រាជធានីភ្នំពេញ ៖ ក្រុមអ្នកតវ៉ាម្នាក់ត្រូវបានអាជ្ញាធរឃាត់ខ្លួន ខណៈពេលដែលបន្តធ្វើតវ៉ា ព្រមទាំងព្យាយាមដុតកង់រថយន្តប្រឆាំងនឹងអាជ្ញាធរខណ្ឌឫស្សីកែវ ដែលបានចុះទៅការពារគ្រឿងចក្រ ធ្វើរបងរបស់ម្ចាស់កម្មសិទ្ធិដោយស្របច្បាប់ ។ នៅក្នុងការតវ៉ានេះ ក៏មានការប្រឈមមុខ និងប៉ះទង្គិចពាក្យសំដីគ្នា ព្រមទាំងរុញគ្នា រវាងកម្លាំងសមត្ថកិច្ច និងក្រុមអ្នកតវ៉ាផងដែរ។ ទោះបីជាយ៉ាងណា ពុំមានការប្រើអំពើហិង្សានោះទេ ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ១១ព្រឹកថ្ងៃទី៣០ ខែធ្នូ ឆ្នាំ២០១៩ នៅចំណុចដីតំបន់អភិវឌ្ឍន៍ឫស្សីកែវ តាមបណ្តោយផ្លូវលេខ៥៩៨ ស្ថិតក្នុងភូមិទួលពពែ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
ក្រុមអ្នកតវ៉ាដែលត្រូវឃាត់ខ្លួន ត្រូវបាននគរបាលអោយដឹងថា ឈ្មោះ ឡេង សុភ័ក្រ អាយុ២៦ឆ្នាំ មានលំនៅស្នាក់នៅកន្លែងកើតហេតុខាងលើ ។
តាមប្រភពព័ត៌មានអោយដឹងថា នៅព្រឹកថ្ងៃទី៣០ ខែធ្នូ ឆ្នាំ២០១៩ កម្លាំងគណៈបញ្ជាការឯកភាពខណ្ឌឫស្សីកែវ ប្រមាណជាង២០០នាក់ បានចុះទៅការពារគ្រឿងចក្រ ដើម្បីធ្វើរបងហ៊ុមព័ទ្ធដីចំនួន៨ឡូតិ៍របស់ម្ចាស់ដីស្របច្បាប់ បន្ទាប់ពីអាជ្ញាធរបានអនុវត្តវិធានការរដ្ឋបាលរុះរើសំណង់របស់លោកគង់ ទី ដែលអាជ្ញាធរចោទថា បានសាងសង់រំលោភយកដី ដែលមានកម្មសិទ្ធិនៅតំបន់អភិវឌ្ឍន៍ឫស្សីកែវ ។
តាមប្រភពព័ត៌មានបានឱ្យដឹងបន្តថា នៅព្រឹកនោះដែរ គេឃើញប្រជាពលរដ្ឋ ដែលត្រូវគេរុះរើ បានផ្ទុះការតវ៉ាថ្មីម្តងទៀត ហើយ ក៏បានព្យាយាមប្រមូលកង់រថយន្តមកដុត ហើយត្រូវបានអាជ្ញាធរ និងសមត្ថកិច្ចបានទៅអន្តរាគមន៍ពន្លត់ ។ នៅក្នុងហេតុការណ៍ខាងលើនេះសមត្ថកិច្ចក៏បានឃាត់ខ្លួនក្រុមអ្នកតវ៉ាម្នាក់រុញដាក់រថយន្តបញ្ជូនទៅកាន់សាលាខណ្ឌឫស្សីកែវតែម្តង ។
គួរបញ្ជាក់ថា កាលពីថ្ងៃទី២៦ ខែធ្នូឆ្នាំ ២០១៩ គណៈបញ្ជាការឯកភាពខណ្ឌឫស្សីកែវ ក្រោមការដឹកនាំដោយលោកមាន ចាន់យ៉ាដា អភិបាលរងរាជធានីភ្នំពេញ បានប្រើវិធានការណ៍រដ្ឋបាលរុះរើសំណង់របស់លោកព្រំ បូរ ដែលមានទំនាស់រ៉ាំរ៉ៃ នៅតំបនអភិវឌ្ឍន៍ ដើម្បីយកដីចែកអោយប្រជាពលរដ្ឋចំនួន១៧៧គ្រួសារ ។ លុះនៅថ្ងៃទី២៧ ខែធ្នូ គណៈបញ្ជាការឯកភាពក៏បានបន្តរុះរើសំណង់ របស់លោកគង់ ទី បន្តទៀត ដើម្បីយកដីប្រគល់អោយប្រជាពលរដ្ឋ ដែលជាម្ចាស់កម្មសិទ្ធិ (ប្លង់រឹង)។
ទន្ទឹមនោះ ប្រជាពលរដ្ឋដែលជាក្រុមគ្រួសាររបស់លោកព្រំ បូរ និងលោកគង់ ទី ព្រមទាំងប្រជាពលរដ្ឋ ដែលប្រឈមមុខនឹងការរុះរើបន្តទៀត ក៏បានផ្ទុះការតវ៉ាប្រឆាំងអាជ្ញាធរ ជាបន្តបន្ទាប់ និងស្រែកថា អយុត្តិធម៌៕ (កែសម្រួលដោយ ៖ ធីតា)
ចែករំលែកព័តមាននេះ