ខេត្តកំពង់ឆ្នាំង ៖ អភិបាលខេត្តកំពង់ឆ្នាំង លោកឈួរ ច័ន្ទឌឿន បានមានប្រសាសន៍ផ្ដាំផ្ញើដល់លោកមេឃុំចៅសង្កាត់ និងស្មៀនឃុំសង្កាត់ទាំងអស់ក្នុងខេត្ត ត្រូវយកចិត្តទុកដាក់ប្រើប្រាស់ Tablets ឬ…
ខេត្តកំពង់ឆ្នាំង ៖ អភិបាលខេត្តកំពង់ឆ្នាំង លោកឈួរ ច័ន្ទឌឿន បានមានប្រសាសន៍ផ្ដាំផ្ញើដល់លោកមេឃុំចៅសង្កាត់ និងស្មៀនឃុំសង្កាត់ទាំងអស់ក្នុងខេត្ត ត្រូវយកចិត្តទុកដាក់ប្រើប្រាស់ Tablets ឬ ឧបករណ៍ផ្ទុកទិន្នន័យទំនើបកម្ម ឲ្យបានត្រឹមត្រូវ និងចំគោលដៅដើម្បីបម្រើស្ត្រីមានផ្ទៃពោះ និងកុមារក្រោមអាយុ២ឆ្នាំ ។ លោកអភិបាលខេត្តបានមានប្រសាសន៍បែបនេះក្នុងពិធីចែក Tablets ជូនឃុំសង្កាត់ នៅសាលាខេត្តកំពង់ឆ្នាំងនាព្រឹកថ្ងៃទី៣០ ខែធ្នូ ឆ្នាំ ២០១៩ ។
លោកអភិបាលខេត្តកំពង់ឆ្នាំងបានមានប្រសាសន៍បន្តថា ដើម្បីលើកកម្ពស់ប្រព័ន្ធជំនួយសង្គមរាជរដ្ឋាភិបាលកម្ពុជាបានដាក់ចេញនូវគោលនយោបាយ កម្មវិធីឧបត្ថម្ភសាច់ប្រាក់ ជូនដល់ស្ត្រីមានផ្ទៃពោះ និងកុមារអាយុក្រោម២ឆ្នាំក្នុងគ្រួសារក្រីក្រ តាមរយៈការលើកទឹកចិត្តដល់ស្ត្រីជាមាតា និងកុមារឲ្យប្រើប្រាស់សេវាសុខភាព ដោយភ្ជាប់លក្ខខណ្ឌជាមួយទម្លាប់ថែទាំសុខភាពចាំបាច់មួយចំនួន ក្នុងគោលបំណងដើម្បីលើកកម្ពស់សុខុមាលភាពមាតា និងកុមារ ព្រមទាំងរួមចំណែកដោះស្រាយបញ្ហាកង្វះអាហារូបត្ថម្ភរបស់កុមារក្នុងគ្រួសារក្រីក្រ ចាប់ពីកូនក្នុងផ្ទៃ រហូតដល់អាយុ២ឆ្នាំ ដើម្បីជំរុញការលូតលាស់ទាំងកាយសម្បទានិងប្រាជ្ញាស្មារតី ។
លោកអភិបាលខេត្តកំពង់ឆ្នាំងបានមានប្រសាសន៍បន្តថា ការចែកជូន Tablets ដល់ឃុំសង្កាត់ ទូទាំងខេត្តនៅថ្ងៃនេះដែរគឺសម្រាប់ប្រើប្រាស់រួមគ្នា ក្នុងការកំណត់អត្តសញ្ញាណកម្មគ្រួសារក្រីក្រ តាមការស្នើសុំ និងឧបត្ថម្ភសាច់ប្រាក់ជូនដល់ស្ត្រីមានផ្ទៃពោះ និងកុមារអាយុក្រោម២ឆ្នាំក្នុងគ្រួសារក្រីក្រ ។ ក្នុងរយៈពេលនៃការឧបត្ថម្ភ តាំងពីមានផ្ទៃពោះលើកដំបូងរហូតដល់កុមារកើតបានអាយុ២ឆ្នាំនេះ ក្នុងស្ត្រីក្រីក្រម្នាក់ៗទទួលបានប្រាក់សរុបចំនួន៧៦ម៉ឺនរៀល ។
ក្នុងន័យនេះដែរ លោកអភិបាលខេត្តបានក្រើនរំលឹកដល់អស់លោកមេឃុំ ចៅសង្កាត់ ក៏ដូចជាស្មៀនឃុំទាំងអស់ ត្រូវយកចិត្តទុកដាក់កំណត់អត្ដសញ្ញាណជនក្រីក្រឲ្យបានត្រឹមត្រូវ កុំបក្ខពួកនិយម ឬគ្រួសារនិយម ដែលធ្វើឱ្យបាត់បង់ប្រជាប្រិយភាពរបស់ថ្នាក់ដឹកនាំ ។ ជាងនេះទៅទៀតសូមកុំយកឧបករណ៍ ផ្ទុកទិន្នន័យទំនើបកម្មនេះទៅប្រើប្រាស់អ្វីផ្សេងទៀត ដូចជាបញ្ចូលកម្មវិធី ហ្វេសបុក ឬ ហ្គេមជាដើម ។
យោងតាមរបាយការណ៍របស់លោក ថោង ចំរើន ប្រធានមន្ទីរសង្គមកិច្ច អតីតយុទ្ធជន និងស្ដារយុវនីតិសម្បទា ខេត្តកំពង់ឆ្នាំង បានឲ្យដឹងថាខេត្ត Tablets ដែលចែកជូនទូទាំងឃុំសង្កាត់ឲ្យប្រើប្រាស់នៅពេលនេះគឺ មានចំនួន៧០គ្រឿង ក្នុងនោះ៤គ្រឿងត្រូវបានប្រគល់ជូនសង្កាត់ក្នុងក្រុងកំពង់ឆ្នាំង តាមរយៈមន្ទីរសង្គមកិច្ច និងចំនួន៦៦គ្រឿងទៀតត្រូវបានប្រគល់ជូនឃុំទាំង៦៦ តាមរយៈប្រធានមន្ទីរផែនការខេត្ត។ ក្រៅពីនោះ ឃុំសង្កាត់ទាំង៧០ នៅទទួលបានកាតវីងសម្រាប់ទូទាត់សាច់ប្រាក់ ក្នុង១ឃុំ១សន្លឹកផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ