ខេត្តតាកែវ ៖ ជនសង្ស័យជាមុខសញ្ញាជួញដូរគ្រឿងញៀនខុសច្បាប់ចំនួន៤នាក់ ត្រូវបាននគរបាលស្រុកត្រាំកក់ ធ្វើការស្រាវជ្រាវ និងបង្ក្រាបបាននៅចំណុចផ្លូវលំចូលភូមិខ្នាទៃ ឃុំអង្គតាសោម ស្រុកត្រាំកក់ កាលពីវេលាម៉ោង២និង៤៥នាទីរសៀលថ្ងៃទី២៧ ខែធ្នូ ឆ្នាំ២០១៩ ។
តាមប្រភពពីនគរបាលស្រុកត្រាំកក់បានអោយដឹងថា
ជំហានដំបូងសមត្ថកិច្ចឃាត់ជនសង្ស័យចំនួន២នាក់ ក្នុងនោះម្នាក់ឈ្មោះ ណៃ វណ្ណៈ
ភេទប្រុស អាយុ៣០ឆ្នាំ ជាមុខសញ្ញាជួញដូរ និងម្នាក់ទៀតឈ្មោះម៉ៅ សុវង់ ភេទប្រុស
អាយុ៣៦ឆ្នាំ ជាមុខសញ្ញាជួញដូរ ព្រមទាំងធ្វើដកហូតបានម្សៅក្រាមពណ៌សថ្លាចំនួន៤កញ្ចប់តូច
និងទូរស័ព្ទ១គ្រឿង ។
ក្រោយពីឃាត់ខ្លួនជនសង្ស័យ២នាក់ខាងលើរួចមក នគរបាលបានឈានទៅឃាត់ខ្លួនមុខសញ្ញាចំនួន២នាក់ទៀត ក្នុងនោះម្នាក់ឈ្មោះ អឹម សើរ ភេទប្រុស អាយុ៣៧ឆ្នាំ បច្ចុប្បន្នរស់នៅភូមិចំការដៀប ឃុំអង្គតាសោម ស្រុកត្រាំកក់ ជាមុខសញ្ញាជួញដូរសកម្ម និងម្នាក់ទៀតឈ្មោះ ឃៀង សុចាន់ ភេទប្រុស អាយុ៣៥ ឆ្នាំ បច្ចុប្បន្នរស់នៅភូមិ-ឃុំជាមួយគ្នា ជាមុខសញ្ញាជួញដូរសកម្មដូចគ្នា ។ ជនសង្ស័យទាំង២នាក់នេះ សមត្ថកិច្ចឃាត់បាននៅចំណុចភូមិចំការដៀប ឃុំអង្គតាសោម ស្រុកត្រាំកក់ កាលពីវេលាម៉ោងខាងលើ ។ សមត្ថកិច្ចដកហូតវត្ថុតាងនៅនឹងខ្លួនជនសង្ស័យបានមួយចំនួនផងដែរ មានដូចជា ម្សៅក្រាមពណ៌សថ្លាចំនួន២កញ្ចប់តូច ម៉ូតូចំនួន២គ្រឿង និងទូរស័ព្ទ១គ្រឿង។
នៅចំពោះនគរបាលស្រុក
ជនសង្ស័យទាំង៤នាក់ខាងលើបានឆ្លើយសារភាពថា ពួកខ្លួនពិតជាបានធ្វើសកម្មភាពជួញដូរ
និងចែកចាយគ្រឿងញៀនប្រាកដមែន។
នាយការិយាល័យប្រឆាំងការជួញដូនឹងប្រើប្រាស់គ្រឿងញៀនខេត្តបានអោយដឹងថា ជនសង្ស័យទាំង៤ នាក់ កម្លាំងជំនាញកំពុងកសាងសំណុំរឿងដើម្បីបញ្ជូនរួមជាមួយវត្ថុតាងទៅសាលាដំបូងខេត្ត ចាត់ការទៅតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ