ខេត្តកំពង់ឆ្នាំង ៖ ប្រព័ន្ធធារាសាស្ត្រលំហាច គឺជាសំណង់ដែលកំពុងរៀបចំកសាងថ្មី ដើម្បីយកទឹកស្រោចស្រប់លើផ្ទៃដី ស្រែចំនួនប្រមាណជាង៣ពាន់ហិកតា ។ ធារាសាស្ត្រថ្មីមួយនេះ ស្ថិតក្នុង ភូមិអញ្ចាញ ឃុំក្តុលសែនជ័យ ស្រុកទឹកផុស មានចម្ងាយជាង៦០គីឡូ ម៉ែត្រពីទីរួមខេត្តកំពង់ឆ្នាំង ។
សំណង់ថ្មីជាប្រវត្តិសាសាស្ត្រមិនធា្លប់មាននេះ ក្រោយពេលរូចរាល់ នឹងជួយដល់វិស័យកសិកម្មដំណាំស្រូវវស្សារបស់ ប្រជាពលរដ្ឋ ក្នុងស្រុកចំនួន៣ គឺស្រុកបរិបូរណ៍ ស្រុករលាប្អៀរ និងស្រុកទឹកផុស ហើយតំបន់នោះនឹងប្រក្លាយជាតំបន់ទេសចរណ៍ យ៉ាងទាក់ទាញទៀតផង ។
លោក ដោក ប៊ុនថុន ប្រធានមន្ទីរធនធានទឹក និងឧតុនិយម ខេត្តកំពង់ឆ្នាំង បានឱ្យដឹងនៅរសៀលថ្ងៃទី២៧ ខែធ្នូ ឆ្នាំ២០១៩នេះថាៈ ប្រព័ន្ធធារាសាស្ត្រលំហាច គិតមកដល់ពេលនេះ កំពុងដំណើរការសាងសង់បានជាង៩០% ហើយ ដោយអាចស្រោចស្រពលើផ្ទៃដីស្រែវស្សាចំនួន៣២៨៩ហិកតា ។
លោកប្រធានមន្ទីរធនធានទឹក និងឧតុនិយមខេត្តបានបន្តថា ប្រព័ន្ធធារាសាស្ត្រនេះមានប្រឡាយតូច ធំ វែង និងខ្លីសរុបចំនួន១៣៣ខ្សែដែលមានប្រវែងសរុប ១៧៣,៨០គីឡូម៉ែត្រ ក្នុងនោះមាន សំណង់ក្បាលហុងទឹក១កន្លែង, សំណង់ទ្វារទឹក១កន្លែង, ធ្វើប្រឡាយមេចំនួន០១ខ្សែ មានប្រវែង១៦,៤០គីឡូម៉ែត្រ, សាងសង់ប្រឡាយថ្នាក់ទី២ ចំនួន១៣ខ្សែ ស្មើនឹងប្រវែង៤២,៥០គីឡូម៉ែត្រ , សាងសង់ប្រឡាយរំដោះទឹកចំនួន១៥ខ្សែ ស្មើនឹងប្រវែង ៥២,៩០គីឡូម៉ែត្រ , សាងសង់ប្រឡាយទឹកថ្នាក់ទី៣ ចំនួន៩៣ខ្សែ មានប្រវែង៦២គីឡូម៉ែត្រ , សាងសង់សំណង់សិល្បការសរុបចំនួន៥៥៧កន្លែង និងសាងសង់សំណង់អគារសហគមន៍កសិករប្រើប្រាស់ទឹកចំនួន១កន្លែង។
លោកប្រធានមន្ទីរធនធានទឹកបានបញ្ជាក់ថា ប្រព័ន្ធធារាសាស្ត្រនេះ គឺជាជំនួយរបស់រាជរដ្ឋាភិបាលជប៉ុន កសាងដោយអង្គការចៃការជប៉ុន បានចាប់ផ្ដើមកសាងនៅក្នុងអំឡុងខែមិនា ឆ្នាំ២០១៧ គិតមកដល់ពេលនេះមានរយៈពេលប្រមាណ២ឆ្នាំ៧ខែហើយ ដែលនឹងអាចបញ្ចប់គម្រោងនៅក្នុង ខែធ្នូ ឆ្នាំ២០២០ខាងមុខនេះ ។ ប្រព័ន្ធធារាសាស្ត្រនេះមានប្រភពទឹកមកពីស្ទឹងអូររំចេក ឃុំក្តុលសែនជ័យ និងមួយផ្នែក មកពីលើភ្នំគុក ដែលមានព្រុំប្រទល់ជាប់ខេត្តកំពង់ឆ្នាំង ជាមួយខេត្តពោធិសាត់។ ប្រព័ន្ធធារាសាស្ត្រនេះ ប្រសិនបើប្រជាពលរដ្ឋកែប្រែទម្លាប់ពីធ្វើស្រូវធ្ងន់ មកធ្វើស្រូវកណ្តាលវិញ គឺអាចធ្វើស្រែបាន២ដងនៅក្នុងខែវស្សា ហើយអាចទទួលបានទិន្នផលបានទ្វេដងទៀតផង ។
ដោយឡែកប្រជាពលរដ្ឋក៏ដូចជាមន្ត្រីជំនាញ ទេសចរណ៍បានរំពឹងថា នៅពេលសំណង់ស្ទាក់ទឹកលំហាចនេះ បានសាងសង់រួចរាល់ និងបានជាអត្ថប្រយោជន៍២យ៉ាងគឺ ទី១-សម្រាប់ជាប្រពន្ឋ័ស្រោចស្រពទឹក ធ្វើស្រែដល់ប្រជាពលរដ្ឋនៅតំបន់នោះ ទី២-នឹងក្លាយជាតំបន់ទេសចរណ៍ដ៏ស្រស់ត្រកាល ដែលឱ្យភ្ញៀវទេសចរណ៌ ទៅទស្សនាកំសាន្តបានយ៉ាងសប្បាយរីករាយ ដូចសំណង់ស្ទាក់ទឹកធារាសាស្ត្រអាចាង ក្នុងឃុំអញ្ចាញរូង ស្រុកបរិបូរណ៌ដែរ៕ (កែសម្រួលដោយ ៖ ធីតា)
ចែករំលែកព័តមាននេះ