រាជធានីភ្នំពេញ ៖ ប្រទេសបារាំងបានសម្រេចផ្តល់សម្បទានថវិកាជាង១០០លានដុល្លារដល់ប្រទេសកម្ពុជា សម្រាប់ធ្វើការអភិវឌ្ឍន៍គម្រោងចំនួន២នៅក្នុងប្រទេសកម្ពុជា ។ ការផ្តល់សម្បទាននេះធ្វើឡើង បន្ទាប់ពីប្រគល់ និងទទួលរវាងឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា កាលពីថ្ងៃទី២៤ ខែធ្នូកន្លងមក ដោយចុះហត្ថលេខាលើកិច្ចព្រមព្រៀងឥណទានសម្បទានសម្រាប់ គម្រោងចំនួន២ ជាមួយលោកស្រី Ophélie BOURHIS នាយកទីភ្នាក់ងារបារាំងសម្រាប់អភិវឌ្ឍន៍ (AFD) ប្រចាំនៅព្រះរាជាណាចក្រកម្ពុជា ដែលមានទំហំទឹកប្រាក់ចំនួន១១៨លានអឺរ៉ូ (ប្រមាណជា១២១, ៣២ លានដុល្លារ) ដើម្បីចូលរួមអភិវឌ្ឍកម្ពុជាឲ្យកាន់តែមានការីកចម្រើនបន្ថែមទៀត ។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញវត្ថុបានឲ្យដឹងថា កិច្ចព្រមព្រៀងទាំង២នោះរួមមានទី១,ឥណទានសម្បទានចំនួន១០០ លានអឺរ៉ូ (ប្រមាណជា១០,៤ លានដុល្លារ) សម្រាប់គម្រោងសាងសង់រោងចក្រប្រព្រឹត្តកម្ម ទឹកស្អាត បាក់ខែង ដំណាល់កាលទី២ ។ តាមរយៈកិច្ចព្រមព្រៀងនេះ ទីភ្នាក់ងារបារាំងសម្រាប់អភិវឌ្ឍន៍ (AFD) នឹងផ្តល់ឥណទានសម្បទានបន្ថែមចំនួន១០០លានអឺរ៉ូ សម្រាប់អនុវត្តគម្រោងនេះបន្តពីគម្រោងជំហ៊ានទី១ ។
គម្រោងនេះមានទិសដៅ ១- សាងសង់ស្ថានីយ៍បូមទឹកដែលមានសមត្ថភាពផលិតទឹកស្អាតបាន១៩៥ ០០០ ម៉ែត្រគីបក្នុង១ថ្ងៃ ។ ២- បំពាក់បំពង់មេនាំទឹកស្អាត បំពង់ចែកចាយ និងសម្ភារៈតភ្ជាប់បំពង់ និង ទី៣- ត្រួតពិនិត្យការងារ សាងសង់ និងគាំទ្រដល់ការពង្រឹងសមត្ថភាព មន្ត្រីរបស់រដ្ឋាករទឹកស្វយ័ត ក្រុងភ្នំពេញ លើការងារលទ្ធកម្ម និងតម្លើងបណ្តាញចែកចាយទឹក ។ គម្រោងទី២- ឥណទានសម្បទានចំនួន១៨លានអឺរ៉ូ (ប្រមាណជា ១៩,៩២ លានដុល្លារ) សម្រាប់ គម្រោងអភិវឌ្ឍន៍ជំនាញសម្រាប់ការប្រកួតប្រជែង ។
តាមរយៈកិច្ចព្រមព្រៀងនេះ AFD នឹងផ្តល់ឥណទានចំនួន១៨លានអឺរ៉ូ សម្រាប់ធ្វើសហហិរញ្ញប្បទាន ជាមួយធនាគារអភិវឌ្ឍន៍អាស៊ី (ADB) ជូនរាជរដ្ឋាភិបាលកម្ពុជាសម្រាប់អនុវត្តគម្រោងអភិវឌ្ឍន៍ជំនាញសម្រាប់ការប្រកួតប្រជែងដែលមានក្រសួងការងារ និងបណ្តុះបណ្តាលវិជ្ជាជីវៈជាភ្នាក់ងារប្រតិបត្តិគម្រោង ហើយក្រសួងអប់រំ យុវជន និងកីឡា និងក្រសួងសេដ្ឋកិច្ច និងហិរញ្ញវត្ថុជាភ្នាក់ងារអនុវត្តគម្រោង ។
ប្រភពបានបន្តថា គម្រោងនេះមានទិសដៅទី១ – កែលម្អ និងលើកកម្ពស់គុណភាពនៃការអប់រំបណ្តុះបណ្តាលបច្ចេកទេស និងវិជ្ជាជីវៈកម្រិតក្រោយមធ្យមសិក្សា ទី២- លើកកម្ពស់ការសិក្សាផង និងធ្វើការផង តាមបណ្តាឧស្សាហកម្មនានា និងទី៣- ពង្រឹងយន្តការ គ្រប់គ្រងហិរញ្ញវត្ថុ របស់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ឲ្យប្រកបដោយនវានុវត្តន៍ ។
ការផ្តល់ហិរញ្ញប្បទានដល់គម្រោងទាំងពីរខាងលើនេះ គឺបានឆ្លើយតបយ៉ាងជាក់ច្បាស់ទៅនឹងសេចក្តីត្រូវការជាអាទិភាព រាជរដ្ឋាភិបាលកម្ពុជា ក្នុងវិស័យអភិវឌ្ឍន៍ ធនធានមនុស្ស តាមរយៈការលើកកម្ពស់ ចំណេះដឹង ជំនាញ វិជ្ជាជីវៈ សមត្ថភាព និងសហគ្រិនភាព និងវិស័យអភិវឌ្ឍន៍ហេដ្ឋារចនាសម្ព័ន្ធទីក្រុង និងទីប្រជុំជន តាមរយៈការពង្រីកសមត្ថភាព ផ្គត់ផ្គង់ទឹកស្អាត និងការបំពាក់ប្រព័ន្ធចែកចាយ និងផ្គត់ផ្គង់ទឹកស្អាត ។
ហិរញ្ញប្បទានដ៏ថ្លៃថ្លាពីរដ្ឋាភិបាលសាធារណរដ្ឋបារាំងនេះនឹងរួមចំណែកដល់ការអនុវត្តយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជាសំដៅជួយទ្រទ្រង់កំណើនសេដ្ឋកិច្ចក្នុងរយៈពេលវែងបង្កើតការងារបែងចែកផ្លែផ្កានៃកំណើនប្រកបដោយសមធម៌ដល់គ្រប់ស្រទាប់វណ្ណៈនៃប្រជាជន និងបង្កើនប្រសិទ្ធិភាពនៃការវិនិយោគដែលជាមូលដ្ឋានឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ ជាប្រទេសដែលមានប្រាក់ចំណូលខ្ពស់ផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ