវការថ្មីដល់មនុស្ស ដែលមានន័យថាលុយច្រើនតែងតែជំរុញឲ្យមនុស្សគិតឃើញអ្វីផ្សេងៗដើម្បីទិញឬចាយវាយលើ ។
ដូច្នេះដំណោះស្រាយសម្រាប់បញ្ហាទីពីរនេះក៏ដូចខាងលើដែរ គឺអ្នកមិនគួរទុកលុយលើសពីការចំណាយពី ៤ ទៅ ៦ ខែក្នុងគណនីសន្សំអ្នកទេ ។ លើសពីនេះទៅទៀត ដើម្បើចៀសវាងការចាយវាយច្រើន អ្នកអាចយកក្រដាសប្រាក់ជាប់ខ្លួនតិច ឬបើអ្នកជាមនុស្សចូលចិត្តទិញតាមកម្មវិធីទូរស័ព្ទ នោះអ្នកមិនគួរទុកលុយច្រើនក្នុងគណនីចាយវាយនោះឡើយ ។ ក្រៅពីនេះហើយ អ្នកត្រូវកំណត់គោលដៅផ្នែកលុយរបស់ខ្លួនឲ្យបានច្បាស់លាស់ដើម្បីឲ្យអ្នករំលឹកខ្លួនឯងពីអ្វីដែលអ្នកចង់សម្រេចនៅថ្ងៃមុខ និងតាមដានមើលលទ្ធផលរបស់ខ្លួនជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ