ភាពតានតឹងផ្ទុះឡើងជាថ្មីស្រែកថា«អយុត្តិធម៌ណាស់»
- ភ្នំពេញ
រាជធានីភ្នំពេញ ៖ ព័ត៌មានចុងក្រោយ នៅល្ងាចថ្ងៃទី៣០ ធ្នូ ដដែលថា ក្រុមពលរដ្ឋអ្នកតវ៉ាបានលិខិតមួយរបស់ក្រសួងមហាផ្ទៃ ចុះថ្ងៃ៣០ ខែធ្នូ ដែលចុះហត្ថលេខាដោយលោករដ្ឋលេខាធិការ…
រាជធានីភ្នំពេញ ៖ ព័ត៌មានចុងក្រោយ នៅល្ងាចថ្ងៃទី៣០ ធ្នូ ដដែលថា ក្រុមពលរដ្ឋអ្នកតវ៉ាបានលិខិតមួយរបស់ក្រសួងមហាផ្ទៃ ចុះថ្ងៃ៣០ ខែធ្នូ ដែលចុះហត្ថលេខាដោយលោករដ្ឋលេខាធិការ…
រាជធានីភ្នំពេញ ៖ ព័ត៌មានចុងក្រោយ នៅល្ងាចថ្ងៃទី៣០ ធ្នូ ដដែលថា ក្រុមពលរដ្ឋអ្នកតវ៉ាបានលិខិតមួយរបស់ក្រសួងមហាផ្ទៃ ចុះថ្ងៃ៣០ ខែធ្នូ ដែលចុះហត្ថលេខាដោយលោករដ្ឋលេខាធិការ ងី ច័ន្ទ្រផល តាមចំណារសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជម្រាបមកលោកអភិបាលរាជធានីភ្នំពេញ ស្ដីពីការផ្អាកចំណាត់ការរដ្ឋបាលជាបណ្ដោះអាសន្ន ដើម្បីចៀសវាងការខូចខាតផលប្រយោជន៍របស់ប្រជាពលរដ្ឋ និងរក្សាភាពដើមនៃទីតាំងទំនាស់រង់ចាំលទ្ធផលនៃការអង្កេតស្រាវជ្រាវជាមុនសិន។
លិខិតរបស់ក្រសួងមហាផ្ទៃបានបង្ហាញថា ក្រសួងបានទទួលពាក្យបណ្ដឹងពីពលរដ្ឋ៨គ្រួសារ ដែលបានប្ដឹងលោក ជា ពិសី អភិបាលខណ្ឌឫស្សីកែវ និងគូកន ពីបទបំផ្លិចបំផ្លាញទ្រព្យសម្បត្តិរបស់ឈ្មោះ ព្រំ បូរ ពាក់ព័ន្ធនឹងដីក្នុងតំបន់អភិវឌ្ឍន៍ឫស្សីកែវ ។ ក្រុមប្រជាពលរដ្ឋដែលជាអ្នកតវ៉ា បានធ្វើសន្និសីទភ្លាមៗនៅល្ងាចថ្ងៃដដែលនោះដែរ ជុំវិញការអនុវត្តចំណាត់ការរដ្ឋបាលរបស់អាជ្ញាធរខណ្ឌនេះ ។
សូមបញ្ជាក់ថា អ្នកភូមិម្នាក់ត្រូវបានអាជ្ញាធរឃាត់ខ្លួន ខណៈពេលដែលបានធ្វើការតវ៉ា ព្រមទាំងព្យាយាមដុតកង់ឡានប្រឆាំងនឹងអាជ្ញាធរខណ្ឌឫស្សីកែវ ដែលបានចុះទៅការពារគ្រឿងចក្រ ធ្វើរបងរបស់ម្ចាស់កម្មសិទ្ធិដោយស្របច្បាប់ ។ នៅក្នុងការតវ៉ានេះ ក៏មានការប្រឈមមុខ និងប៉ះទង្គិចពាក្យសម្តីគ្នាយ៉ាងជូរចត់ ព្រមទាំងរុញគ្នា រវាងកម្លាំងសមត្ថកិច្ច និងក្រុមអ្នកតវ៉ាផងដែរ ។
ទោះបីជាយ៉ាងនេះក្តីពុំមានហិង្សាណាមួយបានកើតឡើងនោះទេ ។ ហេតុការណ៍នេះបង្កឱ្យមានការតានតឹងកាលពីវេលាម៉ោងប្រមាណ១១ព្រឹកថ្ងៃទី៣០ ធ្នូ នៅចំណុចដីតំបន់អភិវឌ្ឍន៍ឫស្សីកែវ តាមបណ្តោយផ្លូវលេខ៥៩៨ ក្នុងភូមិទួលពពែ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ ។
អ្នកតវ៉ាដែលត្រូវឃាត់ខ្លួន ត្រូវបាននគរបាលឱ្យដឹងថា ឈ្មោះ ឡេង សុភ័ក្រ អាយុ២៦ឆ្នាំ មានលំនៅស្នាក់នៅកន្លែងកើតហេតុខាងលើ ។ តាមព័ត៌មានឱ្យដឹងថា នៅព្រឹកថ្ងៃទី៣០ ធ្នូ កម្លាំងគណៈបញ្ជាការឯកភាពខណ្ឌឫស្សីកែវ ប្រមាណជាង២០០នាក់ បានចុះទៅការពារគ្រឿងចក្រ ដើម្បីធ្វើរបងហ៊ុមព័ទ្ធដីចំនួន៨ឡូត៍ជាដីស្របច្បាប់ ។ បន្ទាប់ពីអាជ្ញាធរបានអនុវត្តវិធានការរដ្ឋបាលរុះរើសំណង់របស់លោក គង់ ទី ដែលអាជ្ញាធរចោទថា បានសាងសង់រំលោភយកដីគេដែលមានកម្មសិទ្ធិនៅតំបន់អភិវឌ្ឍន៍ឫស្សីកែវ ។
នៅព្រឹកនោះពលរដ្ឋដែលត្រូវគេរុះរើផ្ទះបានផ្ទុះការតវ៉ាថ្មីម្តងទៀត ហើយក៏បានព្យាយាមប្រមូលកង់រថយន្តចាស់ៗមកដុត បង្អើលមេឃ ប៉ុន្តែត្រូវបានអាជ្ញាធរនិងសមត្ថកិច្ចបានទៅអន្តរាគមន៍ពន្លត់ ព្រមទាំងប្រមូលយកចេញពីទីនោះ ។ នៅក្នុងហេតុការណ៍នេះ សមត្ថកិច្ចក៏បានឃាត់ខ្លួន អ្នកតវ៉ាម្នាក់រុញបញ្ចូលរថយន្តបញ្ជូនទៅកាន់សាលាខណ្ឌឫស្សីកែវ ។
គួរបញ្ជាក់ថា កាលពីថ្ងៃទី២៦ ធ្នូ គណៈបញ្ជាការឯកភាពខណ្ឌឫស្សីកែវ ក្រោមការដឹកនាំដោយលោក មាន ចាន់យ៉ាដា អភិបាលរងរាជធានីភ្នំពេញ បានប្រើវិធានការរដ្ឋបាលរុះរើសំណង់របស់លោក ព្រំ បូរ ដែលមានទំនាស់រ៉ាំរ៉ៃ នៅតំបន់អភិវឌ្ឍន៍ ដើម្បីយកដីចែកឱ្យប្រជាពលរដ្ឋចំនួន១៧៧គ្រួសារ ។
នៅថ្ងៃទី២៧ ខែធ្នូ គណៈបញ្ជាការឯកភាពក៏បានបន្តរុះរើសំណង់របស់លោក គង់ ទី បន្តទៀត ដើម្បីយកដីប្រគល់ឱ្យប្រជាពលរដ្ឋដែលជាម្ចាស់កម្មសិទ្ធិ(ប្លង់រឹង) ។ ទន្ទឹមនោះ ប្រជាពលរដ្ឋដែលជាក្រុមគ្រួសារលោក ព្រំ បូរ និងលោក គង់ ទី ព្រមទាំងប្រជាពលរដ្ឋ ដែលប្រឈមមុខនឹងការរុះរើបន្តទៀតក៏បានផ្ទុះការតវ៉ាប្រឆាំងអាជ្ញាធរជាបន្តបន្ទាប់និងស្រែកថា អយុត្តិធម៌ ។ បញ្ហារៀបរយតំបន់អភិវឌ្ឍឫស្សីកែវនៅមានការតវ៉ាច្រើនទៀតចេញពីអ្នករំលោភ។ ក្រុមមន្ត្រីនិយាយថា ពួកគេក៏មានចំណែកដីដែលបានបែងចែកដូចគ្នា តែពួកគាត់សម្អាងថានៅទីនេះយូរហើយ មិនព្រមទទួលចំណែកដីតាមការបែងចែកនោះទេ ទើបបង្កើតជាបញ្ហាឡើង ។
ចែករំលែកព័តមាននេះ