ខេត្តមណ្ឌលគិរី ៖ សម្លបំពង់ឬស្សី ឬដែលអ្នកស្រុកហៅថា «ប្រូង» ត្រូវបានគេយកទៅតាំងលក់នៅរង្វង់មូលគោព្រៃ កណ្តាលក្រុងសែនមនោរម្យ នាឱកាសថ្ងៃបុណ្យឆ្លងឆ្នាំសកល ដើម្បីជាការផ្សព្វផ្សាយពីម្ហូបបែបប្រពៃណីប្រចាំតំបន់ខេត្តមណ្ឌលគិរី។ លោក…
ខេត្តមណ្ឌលគិរី ៖ សម្លបំពង់ឬស្សី ឬដែលអ្នកស្រុកហៅថា «ប្រូង» ត្រូវបានគេយកទៅតាំងលក់នៅរង្វង់មូលគោព្រៃ កណ្តាលក្រុងសែនមនោរម្យ នាឱកាសថ្ងៃបុណ្យឆ្លងឆ្នាំសកល ដើម្បីជាការផ្សព្វផ្សាយពីម្ហូបបែបប្រពៃណីប្រចាំតំបន់ខេត្តមណ្ឌលគិរី។
លោក សុផល ដែលបាននាំយកម្ហូបប្លែកៗយកទៅលក់នៅតាមផ្លូវក្នុងក្រុងសែនមនោរម្យបានឲ្យដឹងថា មានមូលហេតុខ្លះដែលលោកបានសម្រេចចិត្តរៀបចំសម្លបែបប្រពៃណីជនជាតិដើមភាគតិច លក់ជាសាធារណៈនៅពេលនេះ គឺដោយសារនៅរដូវបុណ្យឆ្លងឆ្នាំសកលខេត្តមណ្ឌលគិរី នឹងមានភ្ញៀវទេសចរមកលេងកម្សាន្តច្រើន ដូច្នេះជាឱកាសមួយសម្រាប់គ្រួសាររបស់លោក អាចបង្ហាញពីរបៀបស្ល ពីមុខម្ហូបដ៏មានឱជារសដែលផ្សំឡើងពីបន្លែធម្មជាតិពិតៗ។ មិនត្រឹមតែជាមុខម្ហូបផ្សំពីបន្លែធម្មជាតិដុះតាមមាត់អូរនោះទេ សម្រាប់រយៈពេលនៃការដាក់លក់នេះ លោក សុផល បញ្ជាក់ថា សម្លមួយបំពង់មានតម្លៃត្រឹម៤ម៉ឺនរៀលប៉ុណ្ណោះ ដែលអាចបរិភោគម៉ាឆ្អែតមនុស្សពេញវ័យចំនួន៣ទៅ៤នាក់។
លោក សុផល បានបន្តថា សម្ល «ប្រូង» របស់ជនជាតិដើមភាគតិច រស់នៅតំបន់ខ្ពង់រាបនាភាគឦសានជាម្ហូបអាហារដ៏ពេញនិយមសម្រាប់ប្រជាជនក្នុងតំបន់ ហើយមិនតែប៉ុណ្ណោះ វាកំពុងទាក់ទាញការចាប់អារម្មណ៍ពីអ្នកទេសចរខ្លាំងផងដែរ ។ គាត់ចេះធ្វើម្ហូបនេះយ៉ាងស្ទាត់ជំនាញ ព្រោះមុខម្ហូបនេះសម្បូរទៅដោយវីតាមីន ដោយសារគេប្រើសុទ្ធសឹងបន្លែបេះពីព្រៃធម្មជាតិ ថ្មីៗ។
ចំណែកគ្រឿងផ្សំសម្រាប់សម្លបុក ឬប៉ូង រួមមាន សាច់យាវគោ (សាច់ស្វិត ឬសាច់ប្រភេទងៀតក៏បាន) ប្រហុក ចុងផ្តៅ ស្លឹកម្ទេស ត្រប់ស្រួយ ស្លឹកខ្ចូញ ស្លឹកជន្លង់ ទំពាំង និងស្លឹករុក្ខជាតិបៃតងមួយចំនួនទៀត ។ អ្វីដែលគេមិនអាចអត់បាននោះ គឺបំពង់ឫស្សីព្រៃ ។ ឫស្សីព្រៃ ត្រូវរកឫស្សីដើមណាដែលមានសាច់វែង (ថ្នាំងវែង) ធំ ទើបអាចស្លបាន និងជួយបង្កើនរសជាតិទៀតផង ។
ចំពោះរបៀបនៃការស្ល គឺគេត្រូវបេះបន្លែទាំងនោះលាងទឹកឲ្យស្អាត ហាន់សាច់ជាបន្ទះតូចៗចិញ្ច្រាំប្រហុកឲ្យម៉ដ្ឋ លាយគ្រឿងស្ករស និងប៊ីចេងបន្តិចចូលគ្នាក្នុងឆ្នាំងតែមួយ រួចញាត់គ្រឿងផ្សំទាំងនោះចូលទៅក្នុងបំពង់ឫស្សីដែលគេត្រៀមទុក និងយកទៅដុតក្នុងភ្លើងប្រមាណជិត១ម៉ោងជាការស្រេច ។
សម្ល «ប្រូង» នេះ គេសង្កេតឃើញថា អ្នកទេសចរបរទេសចូលចិត្តឲ្យមគ្គុទេ្ទសទេសចរដែលនាំពួកគេដើរលេងកម្សាន្តក្នុងព្រៃ ស្លឲ្យហូបនៅតាមមាត់អូរក្នុងព្រៃ និងកន្លែងដែលសម្បូរបន្លែធម្មជាតិទៀតផង ៕ (កែសម្រួលដោយ ៖ បុប្ផា)
ចែករំលែកព័តមាននេះ